వాళ్లపై చిన్న గీటు పడినా ఊరుకోం.. జగన్‌కు పవన్ వార్నింగ్

ఏపీ డిప్యూటీ సీఎం పవన్ కళ్యాణ్.. మాజీ ముఖ్యమంత్రి, వైసీపీ అధినేత వైఎస్ జగన్ మోహన్ రెడ్డి వ్యాఖ్యలపై స్పందించారు. వైసీపీ శ్రేణులను అక్రమంగా నిర్బంధిస్తే వదిలేది లేదని.. చట్టం దాటి అరెస్టులు చేసిన పోలీసులను సప్త సముద్రాల అవతల ఉన్నా వదిలిపెట్టమంటూ ఇటీవల వైఎస్ జగన్ ఘాటుగా వ్యాఖ్యలు చేశారు. ఈ నేపథ్యంలో ఈ వ్యాఖ్యలపై ఏపీ డిప్యూటీ సీఎం పవన్ కళ్యాణ్ స్పందించారు. తమది మంచి ప్రభుత్వమే కానీ మెతక ప్రభుత్వం కాదన్న పవన్ కళ్యాణ్, ఐఏఎస్ అధికారులకు వార్నింగ్ ఇస్తే సుమోటో కేసులు పెడతామంటూ హెచ్చరించారు. గుంటూరులో జరిగిన అటవీశాఖ అమరవీరుల సంస్మరణ కార్యక్రమానికి డిప్యూటీ సీఎం పవన్ కళ్యాణ్ హాజరయ్యారు.

అనంతరం విలేకర్లతో మాట్లాడిన పవన్ కళ్యాణ్.. వైసీపీ తీరుపైనా, వైఎస్ జగన్ విధానాలపైనా మండిపడ్డారు. వైసీపీ నేతలు తమ పాలనలో అధికారులను ఇష్టానుసారం ఉపయోగించుకున్నారన్న పవన్ కళ్యాణ్.. 20 ఏళ్లు తామే అధికారంలో ఉంటామనే రీతిలో వ్యవహరించారని మండిపడ్డారు. మాజీ సీఎం వైఎస్ జగన్‌కు బాధ్యత ఉండాలన్న పవన్ కళ్యాణ్.. తమ కర్తవ్యాన్ని నిర్వహిస్తున్న తిరుపతి ఎస్పీ సుబ్బారాయుడు, ఏపీ డీజీపీలను ఉద్దేశించి బెదిరింపు ధోరణిలో మాట్లాడారని మండిపడ్డారు. మీరు బెదిరిస్తే ఎవరూ బెదిరిపోరన్న పవన్ కళ్యాణ్.. అధికారులపై చిన్న గాటు పడినా చూస్తూ ఊరుకోమని హెచ్చరించారు. ఐఏఎస్ అధికారులకు వార్నింగ్ ఇస్తే సుమోటో కేసులు పెడతామని అన్నారు.

మరోవైపు మహిళల భద్రతపైనా మాట్లాడిన పవన్ కళ్యాణ్.. ఈ విషయంలో సమాజంలోని ప్రతి ఒక్కరూ స్వచ్ఛందంగా ముందుకు రావాలని అన్నారు. ఈ క్రమంలోనే ఏపీ కాంగ్రెస్ అధ్యక్షురాలు వైఎస్ షర్మిల భద్రతపైనా పవన్ కళ్యాణ్ కీలక వ్యాఖ్యలు చేశారు. షర్మిల అదనపు భద్రత కావాలని కోరితే కల్పిస్తామని చెప్పారు. అడవుల రక్షణ విషయంలో అటవీశాఖ అధికారులకు పూర్తి స్వేచ్ఛ ఇస్తున్నామని అటవీశాఖ మంత్రి పవన్ కళ్యాణ్ చెప్పారు. అటవీశాఖ అధికారులకు ఎప్పుడూ తన మద్దతు ఉంటుందన్న పవన్.. వారి సేవలను ఎప్పటికీ మరిచిపోలేమన్నారు.

అటవీశాఖలోని అమరవీరుల త్యాగాలను ఎప్పటికీ మరిచిపోలేమన్న పవన్ కళ్యాణ్.. అటవీశాఖ కోసం విరాళం సేకరిస్తానని చెప్పారు. వివిధ వర్గాల నుంచి ఐదు కోట్ల రూపాయలు విరాళం సేకరించి అటవీశాఖకు అందిస్తానని పవన్ కళ్యాణ్ చెప్పారు. అటవీశాఖలోని అమరవీరులకు స్థూపాలు నిర్మిస్తామని.. వారికి గౌరవంగా ఫారెస్ట్ ఆఫీసు బ్లాకులకు వారి పేర్లు పెడతామని పవన్ కళ్యాణ్ వెల్లడించారు. ఇక గంజాయి అక్రమ రవాణాను అడ్డుకునేందుకు ప్రత్యేక కార్యాచరణ రూపొందిస్తామని చెప్పారు.