ఈ దున్నపోతు ఖరీదు రూ.23 కోట్లు.. నెలకు రూ.5 లక్షల సంపాదన

ఒక్క దున్నపోతు ఖరీదు రూ.23 కోట్లు అంటే మీరు నమ్ముతారా. అదేంటీ దున్నపోతుకు కోట్ల రూపాయలా అంటూ ఆశ్చర్యపోతున్నారా. అయితే ఆ దున్నపోతు గురించి పూర్తిగా వింటే మాత్రం దానికి అంత ధర పెట్టడంలో తప్పులేదనే అంటారు. అందుకే దాని ఓనర్ కూడా రూ.23 కోట్లు ఇచ్చినా ఆ దున్నపోతును విక్రయించనని చెబుతున్నాడు. దీంతో ఇప్పుడు ఆ దున్నపోతు గొప్పతనం ఏంటి అనేది సర్వత్రా చర్చకు దారి తీస్తోంది. ఆ దున్నపోతు నెలకు రూ.4 నుంచి రూ.5 లక్షలు సంపాదిస్తుండటం గమనార్హం. ఇక ఆ దున్నపోతు తినే మెనూ చూస్తే.. మీరు కచ్చితంగా షాక్ అవుతారు. హర్యానాలోని అన్మో్ల్ అనే దున్నపోతు గురించే ఈ కథ అంతా.

హర్యానాలోని సిర్సాకు చెందిన పల్వీందర్ సింగ్ అనే రైతు ఈ అన్మోల్ దున్నపోతును పెంచుతున్నాడు. దాని వయసు 8 ఏళ్లు. దాని బరువు 1500 కిలోలు. ఇక దాని ధర విషయానికి వస్తే.. రూ.23 కోట్లు ఇస్తానన్నా పల్వీందర్ సింగ్ మాత్రం అమ్మలేదు అంటే దాని ప్రత్యేకత ఏంటో అర్థం చేసుకోవచ్చు. పుష్కర్ మేళా, మీరట్‌లోని ఆల్ ఇండియా ఫార్మర్స్ ఫెయిర్ వంటి ఈవెంట్లలో ఈ అన్మోల్ ప్రత్యేక ఆకర్షణగా నిలుస్తూ ఉంటుంది. అన్మోల్ దున్నపోతు ధర, భారీ ఆకారమే.. దాన్ని వార్తల్లో నిలిచేలా చేస్తోంది. ఇవే కాకుండా అన్మోల్ దున్నపోతు ప్రత్యేకత ఏంటంటే.. దాని నుంచి వచ్చే వీర్యం. ఈ వీర్యం విక్రయించడం ద్వారానే అన్మోల్ దున్నపోతు నుంచి దాని యజమాని భారీగా లాభాలను ఆర్జిస్తున్నాడు.

ఇక ఈ అన్మోల్ దున్నపోతు తినే తిండి చూస్తే కచ్చితంగా నోరెళ్లబెట్టాల్సిందే. ఎందుకంటే అధిక కేలరీలు ఉన్న ఆహార పదార్థాలు, డ్రైఫ్రూట్స్‌ను అన్మోల్ తింటుంది. అన్మోల్ తినే తిండి కోసం నిత్యం రూ.1500 ఖర్చు చేస్తూ ఉంటారు. అంటే నెలకు దాని తిండికే రూ.45 వేల వరకు దాని యజమాని పల్వీందర్ సింగ్ భరిస్తూ ఉంటాడు. అన్మోల్ దున్నపోతు రోజూ 250 గ్రాముల బాదాం, 4 కిలోల దానిమ్మలు, 30 అరటిపండ్లు, 5 లీటర్ల పాలు, 20 గుడ్లను ఆహారంగా తీసుకుంటుంది. వీటితోపాటు ఆయిల్ కేక్, పచ్చి గడ్డి, దేశీ నెయ్యి, సోయాబీన్, మొక్కజొన్నలను కూడా తింటుంది. ఇక రోజుకు రెండుసార్లు ఈ అన్మోల్ దున్నపోతుకు యజమాని పల్వీందర్ సింగ్ స్నానం చేయిస్తూ ఉంటాడు. ఆ సమయంలో బాదాం నూనె, ఆవ నూనెతో మసాజ్ చేస్తూ ఉంటారు.

అయితే ఈ అన్మోల్ దున్నపోతుకు అంత ధర పలకడానికి.. దానికి అంత ఖర్చు పెట్టి పెంచడానికి కారణం దాని వీర్యం కోసమే. ఈ అన్మోల్ దున్నపోతు వీర్యం చాలా ఖరీదైంది, డిమాండ్ కూడా కలిగి ఉంది. వారానికి రెండుసార్లు ఈ అన్మోల్ దున్నపోతు నుంచి వీర్యాన్ని సేకరిస్తూ ఉంటారు. ఇలా ఒక్కసారి తీసిన వీర్యం 300 నుంచి 900 గేదెలకు సరిపోతుందని పల్విందర్ సింగ్ తెలిపాడు. అయితే ఒక్కో గేదెకు రూ.250 చొప్పున విక్రయిస్తున్నాడు. దీంతో దీని వీర్యంతోనే ప్రతి నెలా రూ.4-5 లక్షలు సంపాదిస్తున్నాడు. అంత ధర, డిమాండ్‌కు కారణం ఈ అన్మోల్ దున్నపోతు వీర్యానికి ఉన్న నాణ్యత. అయితే ఇంత డబ్బును తెచ్చిపెడుతున్న అన్మోల్ దున్నపోతును ఎట్టి పరిస్థితుల్లో అమ్మేది లేదని పల్విందర్ సింగ్ తేల్చి చెబుతున్నాడు.