అత్తగారింట్లో అల్లుడు చోరీ,,,అదుపులోకి తీసుకున్న పోలీసులు

పదేళ్ల కిందట వారిద్దరి పెళ్లి జరిగింది. అయితే మనస్పర్థలు రావటంతో ఏడేళ్లుగా భార్యాభర్తలు ఇద్దరూ దూరంగా ఉంటున్నారు. అయితే ఇటీవల ఆ అల్లుడు అత్తగారింటికి వచ్చాడు. వస్తే వచ్చాడు కానీ.. మనోడు చేసిన పనికి ఆ అత్తగారు లబోదిబోమంటూ పోలీస్ స్టేషన్‌కు పరుగులు పెట్టాల్సి వచ్చింది. వివరాల్లోకి వెళ్తే.. సత్యసాయి జిల్లా ధర్మవరం మండలంలోని గొట్లూరుకు చెందిన ఓబులమ్మ కుమార్తె పుష్పాంజలికి.. ఇందిరమ్మ కాలనీకి చెందిన రవి అనే వ్యక్తితో పదేళ్ల కిందట పెళ్లి జరిగింది. కొన్ని రోజులు వీరి కాపురం సజావుగానే సాగింది. అయితే కుటుంబంలో తగాదాలు రావటంతో ఏడేళ్ల కిందట ఇద్దరూ విడిపోయారు. అప్పటి నుంచి పుష్పాంజలి తల్లితో కలిసి గొట్లూరులో ఉంటోంది.

అయితే నవంబర్ 5న గొట్లూరులోని ఓబులమ్మ ఇంట్లో చోరీ జరిగింది. ఇంట్లో వాళ్లు పని కోసం బయటకు వెళ్లిన సమయంలో ఆగంతకులు ఇంటి తాళం పగలగొట్టి చోరీ చేశారు. బీరువాలోని ఆరున్నర తులాల బంగారం దోచుకెళ్లారు. తమ ఇంట్లో జరిగిన దొంగతనంపై ఓబులమ్మ పోలీసులకు ఫిర్యాదు చేశారు. తమ ఇంట్లో దొంగతనం జరిగిందని.. ఆరున్నర తులాల బంగారం పోయిందంటూ ఫిర్యాదు చేశారు. ఈ ఘటనపై దర్యాప్తు జరిపిన పోలీసులు.. అసలు దొంగ ఓబులమ్మ అల్లుడేనని గుర్తించారు. కూతురికి ఒంట్లో బాగాలేకపోవటంతో రవి ఇటీవల ఓబులమ్మ ఇంటికి వెళ్లాడు. అనారోగ్యానికి గురైన కూతుర్ని చూడ్డానికి వచ్చిన రవి.. ఓబులమ్మ ఇంట్లోని బంగారంపై కన్నేశాడు.

ఇంట్లోని వారంతా పని మీద బయటకు వెళ్లటంతో రవికి అవకాశం చిక్కింది. ఇంటి తాళం పగలగొట్టిన రవి.. బీరువా తెరిచి అందులో ఉన్న 6.5 తులాల బంగారు నగలు ఎత్తుకెళ్లినట్లు పోలీసులు తెలిపారు. చోరీ చేసింది అల్లుడేనని గుర్తించిన పోలీసులు ధర్మవంరం మండలంలోని నాగలూరు బస్టాప్‌ వద్ద అతన్ని అరెస్టు చేశారు. రవి వద్ద నుంచి 6.5 తులాల బంగారు నగలు స్వాధీనం చేసుకున్నారు.

జల్సాలకు అలవాటు పడి చోరీలు చేస్తున్న యువకుడిని గార్లదిన్నె పోలీసులు అరెస్ట్ చేశారు. గార్లదిన్నె మండలం సంజీవపురానికి చెందిన శంకర్ సాయికుమార్ పదో తరగతి వరకూ చదువుకున్నాడు. అ తర్వాత జల్సాలకు అలవాటు పడిన శంకర్ సాయికుమార్ బైక్‌ల చోరీని మొదలెట్టాడు. ఇప్పటి వరకూ 24 ద్విచక్రవాహనాలను చోరీ చేశాడు. వాటన్నింటిని ఓచోట చేర్చిన శంకర్.. బెంగళూరు, బళ్లారిలలో అమ్మాలని ప్రయత్నించాడు. అయితే ఈ లోపే ఓ బైక్ చోరీ కేసులో కూపీ లాగిన పోలీసులు.. శంకర్ సాయికుమార్ యవ్వారాన్ని గుర్తించారు. అతన్ని అరెస్ట్ చేసి 24 బైక్‌లు సీజ్ చేశారు.