స్కూళ్లు, కాలేజీలు బంద్.. బంగాళాఖాతంలో వాయుగుండం, తుఫాను హెచ్చరికలు

ఇప్పటికే తమిళనాడు రాష్ట్రంలో భారీగా వర్షాలు కురుస్తున్న వేళ.. బంగాళాఖాతంలో ఏర్పడిన వాయుగుండం మరింత బలపడటంతో భారీ వర్షాలు కురిసే అవకాశాలు ఉన్నట్లు భారత వాతావరణ శాఖ తెలిపింది. నైరుతి బంగాళాఖాతంలో ఏర్పడిన అల్ప పీడనం రానున్న 12 గంటల్లో ఫెంగాల్ తుపానుగా మారే అవకాశాలు ఉన్నాయని పేర్కొంది. దీని ప్రభావంతో తమిళనాడు, పుదుచ్చేరిలో భారీ నుంచి అతి భారీ వర్షాలు కురిసే అవకాశాలు ఉన్నాయని వెల్లడించింది. ఈ తుఫానుకు ఫెంగాల్ అని సౌదీ అరేబియా సూచించిన పేరును పెట్టారు. ఈ ఫెంగాల్ తుఫాను నేపథ్యంలో నాగపట్టణం, మయిలదుతురై, తిరువరూర్ జిల్లాలకు రెడ్ అలర్ట్ జారీ చేశారు.

నైరుతి బంగాళాఖాతంలో ఏర్పడిన ఈ అల్పపీడనం.. తూర్పు నుంచి నైరుతి వైపు గంటకు 13 కిలోమీటర్ల వేగంతో కదులుతున్నట్లు వాతావరణ శాఖ అధికారులు పేర్కొన్నారు. ఈ అల్పపీడనం రానున్న 2 రోజుల్లో శ్రీలంక తీరాన్ని దాటి తమిళనాడు తీరం వైపు ఉత్తర-వాయువ్య దిశగా కదులుతూ ఉంటుందని ఐఎండీ హెచ్చరించింది. ఈ నేపథ్యంలోనే స్పందించిన తమిళనాడు ముఖ్యమంత్రి ఎంకే స్టాలిన్.. ఎలాంటి పరిస్థితులనైనా ఎదుర్కొనేందుకు రాష్ట్ర ప్రభుత్వం సిద్ధంగా ఉందని తేల్చి చెప్పారు. అయితే బయటికి వెళ్లేటపుడు జాగ్రత్తగా ఉండాలని ప్రజలకు సీఎం స్టాలిన్ సూచించారు.

దీని ప్రభావంతో భారీ వర్షాలకు తోడు ఈదురు గాలులు కూడా వీస్తాయని ఐఎండీ అధికారులు వెల్లడించారు. ఫెంగాల్ తుఫాను నేపథ్యంలో తమిళనాడులోని వివిధ జిల్లాల్లో స్కూళ్లు, కాలేజీలను మూసివేశారు. ఇక ఎన్‌డీఆర్‌ఎఫ్‌ బృందాలను రంగంలోకి దించి.. సహాయక చర్యలు చేపట్టారు. బుధవారం నుంచి గురువారం వరకు తమిళనాడు, పుదుచ్చేరిలోని పలు ప్రాంతాల్లో భారీ నుంచి అతి భారీ వర్షాలు కురిసే అవకాశం ఉందని హెచ్చరికలు జారీ చేశారు. తుపాను నేపథ్యంలో ఎన్‌డీఆర్‌ఎఫ్‌లోని 4వ బెటాలియన్‌కు చెందిన 7 బృందాలు తీరప్రాంతాల్లో మోహరించాయి. కారైకాల్, తంజావూరు, కడలూరు, నాగపట్నం, తిరువారూరు, మైలాడుతురై జిల్లాల్లో బలగాలు సిద్ధంగా ఉన్నాయని ఎన్‌డీఆర్‌ఎఫ్ తెలిపింది.

 ఇక ఈ అల్పపీడనం కారణంగా మంగళవారం ఉదయం నుంచి చెన్నైతోపాటు దాని పరిసర జిల్లాల్లో భారీ వర్షాలు పడుతున్నాయి. ఈ నేపథ్యంలోనే బుధవారం నుంచి శుక్రవారం వరకు చెన్నైలో ఎల్లో అలర్ట్ జారీ చేయగా.. బుధవారం నుంచి శనివారం వరకు కాంచీపురం, తిరువళ్లూరు, చెంగల్పట్టుతో సహా పలు జిల్లాలలో ఆరెంజ్, ఎల్లో అలర్ట్ జారీ చేశారు. భారీ వర్షాల నేపథ్యంలో చెన్నై, నాగపట్నం, మైలదుత్తురై, తిరువారూర్‌తో సహా తమిళనాడులోని 9 జిల్లాల్లో పాఠశాలలు, కళాశాలలను మూసివేస్తున్నట్లు ప్రభుత్వం ప్రకటించింది.