టెస్లా జాబ్ కోసం 300 అప్లికేషన్లు, 500 ఈ-మెయిల్స్.. చివరికి ఏం జరిగిందంటే

ప్రపంచ కుబేరుడు ఎలాన్ మస్క్‌కు చెందిన టెస్లా కంపెనీ ప్రపంచంలోనే ఆటోమొబైల్ కంపెనీల్లో ముందంజలో ఉంటుంది. టెస్లా కార్లను కొనుగోలు చేసేందుకు జనం ఎంత ఆసక్తి చూపుతారో.. ఆ కంపెనీలో జాబ్ చేసేందుకు కూడా ఎంతో ఎదురుచూస్తూ ఉంటారు. ఇక అమెరికాలో ఉద్యోగం కోసం మన భారతీయులు పడే కష్టనష్టాలను కూడా మనం చూస్తూనే ఉంటాం. అమెరికాలోని టెస్లా కంపెనీలో ఉద్యోగం కోసం చేయని ప్రయత్నాలు లేవు. టెస్లా ఉద్యోగం కోసం మహారాష్ట్రలోని పూణేకు చెందిన యువకుడు 5 నెలలపాటు 300 దరఖాస్తులు.. 500 ఈ-మెయిల్స్‌తో ఓ చిన్నపాటి యుద్ధమే చేశాడు. ఎట్టకేలకు తన డ్రీమ్ నెరవేర్చుకుంటూ టెస్లా కంపెనీలో ఉద్యోగాన్ని సాధించాడు.

పూణేకు చెందిన ధ్రువ్‌ లోయాకు టెస్లాలో టెక్నికల్‌ సపోర్ట్‌ స్పెషలిస్ట్‌ ఉద్యోగం సాధించాడు. ఇందుకోసం తాను పడిన శ్రమను అతడు లింక్డ్ ఇన్‌ పోస్ట్‌లో వెల్లడించాడు. అయితే కేవలం 5 నెలల కాలంలోనే తాను టెస్లా కంపెనీ ఉద్యోగాల కోసం 300 అప్లికేషన్లు, దాదాపు 500కు పైగా ఈ-మెయిల్స్‌ పంపినట్లు పేర్కొన్నాడు. అంతేకాదు 10సార్లు ఇంటర్వ్యూలకు హాజరైనట్లు తెలిపాడు. ఎట్టకేలకు తన కలల కంపెనీ టెస్లా నుంచి ఆఫర్‌ లెటర్‌ వచ్చినట్లు పేర్కొన్నాడు. ఇక ఈ 5 నెలల పాటు తనకు సపోర్ట్ చేసిన వారికి.. నమ్మినవారికి మనస్ఫూర్తిగా థ్యాంక్స్ చెప్పాడు.

అయితే తాను ఇంతకుముందు 3 ఇంటర్న్‌షిప్‌లు చేసినట్లు చెప్పాడు. ఇక అకడమిక్‌లో కూడా జీపీఏ ఉన్నా.. తాను 5 నెలలపాటు నిరుద్యోగిలా ఉంటానని అస్సలు ఊహించలేదని తెలిపాడు. తాను అమెరికాలో ఉన్నపుడు.. వీసా గడువు ముగింపు కోసం నిరంతరం భయపెట్టేదని పేర్కొన్నాడు. ఎప్పుడు తాను అమెరికా నుంచి వెళ్లిపోవాల్సి వస్తుందోనని భయపడేవాడిని అని గుర్తు చేసుకున్నాడు. ఆ సమయంలో తాను తన ఫ్రెండ్స్‌ అపార్ట్‌మెంట్‌లో ఉన్నట్లు వివరించాడు.

అమెరికాలోనే ఉండి వీలైనన్ని డాలర్లను దాచినట్లు చెప్పాడు. చిట్టచివరికి టెస్లాలో ఫుల్‌టైమ్‌ టెక్నికల్‌ సపోర్ట్‌ స్పెషలిస్ట్‌ జాబ్‌కు ఎంపికైనట్లు వెల్లడించాడు. అమెరికాలో ఉద్యోగం చేసేందుకు వచ్చిన ఇతర దేశాల విద్యార్థులకు జాబ్‌లు దొరకడం కష్టంగా ఉందని తెలిపాడు. ఈ సందర్భంగా ఉద్యోగాల కోసం ఎదురుచూసే వారికి కొన్ని విలువైన సూచనలు చేశాడు. అమెరికాలో ఉద్యోగాలకు అప్లై చేయడాన్ని కూడా 9-5 జాబ్‌లా చూడాలని.. మిగితా వారికి సూచించాడు. దీంతోపాటు వీకెండ్స్‌ సమయాల్లో ఇష్టమైన పనులను చేయండని హితవు పలికాడు. ఒక పద్దతి, ప్రణాళిక ప్రకారం పనిచేస్తూ.. పాజిటివ్ దృక్పథంతో ఉండండి అంటూ లింక్డ్ ఇన్‌ పోస్ట్‌లో ధ్రువ్‌ లోయా పేర్కొన్నాడు.