ఐపీఎల్‌లోకి సిక్కోలు కుర్రాడు.. ఢిల్లీ కేపిటల్స్‌ టీమ్‌లోకి ఆల్‌రౌండర్ విజయ్

సిక్కోలు జిల్లా కుర్రాడు ఐపీఎల్‌లోకి ఎంట్రీ ఇవ్వబోతున్నాడు. టెక్కలికి చెందిన త్రిపురాన విజయ్‌‌ను.. ఐపీఎల్ మెగా వేలంలో ఢిల్లీ కేపిటల్స్ టీమ్‌ రూ.30 లక్షలకు కొనుగోలు చేసింది. ఈ యువ ఆల్‌రౌండర్‌ అటు ఏపీఎల్‌తో పాటుగా ఇటు రంజీ మ్యాచ్‌ల్లోనూ రాణిస్తూ ఇప్పుడు ఐపీఎల్‌లో ఛాన్స్ దక్కించుకున్నాడు. విజయ్‌ను, కుటుంబ సభ్యుల్ని కేంద్రమంత్రి రామ్మోహన్‌నాయుడు అభినందించారు. 'శ్రీకాకుళం జిల్లా నుంచి ఐపీఎల్‌కు ఎంపికైన త్రిపురాన విజయ్‌కు హృదయపూర్వక శుభాకాంక్షలు. మీ ప్రయాణం చాలా మందికి స్ఫూర్తిదాయకం. ఈ కొత్త అధ్యాయంలో మీరు విజయం సాధించాలని కోరుకుంటున్నాను-శ్రీకాకుళం గర్వపడేలా కష్టపడండి' అంటూ ట్వీట్ చేశారు.

తమ కుమారుడు విజయ్‌ ఐపీఎల్‌కు ఎంపిక కావడం ఎంతో ఆనందంగా ఉందంటున్నారు తల్లిదండ్రులు లావణ్య, వెంకట కృష్ణంరాజు. తమకు ఎంతో గర్వంగా ఉందని.. ఆ దేవుడు శ్రమకు తగిన ఫలితాన్ని అందించాడన్నారు. ఐపీఎల్‌లోకి ఎంట్రీ ఇవ్వడం ఆనందంగా ఉందని.. తన కల నిజమైందన్నారు. తనను టీమ్‌లోకి తీసుకున్న ఢిల్లీ కేపిటల్స్ యాజమాన్యానికి ధన్యవాదాలు తెలిపారు. తనకు టీమ్‌లో అవకాశం ఇస్తే నిరూపించుకుంటానని.. ఈ నాలుగు నెలలు బాగా ప్రాక్టీస్ చేస్తానన్నారు. తనను ఎంతగానో ప్రోత్సహించిన తల్లిదండ్రులు, జిల్లా క్రికెట్‌ సంఘం, ఆంధ్రా క్రికెట్‌ సంఘ పెద్దలకు కృతజ్ఞతలు తెలిపారు.

శ్రీకాకుళం జిల్లా టెక్కలిలోని అయ్యప్పనగర్‌లో ఉంటున్న త్రిపురాన వెంకటకృష్ణరాజు, లావణ్యల కుమారుడు విజయ్‌. తండ్రి సమాచారశాఖలో ఉద్యోగిగా పని చేస్తున్నారు. విజయ్‌ టెక్కలిలోని ఓ డిగ్రీ కాలేజీలో ఫస్టియర్ చదువుతున్నాడు.. చిన్నప్పటి నుంచి క్రికెట్‌పై ఇష్టంతో ప్రాక్టీస్ చేశాడు. 2013–14లో అరంగ్రేటం చేసి.. అంతర్‌ జిల్లాల నార్త్‌జోన్‌ అండర్‌–14 జట్టుకు ప్రాతినిధ్యం వహించాడు. టాపార్డర్‌ బ్యాటింగ్‌తోపాటు ఆఫ్‌స్పిన్‌‌తో రాణించాడు. విజయ్ గత పదేళ్లుగా క్రికెట్ ఆడుతుండగా.. గత మూడేళ్లుగా బాగా రాణిస్తున్నాడు. విజయ్‌ పదేళ్లుగా క్రికెట్‌ ఆడుతున్నా.. గత మూడే ళ్లుగా నిలకడ చూపిస్తున్నాడు. రంజీ, కుచ్‌బిహార్‌ ట్రోఫీ, విజయ్‌హజారే ట్రోఫీ, సయ్యద్‌ ముస్తాక్‌ ఆలీ క్రికెట్‌ టోర్నీలో రాణించడంతో బీసీసీఐ పెద్దల దృష్టిని ఆకర్షించి ఐపీఎల్ వేలంలో ఢిల్లీ టీమ్‌కు వెళ్లాడు.

అండర్‌–19లో ఏసీఏ నార్త్‌జోన్‌ టోర్నీలో 6 మ్యాచ్‌లు ఆడి.. 265 పరుగులు, 19 వికెట్లు తీసి బెస్ట్ ఆల్‌రౌండర్‌గా నిరూపించుకున్నాడు. అంతర్రాష్ట్ర అండర్‌–25 వన్డే క్రికెట్‌ టోర్నీలో.. హైదరాబాద్‌తో జరిగిన మ్యాచ్‌లో 4.4 ఓవర్లలో కేవలం 14 పరుగులిచ్చి 6 వికెట్లు పడగొట్టాడు. 2021–22లో అంతర్రాష్ట్ర అండర్‌–23 క్రికెట్‌ టోర్నీలో రాణించి.. బెంగళూరు నేషనల్‌ క్రికెట్‌ అకాడమీకి ఎంపికై శిక్షణ కూడా పొందారు. త్రిపురాన విజయ్.. 2022–23, 2024–25 రెండు సీజన్లలో ఆంధ్ర రంజీ టీమ్‌కు ఎంపికయ్యాడు.

అలాగే ఏపీఎల్‌ (ఆంధ్ర ప్రీమియం లీగ్) టీ–20 క్రికెట్‌ పోటీల్లో మూడు సీజన్లలో విజయ్ రాణించాడు. రాయలసీమ కింగ్స్‌పై జరిగిన మ్యాచ్‌లో 25 బంతుల్లో 63 రన్స్ చేశాడు.. బౌలింగ్‌లో రాణించి ప్లేయర్‌ ఆఫ్‌ ద మ్యాచ్‌ అవార్డును అందుకున్నారు. అలాగే విదర్భపై తన మొదటి మ్యాచ్‌లోనే నాలుగు కీలక వికెట్లు తీశాడు.. హైదరాబాద్‌ ఉప్పల్‌ స్టేడియంలో జరిగిన మ్యాచ్‌లో మొదటి ఇన్నింగ్స్‌లో ఐదు వికెట్లు పడగొట్టాడు. విజయ్ ఆల్ రౌండర్‌గా రాణిస్తూ ఇప్పుడు ఐపీఎల్‌లోకి ఎంట్రీ ఇస్తున్నాడు.

తూర్పుగోదావరి జిల్లాకు చెందిన మరో యంగ్ బౌలర్ పీవీ సత్యనారాయణరాజు ఐపీఎల్‌లో ఎంట్రీకి సిద్ధమయ్యాడు. రాజును ముంబై ఇండియన్స్ టీమ్ రూ.30 లక్షలకు కొనుగోలు చేసింది. రాజుది బీఆర్‌ అంబేద్కర్‌ కోనసీమ జిల్లా మామిడికుదురు మండలం గోగన్నమఠం. వీరి కుటుంబం పదిహేనేళ్లుగా కాకినాడ వెంకట్‌నగర్‌లో ఉంటున్నారు. తండ్రి రమేష్‌రాజు రొయ్యల వ్యాపారి.. అమ్మ రాఖి గృహిణి. వీరి చిన్నకుమారుడు పాండురంగరాజు కూడా క్రికెటరే కావడం విశేషం. రాజుకు గతేడాది రెండు రంజీమ్యాచ్‌లు ఆడేందుకు అవకాశం రాగా.. ఈ ఏడాది సయ్యద్‌ ముస్తాక్‌ అలీఖాన్‌ జట్టు తరపున ఆంధ్రా నుంచి ఆడాడు. అలాాగే విశాఖకు చెందిన పైలా అవినాష్‌‌ను పంజాబ్ కింగ్స్ రూ.30లక్షలకు కొనుగోలు చేసింది.