రూ.7.16 కోట్లు పెట్టి 358 మద్యం షాపులకు దరఖాస్తు చేస్తే.. ఎన్నొచ్చాయంటే

ఆంధ్రప్రదేశ్‌లో మద్యం దుకాణాల లాటరీ ప్రక్రియలో చిత్ర విచిత్రాలు చోటు చేసుకున్నాయి. మొత్తం 3396 మద్యం దుకాణాల లైసెన్సుల కోసం 89882 దరఖాస్తులు వచ్చిన సంగతి తెలిసిందే. ఇక వీటి ద్వారా ప్రభుత్వానికి రూ.1700 కోట్లకు పైగా ఆదాయం వచ్చింది. ఇక సోమవారం వీటిలో నుంచి డ్రా తీసి.. గెలిచిన వారికి లిక్కర్ షాపులు కేటాయించారు. అయితే ఈ లాటరీ తీసే సమయంలో అనేక సిత్రాలు చోటుచేసుకున్నాయి. మద్యం షాపులను దక్కించుకునేందుకు భారీగా పోటీపడిన సంగతి తెలిసిందే. అమెరికా, యూరోప్ నుంచి కూడా ఆన్‌లైన్‌లో దరఖాస్తులు వచ్చాయి. ఇక విశాఖపట్నంలో ఓ వ్యక్తి అయితే ఏకంగా 155 లిక్కర్ షాపులకు దరఖాస్తు చేసిన వ్యవహారం తెలుసుకుని అందరూ నోరెళ్లబెట్టారు. ఇందుకోసం మనోడు ఏకంగా రూ.3.10 కోట్లు దరఖాస్తు రుసుం చెల్లించాడు. అయితే అంతకుమించిన సంగతి ఇప్పుడు బయటకు వచ్చింది.

మద్యం షాపుల లాటరీ ప్రక్రియ పూర్తైన తర్వాత లైసెన్సులు దక్కించుకున్నవారు చిందులేస్తుంటే.. రానివారు నిరాశపడిపోతున్నారు. అయితే ఓ ఔత్సాహికుడు ఎక్స్ వేదికగా చేసిన ట్వీట్ మాత్రం ప్రస్తుతం వైరల్ అవుతోంది. తాను, తన మిత్ర బృందం కలిసి మద్యం దుకాణాల లైసెన్సుల కోసం ఏకంగా రూ.7.16 కోట్లు దరఖాస్తు రుసుం చెల్లించామని మనోడు ట్వీట్ చేశాడు. ఎన్ని లైసెన్సులు వచ్చాయనేదీ పక్కనబెడితే.. మొత్తం 358 మద్యం దుకాణాలకు దరఖాస్తు చేసినట్లు చెప్పుకొచ్చాడు. దీని కోసం దరఖాస్తు రుసుము కింద రూ.7.16. కోట్లు చెల్లించామని చెప్పాడు. అయితే లాటరీలో పది మద్యం దుకాణాలు మాత్రమే వచ్చాయన్న సదరు నెటిజన్.. డబ్బులు పోయినందుకు మాత్రం బాధ లేదంటున్నాడు.

రాష్ట్రాభివృద్ధి కోసం మనం ఏడు కోట్లు విరాళం ఇచ్చామని గర్వంగా ఫీలవ్వమని చెప్పానంటూ ట్వీట్ చేశాడు. ఇక 358 మద్యం దుకాణాలకు దరఖాస్తు చేస్తే విజయవాడ సిటీలో నాలుగు, గుంటూరు సిటీ, గ్రామీణంలో నాలుగు, పల్నాడులో ఒకటి, చీరాలలో ఒకటి వచ్చిందని తన ట్వీట్‌లో రాసుకొచ్చాడు. అయితే మనోడి ట్వీట్‌కు నెటిజనం రిప్లైలు కూడా నవ్వు తెప్పిస్తున్నాయి. పది షాపులతో 7 కోట్లు సంపాదించాలంటే పవన్ కళ్యాణ్ ఉండగా కష్టమేనని.. విరాళం ఇచ్చానని అనుకోవటమే మంచిదంటూ కొంతమంది నెటిజనం కామెంట్లు పెడుతున్నారు.

ఆ రకంగా రాష్ట్రంలోని పదిశాతం మద్యం షాపులకు దరఖాస్తు చేసిన బ్యాచ్‌కు.. పది షాపులు రావటం నిరాశగానే ఉన్నా.. రాష్ట్రాభివృద్ధికి విరాళమిచ్చామన్న వారి వ్యాఖ్యలు స్ఫూర్తిగానే ఉన్నాయంటున్నారు నెటిజనం. ఇక లిక్కర్ షాపుల లాటరీలో పక్క రాష్ట్రాల వారికి కూడా ఏపీలో మద్యం దుకాణాలు లభించాయి. అలాగే సత్యసాయి జిల్లాలో ఒకే వ్యక్తికి ఐదు మద్యం దుకాణాలు రావటం విశేషం.