పవన్ కళ్యాణ్ ప్రతిపాదన.. వెంటనే ఓకే చెప్పిన సీఎం చంద్రబాబు

ప్రభుత్వ వైద్య కళాశాల పేరు విషయంలో ఏపీ డిప్యూటీ సీఎం పవన్ కళ్యాణ్ కీలక ప్రతిపాదనను తెరపైకి తీసుకువచ్చారు. ఈ క్రమంలోనే ప్రపంచ ప్రఖ్యాత వైద్య శాస్త్రవేత్త, తెలుగు తేజం దివంగత డాక్టర్ యల్లాప్రగడ సుబ్బారావు పేరును రాష్ట్రంలోని ఏదైనా ప్రభుత్వ వైద్య కళాశాలకు పెట్టాలని పవన్ కళ్యాణ్.. ముఖ్యమంత్రి నారా చంద్రబాబు నాయుడుకు ప్రతిపాదించారు. ఈ మేరకు సీఎంకు.. డిప్యూటీ సీఎం అన్ని వివరాలు అందించారు. దీంతో పవన్ కళ్యాణ్ చేసిన ప్రతిపాదనను మెచ్చుకున్న సీఎం చంద్రబాబు.. దాన్ని పరిశీలించాలని వైద్య ఆరోగ్య శాఖ అధికారులను ఆదేశించారు. తన ప్రతిపాదనకు వెంటనే స్పందించి.. అధికారులకు ఆదేశాలు జారీ చేసిన సీఎం చంద్రబాబుకు పవన్ కళ్యాణ్ ధన్యవాదాలు తెలిపారు.

ప్రపంచానికి ఎన్నో ఔషధాలు అందించిన శాస్త్రవేత్త డాక్టర్ యల్లాప్రగడ సుబ్బారావు పుట్టింది భీమవరం.. విద్యాభ్యాసం చేసింది రాజమహేంద్రవరం. ఈ నేపథ్యంలోనే కొత్తగా ఏర్పడిన ఏలూరు, రాజమహేంద్రవరం ప్రభుత్వ వైద్య కళాశాల్లో ఏదైనా ఒక దానికి డాక్టర్ యల్లాప్రగడ సుబ్బారావు పేరు పెడితే బాగుంటుందని పవన్ కళ్యాణ్.. సీఎం చంద్రబాబు ముందు ఒక ప్రతిపాదనను తీసుకువచ్చారు. దానికి సంబంధించిన వివరాలను కూడా ఇచ్చారు. ఈ నేపథ్యంలోనే పవన్ కళ్యాణ్ ప్రతిపాదనకు స్పందించిన సీఎం.. దాన్ని పరిశీలించాలని వైద్యారోగ్యశాఖకు ఆదేశాలు ఇచ్చారు.

రెండు ప్రభుత్వ మెడికల్ కాలేజీల్లో ఏదో ఒక దానికి డాక్టర్ యల్లాప్రగడ సుబ్బారావు పేరు పెట్టాలనే తన ప్రతిపాదనపై సానుకూలంగా స్పందించి.. దాన్ని పరిశీలించాలని అధికారులను సూచించినందుకు ముఖ్యమంత్రి చంద్రబాబు నాయుడుకి డిప్యూటీ సీఎం పవన్ కళ్యాణ్ కృతజ్ఞతలు తెలిపారు. తొలి టెట్రాసైక్లిన్ యాంటీ బయాటిక్ అరియోమైసిన్ కనుగొన్నది డాక్టర్ యల్లాప్రగడ సుబ్బారావు కావడం తెలుగువారికి గర్వకారణం. అంతేకాకుండా బోద వ్యాధి (ఫైలేరియా)కు సంబంధించి హెట్రజాన్.. క్షయ వ్యాధి కట్టడికి ఐసోనికోటినిక్ ఆసిడ్ హైడ్రాజైడ్ ఔషధాలను ఆయనే రూపొందించారు. క్యాన్సర్‌కు వాడే కీమో థెరపీ ఔషధాల్లో తొలి తరం డ్రగ్ మెథోట్రెస్సెట్‌ను మరో సైంటిస్ట్‌తో కలిసి డాక్టర్ యల్లాప్రగడ సుబ్బారావు అభివృద్ధి చేశారు. భారతీయులందరికీ గర్వ కారణమైన శాస్త్రవేత్త డాక్టర్. యల్లాప్రగడ సుబ్బారావు అని ఉప ముఖ్యమంత్రి పవన్ కళ్యాణ్ చెప్పారు.