సీఎం చంద్రబాబును కలిసిన రామ్‌దేవ్ బాబా.. అసలు కారణం ఇదే!

ఆంధ్రప్రదేశ్ ముఖ్యమంత్రి చంద్రబాబు నాయుడును ప్రముఖ యోగా గురువు రామ్‌దేవ్ బాబా కలిశారు. అమరావతిలోని ముఖ్యమంత్రి క్యాంప్ కార్యాలయంలో చంద్రబాబును కలిసిన రామ్‌దేవ్ బాబా.. పలు విషయాలపై చర్చించారు. ఈ విషయాన్ని స్వయంగా సీఎం చంద్రబాబు ట్వీట్ చేశారు. ఆంధ్రప్రదేశ్‌లో వ్యవసాయం, ఫుడ్ ప్రాసెసింగ్ యూనిట్, విద్యా రంగాల్లో పెట్టుబడులకు సంబంధించి చంద్రబాబు, రామ్‌దేవ్ బాబా మధ్య చర్చ జరిగింది. రాష్ట్రవ్యాప్తంగా వెల్‌నెస్ సెంటర్ల ఏర్పాటుతోపాటు వ్యవసాయం, ఫుడ్ ప్రాసెసింగ్ యూనిట్, విద్యా రంగాల్లో పెట్టుబడులపై చర్చించినట్లు చంద్రబాబు వెల్లడించారు.

అయితే గతంలో ఆంధ్రప్రదేశ్ ముఖ్యమంత్రిగా చంద్రబాబు నాయుడు ఉన్న సమయంలో 2018లో కూడా రామ్‌దేవ్ బాబా స‌చివాల‌యంలో భేటీ అయ్యారు. విజయనగరం జిల్లా చిన్నరావుపల్లిలో పతంజలి సంస్థ ఏర్పాటు చేసే మెగా ఫుడ్‌ పార్క్‌పై ముఖ్యమంత్రితో రామ్‌దేవ్ బాబా చర్చించారు. ఆ మెగాఫుడ్‌ పార్క్‌ గురించి రామ్‌దేవ్‌ బాబా.. చంద్రబాబుకు అప్పట్లో వివరించారు. రూ.634 కోట్ల వ్యయంతో ఫుడ్ ప్రాసెసింగ్ యూనిట్‌తో పాటు అనుబంధ యూనిట్లు ఏర్పాటు చేస్తామని చంద్రబాబుకు రామ్‌దేవ్ బాబా వెల్లడించారు. ఈ పార్క్‌తో 33400 మందికి ప్రత్యక్షంగా, పరోక్షంగా ఉపాధి అవకాశాలు వస్తాయని పేర్కొన్నారు. దీంతో ఈ మెగాఫుడ్‌ పార్క్‌కు 172.84 ఎకరాల భూమిని అప్పటి టీడీపీ ప్రభుత్వం కేటాయించింది.

మరోవైపు.. అమరావతి నిర్మాణ డిజైన్లలో ఎలాంటి మార్పులు లేవని మంత్రి నారాయణ వెల్లడించారు. నిర్మాణంలో ఏఐ టెక్నాలజీ వాడనున్నట్లు చెప్పారు. అమరావతి అభివృద్ధి పనుల కోసం నవంబర్ 15వ తేదీ నుంచి డిసెంబర్ 31వ తేదీలోగా టెండర్ల ప్రక్రియను పూర్తి చేస్తామని స్పష్టం చేశారు. పాత టెండర్ల గడువు ముగిసినందున.. చట్టపరంగా ఎలాంటి సమస్యలు లేకుండా జాగ్రత్తలు తీసుకుంటున్నట్లు తెలిపారు. జనవరి నుంచి సీఆర్డీఏ ఆధ్వర్యంలో రాజధాని అభివృద్ధి పనులు ప్రారంభం కానున్నాయని వెల్లడించారు.

విజయవాడలోని అమరావతి కన్వెన్షన్ హాల్‌లో ప్రొఫైలింగ్ యాప్‌పై మెప్మా సిబ్బందికి వర్క్‌షాప్‌ నిర్వహించగా.. ఆ కార్యక్రమానికి మంత్రి హాజరయ్యారు. పట్టణాలు, నగరాల్లో 28.56 లక్షల మంది మెప్మా సభ్యులు ఉన్నారని.. సమాచారం పూర్తిగా లేకపోవడంతో వారి డేటాను సేకరించడమే ప్రొఫైలింగ్ యాప్ లక్ష్యమని తెలిపారు. ఈ ప్రొఫైలింగ్ యాప్ వల్ల మెప్మా సభ్యుల సంక్షేమం, అభివృద్ధికి అవకాశం ఉంటుందని చెప్పారు. రాష్ట్ర ఖజానా పూర్తిగా ఖాళీ అయినప్పటికీ ఆంధ్రప్రదేశ్ అభివృద్ధి మాత్రం ఆగదని మంత్రి నారాయణ స్పష్టం చేశారు. వచ్చే 5 ఏళ్లలో ప్రజల ఆదాయం రెట్టింపు కావాలనేది ముఖ్యమంత్రి చంద్రబాబు లక్ష్యమని తెలిపారు.