మేయర్ ఎన్నికల బరిలో తెలుగు యువకుడు.. గెలిస్తే అరుదైన రికార్డులు

అమెరికాలో తెలుగు యువకుడు పొలిటికల్ ఎంట్రీ ఇచ్చాడు. టెక్సాస్‌ స్టేట్‌లో మేయర్‌ ఎన్నిక బరిలో నిలిచి.. తన అదృష్టం పరీక్షించుకోబోతున్నాడు. బాపట్లకు చెందిన కార్తీక్‌ నరాలశెట్టి ఢిల్లీలో చదువుకున్నారు.. ఆ తర్వాత అమెరికాకు ఉన్నత విద్య కోసం వెళ్లారు.. న్యూజెర్సీ రట్టర్స్‌ యూనివర్సిటీలో కంప్యూటర్‌సైన్స్‌‌లో ఎంఎస్ పూర్తి చేశారు. ఆపై చదువు ఆపేసి ఇండియాకు తిరిగొచ్చి సోషల్‌బ్లడ్‌ పేరుతో ఓ ఎన్జీవో ఏర్పాటు చేసి.. వ్యాపారవేత్తగా ఎదిగారు. అదే సమయంలో పెంపుడు జంతువులకు సంబంధించిన మరో కంపెనీని ప్రారంభించారు.

అమెరికాలో వ్యాపారం చేస్తూ.. అక్కడే అధితి అనే యువతితో పరిచయం ఏర్పడగా.. ప్రేమించి వివాహం చేసుకున్నారు. ఈ జంటకు ఇద్దరు పిల్లలు ఉన్నారు. కార్తీక్ తాను నివాసం ఉంటున్న ‘ది హిల్స్‌’ మేయర్‌ ఎన్నికలపై ఫోకస్ పెట్టారు. పొలిటికల్ ఎంట్రీ ఇచ్చిన కార్తీక్.. ఆగస్టు నుంచే అక్కడ ఎన్నికల ప్రచారం మొదలుపెట్టారు. ఎంటర్‌ప్రెన్యూర్‌గా తన అనుభవంతో ది హిల్స్‌ అభివృద్ధికి దోహదపడతానంటూ ప్రచారం చేస్తున్నారు. ట్రాన్స్‌పరెన్సీ ఈజ్‌ ద గేమ్‌.. కార్తీక్‌ ఈజ్‌ ది నేమ్‌ అంటూ ది హిల్స్‌ మేయర్‌ ఎన్నికల ప్రచారంతో ఆకట్టుకుంటున్నారు. కార్తీక్‌కు కుటుంబం కూడా అండగా నిలిచింది.

కార్తీక్ ఎన్నికల బరిలో నిలిచిన ది హిల్స్‌లో 2,000 జనాభా ఉంది. అక్కడ ఐదు భారతీయ కుటుంబాలు మాత్రమే అక్కడ స్థిరపడినట్లు చెబుతున్నారు. అయితే న్యూజెర్సీలో ఉన్న బంధువుల సహకారంతో కార్తీక్ ప్రచారం చేస్తున్నారు. మరో నాలుగు రోజుల్లో (నవంబర్‌ 5) ఇక్కడ మేయర్‌ ఎన్నిక జరగనుంది. ఒకవేళ ఎన్నికల్లో విజయం సాధిస్తే.. ది హిల్స్‌ మేయర్‌ పదవి చేపట్టిన అతిపిన్న వయస్కుడిగా, తొలి భారతీయ వ్యక్తిగా అరుదైన గుర్తింపు దక్కుతంది. గతంలో కూడా భారత్‌ నుంచి వెళ్లి అమెరికాలో స్థిరపడిన వారుఎన్నికల్లో పోటీచేసి విజయం సాధించారు. ఇప్పుడు కార్తీక్ కూడా అదే బాటలో నడుస్తున్నారు. మొత్తానికి ది హిల్స్ మేయర్ పదవికి.. ఈ నెల 5న జరగబోయే పోలింగ్‌లో అదృష్టాన్ని పరిక్షించుకోబోతున్న కార్తీక్‌కు ఆల్ ది బెస్ట్.