ఏపీ సీఎం చంద్రబాబు నివాసం దగ్గర భద్రత మరింత కట్టుదిట్టం.. రూ.1.44 కోట్లు కేటాయింపు

ఆంధ్రప్రదేశ్ ముఖ్యమంత్రి నారా చంద్రబాబు నాయుడు నివాసం దగ్గర భద్రతకు సంబంధించి ప్రభుత్వం కీలక నిర్ణయం తీసుకుంది. ఉండవల్లిలోని చంద్రబాబు ఇంటి దగ్గర భద్రత, ఇతర వసతుల కోసం రూ.1.44కోట్లను నిధుల విడుదల చేస్తూ ప్రభుత్వం జీవో జారీ చేసింది. ఈ నిధుల్లో.. ప్రధానంగా చంద్రబాబు నివాసం దగ్గర రక్షణ కోసం సోలార్ ఫెన్సింగ్ ఏర్పాటుకు రూ.21లక్షలు, నిఘా కోసం రూ.81లక్షలతో సీసీ కెమెరాలు ఏర్పాటు చేయనున్నారు. ముఖ్యమంత్రి నివాసం దగ్గరకు వచ్చే వాహనాల తనిఖీలు, యూవీఎస్‌ఎస్, హైడ్రాలిక్ బోలార్డ్స్ కోసం రూ.42 లక్షల్ని ప్రభుత్వం కేటాయించింది.

ఆంధ్రప్రదేశ్ రాజధాని అమరావతి ప్రాంతంలో సచివాలయానికి వెళ్లే దారిలో కృష్ణా నది ఒడ్డున చంద్రబాబు నివాసం ఉన్న సంగతి తెలిసిందే. గతంలో జరిగిన పరిణామాలతో ముందస్తు జాగ్రత్తగా ప్రభుత్వం అక్కడ భద్రతను మరింత కట్టుదిట్టం చేయాలని భావిస్తోంది. ఈ క్రమంలోనే సెక్యూరిటీకి సంబంధించిన ఏర్పాట్ల కోసం నిధుల్ని కేటాయించింది. ఆంధ్రప్రదేశ్ ముఖ్యమంత్రి చంద్రబాబుకు ప్రస్తుతం ఎన్‌ఎస్‌జీ కమాండోస్ భద్రతను కల్పిస్తున్నారు. వారితో పాటుగా రాష్ట్రానికి సంబంధించిన పోలీసుల కూడా సెక్యూరిటీని ఇస్తున్నారు.

మరోవైపు ఆంధ్రప్రదేశ్ ప్రభుత్వం పూర్తి స్థాయి బడ్జెట్‌ను తీసుకురావాలని భావిస్తోంది. ఈ మేరకు నవంబరు 11న శాసనసభలో బడ్జెట్‌ను ప్రవేశపెట్టాలని నిర్ణయించినట్లు తెలుస్తోంది. రాష్ట్ర బడ్జెట్‌ స్వరూపం, ఏ అంశాలకు ప్రాధాన్యం ఇవ్వాలి?, ర ఆర్థిక పరిస్థితులు, ఆదాయార్జన వంటి అంశాలపై సీఎస్ నీరబ్ కుమార్, ఆర్థిక మంత్రి పయ్యావుల కేశవ్, ఇతర అధికారులతో చంద్రబాబు కీలక సమీక్ష నిర్వహించారు. ఏపీలో ఎన్డీఏ కూటమి ప్రభుత్వం అధికారంలోకి వచ్చిన వెంటనే రాష్ట్ర ఆర్థిక పరిస్థితిపై శ్వేతపత్రం విడుదల చేసిన సంగతి తెలిసిందే.

గత ఆర్థిక సంవత్సరంలో ఆంధ్రప్రదేశ్ రెవెన్యూ రూ.1,73,766 కోట్లు వచ్చింది. ఇలాంటి పరిస్థితుల్లో ప్రస్తుత ఆర్థిక సంవత్సరంలో రూ. 2 లక్షల కోట్ల ఆదాయం వస్తుందా లేదా అని చంద్రబాబు ఆరా తీశారు. ఈ మేరకు రాబడి ఎలా ఉందని ఎక్సైజ్, వాణిజ్య పన్నులు, రెవెన్యూ రిజిస్ట్రేషన్‌ అధికారులను అడిగి తెలుసుకున్నారు. ప్రస్తుత రాష్ట్రంలో ఆర్థిక పరిస్థితులపై ఆర్థికశాఖ ముఖ్య కార్యదర్శి పీయూష్‌కుమార్‌ పవర్‌ పాయింట్‌ ప్రజంటేషన్‌ ఇచ్చారు. సంక్షేమ పథకాలు, ప్రభుత్వ ప్రాధాన్యాలు, వచ్చే ఐదు నెలల్లో రాష్ట్ర అవసరాలు ఏమిటి? వంటి అంశాలపై చర్చించారు. పెండింగ్ బిల్లుల అంశం కూడా చర్చకు వచ్చింది. మొత్తానికి ప్రభుత్వం వచ్చే నెలలోనే బడ్జెట్‌ను అసెంబ్లీ ముందుకు తీసుకొచ్చే పనిలో ఉంది. అంతేకాదు వచ్చే నెల 6న ఏపీ కేబినెట్ మరోసారి సమావేశం అవుతోంది.. ఈ భేటీలో బడ్జెట్‌ గురించి కూడా చర్చించే అవకాశం ఉంది.