వైసీపీకి ప్రచారం చేసే కంటే ఆ పని చేసుంటే ఎక్కువ వచ్చేవి: శ్రీరెడ్డి

సోషల్ మీడియాలో ఎప్పుడూ యాక్టివ్‌గా ఉండే సినీ నటి శ్రీరెడ్డి మరో వీడియో వదిలారు. సామాజిక మాధ్మమాల్లో వైసీపీకి అనుకూలంగా పోస్టులు, వీడియోలు చేసే శ్రీరెడ్డి.. ఇటీవల పవన్ కళ్యాణ్, నారా లోకేష్‌లను క్షమాపణలు కోరిన సంగతి తెలిసిందే. తన సోషల్ మీడియా వేదికగా చంద్రబాబు, నారా లోకేష్, పవన్ కళ్యాణ్, వంగలపూడి అనిత వారి కుటుంబాలను ఉద్దేశించి తప్పుగా ఎలాంటి పోస్టులు, వీడియోలు పెట్టనంటూ వారందరికీ శ్రీరెడ్డి క్షమాపణలు చెప్పారు. అయితే ఇప్పుడు మరో వీడియో రిలీజ్ చేశారు శ్రీరెడ్డి. వైసీపీకి తాను ఎంత మద్దతుగా నిలిచినప్పటికీ.. వైసీపీ తనను పార్టీ సభ్యురాలిగా గుర్తించలేదని ఆవేదన వ్యక్తం చేశారు. ఇక బోరుగడ్డ అనిల్‌ను తాను తప్ప వైసీపీలో ఎవరూ వ్యతిరేకించలేదని శ్రీరెడ్డి చెప్పుకొచ్చారు.

ఇన్నేళ్లుగా పార్టీకి సానుభూతిపరురాలిగా ఉన్నా.. శ్రీరెడ్డి వైసీపీ మద్దతుదారు అని ఎప్పుడైనా చెప్పారా అని ప్రశ్నించారు. ఇన్నేళ్లుగా వైసీపీ కోసం కష్టపడుతున్నప్పటికీ వైఎస్ జగన్‌తో కనీసం ఫోటో కూడా తీయించుకోలేకపోయానంటూ శ్రీరెడ్డి చెప్పుకొచ్చారు. వైసీపీకి మద్దతుగా వీడియోలు చేస్తూ రావటం వలన తన సోషల్ మీడియా ఖాతాలపై రిపోర్టులు పడ్డాయని.. వచ్చే డబ్బులు కూడా తగ్గిపోయాయని శ్రీరెడ్డి వాపోయారు. వంటలూ, ఎక్స్‌పోజింగ్ వీడియోల ద్వారా వచ్చిన పాపులారిటీ, ఆదాయం కన్నా.. రాజకీయాలపై చేసిన వీడియోలతో వచ్చిన వ్యూయర్ షిప్ చాలా తక్కువని శ్రీరెడ్డి అన్నారు. ఇంతలా నష్టపోతూ పార్టీ కోసం కష్టపడితే తనకు గుర్తింపు దక్కలేదని శ్రీరెడ్డి ఆవేదన వ్యక్తం చేశారు.

చివరకు ఎన్నికల్లో ఓడిపోయిన తర్వాత కూడా తాను వైసీపీలో చేరేందుకు ముందుకువస్తే ఎవరూ ఆహ్వానించలేదని శ్రీరెడ్డి అన్నారు. వైసీపీ సానుభూతిపరురాలిగా తాను ఉన్నప్పటీకీ.. వారు తనను వైసీపీ మద్దతుదారురాలిగా భావించలేదన్నారు. తాను సారీ చెప్పినందుకు చాలా మంది బాధపడిపోతున్నారన్న శ్రీరెడ్డి.. తప్పుగా మాట్లాడిన మాటలకు క్షమాపణలు చెప్పానన్నారు. ఈరోజు కాకపోతే రేపైనా తనను అరెస్ట్ చేస్తారన్న శ్రీరెడ్డి.. బూతులు మాట్లాడిన, అసభ్యకరమైన పోస్టులు పెట్టిన టీడీపీ నేతలపై ఎందుకు చర్యలు తీసుకోరని ప్రశ్నించారు. వైసీపీకి వీర విధేయతతో తాను సేవ చేశానన్న శ్రీరెడ్డి.. ఇదే సేవ టీడీపీకి చేసి ఉంటే.. వంగలపూడి అనితలాగా తనకూ ఏదో ఒక పదవి దక్కేందంటూ చెప్పుకొచ్చారు.