ఏపీలో రామ్‌గోపాల్‌ వర్మపై వరుసగా కేసులు నమోదు.. కొంపముంచిన ఆ రెండు ట్వీట్‌లు

ఆంధ్రప్రదేశ్ ప్రభుత్వం అభ్యంతరకరమైన సోషల్ మీడియాలో పోస్టులు, ట్వీట్‌ల కఠిన చర్యలు తీసుకుంటోంది. రాష్ట్రవ్యాప్తంగా వరుసగా కేసులు నమోదవుతుండగా.. పలువుర్ని పోలీసులు అరెస్ట్ చేస్తున్నారు. వీరిలో ఎక్కువమంది వైఎస్సార్‌సీపీ సానుభూతిపరులే ఉన్నారు.అయితే తాజాగా సినీ దర్శకుడు రామ్‌గోపాల్ వర్మపైనా కేసు నమోదైంది.. ఒకే రోజు రెండు జిల్లాల్లో పోలీసులు కేసులు ఫైల్ చేశారు.

ప్రకాశం జిల్లాలోని మద్దిపాడు పోలీసు స్టేషన్‌లో రామ్‌గోపాల్ వర్మపై ఐటీ చట్టం కింద కేసు నమోదు అయ్యింది. వ్యూహం సినిమా ప్రమోషన్ల సమయంలో నారా చంద్రబాబు నాయుడు, నారా లోకేష్, బ్రాహ్మణి వ్యక్తిత్వాన్ని కించపరిచేలా పోస్టు చేశారని.. తెలుగుదేశం పార్టీ మద్దిపాడు మండల ప్రధాన కార్యదర్శి రామలింగం రామ్‌గోపాల్ వర్మపై ఫిర్యాదు చేశారు. ఈ మేరకు పోలీసులు కేసు నమోదు చేసి దర్యాప్తు ప్రారంభించారు.

మరోవైపు గుంటూరు జిల్లాలోని తుళ్లూరు పోలీసుల కూడా రామ్‌గోపాల్ వర్మపై కేసు నమోదు చేశారు. చంద్రబాబు నాయుడు, పవన్ కళ్యాణ్, నారా లోకేష్‌లపై అసభ్యకర పోస్టులు పెట్టారని తెలుగుదేశం పార్టీం రైతు విభాగం ఉపాధ్యక్షులు నూతలపాటి రామారావు ఫిర్యాదు చేశారు. వర్మ పై కఠిన చర్యలు తీసుకోవాలని పోలీసులను కోరగా.. తుళ్లూరు పోలీసుల వర్మపై కేసు నమోదు చేశారు.

ఆంధ్రప్రదేశ్‌‌లో సీఎం సహా ప్రజా ప్రతినిధుల ప్రతిష్ఠకు భంగం కలిగేలా, మార్ఫింగ్‌ ఫొటోలతో పాటు అనుచిత వ్యాఖ్యలు చేయడం, అసభ్యకర పోస్టులు పెడుతున్న వారిపై పోలీసులు కేసులు నమోదు చేస్తున్నారు. ఇప్పటికే పలువురిపై కేసులు నమోదు చేసి అరెస్ట్ చేశారు. వైఎస్సార్సీపీ సోషల్ మీడియా సానుభూతిపరులు ఇంటూరి రవి కిరణ్‌, బోరుగడ్డ అనిల్ కుమార్, వర్రా రవీంద్ర రెడ్డితో పాటూ పలువుర్ని పోలీసులు అరెస్ట్ చేసిన సంగతి తెలిసిందే. తాజాగా చంద్రబాబు నాయుడు, పవన్ కళ్యాణ్, నారా లోకేష్, నారా బ్రాహ్మణిల వ్యక్తిత్వాన్ని కించపరిచేలా పోస్టు చేశారని దర్శకుడు రామ్‌గోపాల్ వర్మపై ఫిర్యాదుతో.. పలు పోలీస్ స్టేషన్లలో కేసులు నమోదు చేశారు. ఈ కేసుల అంశంపై వర్మ స్పందించాల్సి ఉంది.