కడప కలెక్టరేట్‌ వద్ద టెంకాయలు కొట్టిన షర్మిల

ఏపీ కాంగ్రెస్ చీఫ్ వైఎస్ షర్మిల ఏం చేసినా వినూత్నంగా ఉంటుంది. నిరసనల దగ్గర నుంచి ర్యాలీల వరకూ విభిన్నంగా ఆలోచిస్తూ.. సమస్యను ప్రజల్లోకి తీసుకెళ్లేలా, చైతన్యం కల్గించే ప్రయత్నం చేస్తుంటారు. తాజాగా బుధవారం కడప కలెక్టర్ కార్యాలయం వద్ద కడప స్టీల్ ఫ్యాక్టరీ కోసం వైఎస్ షర్మిల వినూత్నంగా నిరసన వ్యక్తం చేశారు. కడప స్టీల్ ఫ్యాక్టరీ నిర్మాణం చేపట్టాలంటూ టెంకాయ కొట్టి నిరసన వ్యక్తం చేశారు. కడప స్టీల్ అంటే కొబ్బరి కాయలు కొట్టే ప్రాజెక్టుగా చూస్తున్నారనే ఉద్దేశంతో టెంకాయలు కొట్టి వైఎస్ షర్మిల నేతృత్వంలోని కాంగ్రెస్ శ్రేణులు నిరసన వ్యక్తం చేశాయి.

అనంతరం మీడియాతో మాట్లాడిన షర్మిల.. కేవలం టెంకాయలు కొట్టే ఫ్యాక్టరీగానే కడప స్టీల్ ఫ్యాక్టరీని గత పాలకులు తయారు చేశారని విమర్శించారు. పేద ప్రజల కోసం, కడప ప్రాంతం అభివృద్ధి చెందడం కోసం వైఎస్ రాజశేఖర్ రెడ్డి కడప స్టీల్ ప్లాంట్ తీసుకువచ్చారని షర్మిల గుర్తు చేశారు. పదివేల ఎకరాల్లో రూ.20 వేల కోట్ల పెట్టుబడితో 20 మిలియన్ టన్నుల సామర్థ్యం కలిగిన స్టీల్ ప్లాంట్ నిర్మించాలనేదే రాజశేఖర్ రెడ్డి ఆశయమని వైఎస్ షర్మిల చెప్పారు. కడప స్టీల్ ఫ్యాక్టరీ నిర్మాణం పూర్తి అయితే 25 వేల మందికి ప్రత్యక్షంగా, పరోక్షంగా ఉపాధి అవకాశాలు దక్కుతాయని.. ఇంతటి కీలకమైన ప్రాజెక్టు కావున అప్పటి కేంద్ర ప్రభుత్వం కూడా సెయిల్ ద్వారా స్టీల్ ఫ్యాక్టరీ నిర్మించాలని విభజన హామీల్లో పేర్కొందని వైఎస్ షర్మిల గుర్తు చేశారు. అయితే ముఖ్యమంత్రులు మారడం, కొబ్బరి కాయలు కొట్టడం ఇదే తంతుగా టీడీపీ, వైసీపీ ప్రభుత్వాలు కడప స్టీల్ ప్లాంట్ నిర్మాణం అంశాన్ని తయారు చేశారని వైఎస్ షర్మిల మండిపడ్డారు.

మరోవైపు కడప స్టీల్ ఫ్యాక్టరీ కోసం తొలుత వైఎస్ రాజశేఖర్ రెడ్డి హయాంలో శంకుస్థాపన జరిగింది. ఆ తర్వాత నారా చంద్రబాబు నాయుడు కూడా కడప స్టీల్ ప్లాంట్ కోసం శంకుస్థాపన చేశారు. ఇక 2019 ఎన్నికల్లో గెలిచి అధికారంలోకి వచ్చిన వైఎస్ జగన్ మోహన్ రెడ్డి.. స్టీల్ ప్లాంట్ నిర్మాణాన్ని మూడేళ్లలో పూర్తిచేస్తామంటూ2019లో మరోసారి శంకుస్థాపన చేశారు. స్టీల్ ప్లాంట్ నిర్మాణ బాధ్యతలను సజ్జన్ జిందాల్‌కు చెందిన జేఎస్‌డబ్య్లూ కంపెనీకి అప్పగించారు. ఆ తర్వాత 2023 ఫిబ్రవరి 15న మరోసారి భూమి పూజ కూడా చేశారు. మూడేళ్ల గడువును పొడిగించారు. అయితే స్టీల్ ప్లాంట్ నిర్మాణం దిశగా అడుగులు ముందుకు పడటం లేదు. ఈ నేపథ్యంలోనే వైఎస్ షర్మిల వ్యంగ్యంగా టెంకాయలు కొట్టి నిరసన వ్యక్తం చేశారు.