పోలీసులపై పవన్ కళ్యాణ్ వ్యాఖ్యలు.. డీజీపీ రియాక్షన్.. ఏమన్నారంటే

పిఠాపురం పర్యటనలో ఏపీ డిప్యూటీ సీఎం పవన్ కళ్యాణ్ పోలీసులపై చేసిన వ్యాఖ్యలపై ఏపీ డీజీపీ ద్వారకా తిరుమలరావు స్పందించారు. అనంతపురంలో జరిగిన పాసింగ్ అవుట్ పరేడ్ కార్యక్రమానికి హాజరైన ఆయన.. అనంతరం మీడియాతో మాట్లాడారు. దుష్ట శిక్షణ.. శిష్ట రక్షణ ఇదే మా విధానమన్న ఏపీ డీజీపీ.. తాము రాజ్యాంగానికి కట్టుబడి పనిచేస్తామన్నారు. రాజకీయ ఒత్తిళ్లతో పనిచేయమన్న డీజీపీ.. వాస్తవ పరిస్థితుల ఆధారంగానే ఏ కేసునైనా విచారిస్తామని చెప్పారు. గత ప్రభుత్వంలో కొన్ని తప్పిదాలు జరిగాయని అంగీకరించారు.

ఇటీవలి కాలంలో సైబర్ క్రైమ్, సోషల్ మీడియా వేధింపులు ఎక్కువయ్యాయన్న డీజీపీ.. వీటి కారణంగా మానసికంగా ఇ్బబందులు పడుతున్నారని చెప్పుకొచ్చారు. వీటిని పూర్తిస్థాయిలో నియంత్రించేందుకు ప్రయత్నిస్తున్నామని చెప్పారు. సోషల్ మీడియాలో అసభ్యకర పోస్టులు పెట్టేవారిని ఏమాత్రం ఉపేక్షించేది లేదని, చట్టపరంగా చర్యలు తీసుకుంటామని డీజీపీ హెచ్చరించారు. జిల్లాకొక సైబర్ క్రైమ్ పోలీస్ స్టేషన్ ఏర్పాటుపైనా ఆలోచిస్తున్నట్లు చెప్పారు. పోలీసులు నిష్పక్షపాతంగా, పారదర్శకంగా పనిచేయాలని.. తామంతా అలాగే పనిచేస్తున్నామన్నారు.

 గత ప్రభుత్వంలో చాలా తప్పిదాలు జరిగాయన్న ఏపీ డీజీపీ ద్వారకా తిరుమలరావు.. నేరస్థుల వేలిముద్రలు గుర్తించే వ్యవస్థ లేకుండా చేశారన్నారు. ఇది ఉద్దేశపూర్వకంగా చేశారా అనేది పరిశీలిస్తున్నట్లు చెప్పారు. అలాగే టీడీపీ కార్యాలయంపై దాడి జరిగితే ఒక్క కేసు కూడా నమోదు కాలేదని చెప్పారు. ఒక ఎంపీని కొట్టారన్న ఆరోపణలు వచ్చాయనీ.. దానిపై నిజానిజాలు తేలలేదన్నారు ఏపీ డీజీపీ ద్వారకా తిరుమలరావు.

మరోవైపు సోమవారం పిఠాపురంలో పర్యటించిన పవన్ కళ్యాణ్ ఏపీ హోంశాఖపైనా, పోలీసులపైనా కీలక వ్యాఖ్యలు చేశారు. ఇళ్లలోకి వచ్చి రేప్‌ చేస్తామని సోషల్‌ మీడియాలో బెదిరిస్తుంటే భావ ప్రకటనా స్వేచ్ఛ అవుతుందా అని ప్రశ్నించారు. నేరగాళ్లను రోడ్లపై వదిలేయాలా అని ప్రశ్నించిన పవన్.. చర్యలు తీసుకునే ధైర్యం లేనప్పుడు పోలీసులు ఎందుకంటూ ఎమోషనల్ అయ్యారు. రాష్ట్రాభివృద్ధిలో శాంతిభద్రతలు ఎంతో కీలకమన్న పవన్ కళ్యాణ్.. ఆ విషయాన్ని మరిచిపోవద్దంటూ పోలీసులకు సూచించారు. తప్పులు చేసిన వారిని వదిలిపెట్టకండి అని చెప్పిన పవన్,. పదే పదే తనతో ఈ విషయాన్ని చెప్పించుకోవద్దన్నారు. పరిస్థితులు ఇలాగే కొనసాగితే తాను హోంమంత్రిగా బాధ్యతలు తీసుకుంటానని.. తాను హోంమంత్రి అయితే పరిస్థితి వేరేగా ఉంటుందంటూ హెచ్చరించారు.