భారత్‌లో బ్రిటన్ రాజ దంపతుల రహస్య పర్యటన.. 4 రోజుల పాటు బెంగళూరులో

భారత్‌లో బ్రిటన్ రాజ దంపతులు రహస్యంగా పర్యటించడం ప్రస్తుతం తీవ్ర చర్చకు దారి తీసింది. కింగ్‌ ఛార్లెస్‌-3, క్వీన్ కెమిల్లా సీక్రెట్‌గా భారత్‌కు వచ్చి 4 రోజులు ఉన్నట్లు తెలుస్తోంది. అక్టోబర్ 27వ తేదీ నుంచి 30వ తేదీ వరకు బెంగళూరులో ఉండి.. వెల్‌నెస్ సెంటర్‌లో ట్రీట్‌మెంట్ తీసుకున్నట్లు సమాచారం. ఈ నేపథ్యంలోనే వారిద్దరూ అక్టోబర్ 30వ తేదీన బెంగళూరు నుంచి బ్రిటన్ వెళ్లినట్లు సంబంధిత వర్గాల ద్వారా తెలుస్తోంది. అయితే వీరి పర్యటన అధికారికం కాకుండా వ్యక్తిగతం కాకపోవడంతో భారత ప్రభుత్వం తరఫున ఎలాంటి అధికారిక ఆహ్వానాలు, కార్యక్రమాలు ఏర్పాటు చేయలేదు.

బెంగళూరు సమేతనహళ్లిలో ఉన్న సౌఖ్య ఇంటర్నేషనల్ హోలిస్టిక్ హెల్త్ సెంటర్‌ అనే వెల్‌నెస్‌ కేంద్రంలో బ్రిటన్‌ రాజదంపతులు యోగా, మెడిటేషన్‌ సాధనలో 4 రోజులు గడిపినట్లు తెలుస్తోంది. మీడియా వెల్లడించిన సమాచారం ప్రకారం కింగ్ చార్లెస్ -3, క్వీన్ కెమిల్లా దంపతులు అక్టోబర్ 21వ తేదీ నుంచి అక్టోబర్ 26వ తేదీ మధ్య కామన్వెల్త్ ప్రభుత్వాధినేతల సమావేశానికి హాజరయ్యారు. ఈ నేపథ్యంలోనే ఓషియానాలోని సమోవా నగరం నుంచి నేరుగా భారత్‌కు రహస్యంగా వచ్చినట్లు తెలుస్తోంది. వెల్‌నెస్‌ సెంటర్‌లో ప్రత్యేక సిబ్బంది వారికి వివిధ థెరపీ సెషన్‌లను నిర్వహించినట్లు సమాచారం.

అయితే బ్రిటన్ రాజుగా కింగ్ ఛార్లెస్‌-3 అధికారికంగా బాధ్యతలు చేపట్టిన తర్వాత ఆయన భారత్‌కు రావడం ఇదే తొలిసారి కావడం గమనార్హం. అయితే ఆయన వేల్స్ యువరాజుగా ఉన్న సమయంలో కూడా పలుమార్లు బెంగళూరులోని వెల్‌నెస్ సెంటర్‌ను సందర్శించి.. అక్కడ యోగా, మెడిటేషన్ ట్రీట్మెంట్ తీసుకునేవారు. ఇక కింగ్ ఛార్లెస్-3 తన 71వ పుట్టిన రోజును కూడా బెంగళూరు వెల్‌నెస్ సెంటర్‌లోనే ఘనంగా జరుపుకోవడం విశేషం. 2022లో క్వీన్ ఎలిజబెత్ II మరణించిన తర్వాత ఛార్లెస్‌ను బ్రిటన్‌కు రాజుగా ప్రకటించారు.

ఇక బ్రిటన్‌ రాజదంపతులు చికిత్స పొందిన సౌఖ్య ఇంటర్నేషనల్ హోలిస్టిక్ హెల్త్ సెంటర్‌.. బెంగళూరులోని సమేతనహళ్లిలో ఉంది. డాక్టర్ ఇస్సాక్ మథాయ్ డాక్టర్ సుజా ఇస్సాక్ ఈ వెల్‌నెస్ సెంటర్‌ను స్థాపించారు. ఇందులో ఆయుర్వేదం, నేచురోపతి, ఆక్యుప్రెషర్, యోగా, హోమియోపతి సహా ఇతర సంప్రదాయ చికిత్సలను అందిస్తారు. కింగ్ ఛార్లెస్‌-3 ఈ వెల్‌నెస్‌ సెంటర్‌కు ఇప్పటివరకు 9 సార్లు వచ్చి చికిత్స చేయించుకున్నట్లు సంబంధిత వర్గాల ద్వారా తెలుస్తోంది.