ఏపీలో స్కూల్ విద్యార్థులకు హోలిస్టిక్ కార్డులు.. క్యూఆర్ కోడ్‌తో సరికొత్తగా

ఆంధ్రప్రదేశ్ ప్రభుత్వం స్కూల్ విద్యార్థులకు హోలిస్టిక్‌ కార్డులు (సమగ్ర ప్రగతి పత్రాలు) ఇవ్వాలని నిర్ణయం తీసుకుంది. గతంలో ప్రోగ్రెస్‌ కార్డులు ఇచ్చేవారు.. వాటిలో కొన్ని మార్పు చేసి హోలిస్టిక్ కార్డులు రూపొందించారు. ఇకపై అన్ని ప్రభుత్వ పాఠశాలల విద్యార్థులకు అందజేస్తారు.. ఈ మేరకు పాఠశాల విద్యాశాఖ నిర్ణయించింది. ఈ కార్డుల్లో లోపలి పేజీలో క్యూఆర్‌ కోడ్‌ను ముద్రించారు.. విద్యార్థి అభిరుచులు, ఆసక్తి, విద్యాపరమైన సామర్థ్యాలు.. సవాళ్లను 6 నెలలకోసారి ఈ కార్డుల్లో నమోదు చేస్తారు. అలాగే విద్యార్థి బ్లడ్‌ గ్రూప్, ఎత్తు, బరువు, బీఎంఐ వంటి అంశాలు నమోదు చేయాల్సి ఉంది. హోలిస్టిక్‌ కార్డులతో విద్యార్థులకు ఎంతగానో ఉపయోగపడతాయంటున్నారు.

మరోవైపు రాష్ట్రంలో ప్రభుత్వ పాఠశాలలకు స్టార్‌ రేటింగ్‌ ఇవ్వాలని విద్యా శాఖ నిర్ణయం తీసుకుంది. స్కూళల్లో మౌలిక సదుపాయాలు, విద్యార్థుల అభ్యసన సామర్థ్యాలను బట్టి ఈ రేటింగ్స్‌ను రెండు రకాలుగా ఇస్తారు. ఒకటి నుంచి ఐదు వరకు స్టార్లు ఇస్తారు.. ఈ విధానం ద్వారా తక్కువ స్టార్లు సాధించిన స్కూళ్లపై దృష్టిపెట్టి వాటిని అభివృద్ధి చేస్తారు. రాష్ట్రవ్యాప్తంగా డిసెంబరు 7న నిర్వహించనున్న తల్లిదండ్రులు-ఉపాధ్యాయుల మెగా సమావేశాల నాటికి ఈ ప్రక్రియ పూర్తి చేయాలని భావిస్తున్నారు. విద్యార్థుల అటెండెన్స్, టీచర్లు, టెన్త్ క్లాస్ ఉత్తీర్ణత, 1 నుంచి 9వ తరగతి విద్యార్థులు సాధించిన మార్కుల ఆధారంగా అకడమిక్‌ స్టార్‌ రేటింగ్‌ ఇస్తారు. స్కూళ్లో విద్యుత్, డిజిటల్‌ సదుపాయం, తరగతి గదులు, ప్రహరీ, తాగునీరు, ఫర్నీచర్,లైబ్రరీ, మరుగుదొడ్లు వంటి సౌకర్యాల ఆధారంగా కూడా రేటింగ్ ఇవ్వాలి.

వచ్చే నెల 7న జరిగే విద్యార్థుల తల్లిదండ్రులు-ఉపాధ్యాయుల సమావేశాలకు సంబంధించి.. తల్లిదండ్రులను ఆహ్వానించేందుకు ప్రత్యేక ఆహ్వాన పత్రికను రూపొందించడంతోపాటు వారి ఫోన్లకు మెసేజ్‌లు పంపిస్తున్నారు. ఈ సమావేశంలో విద్యార్థుల చదువు, మార్కులు, ప్రవర్తనపై ఉపాధ్యాయులు వారి తల్లిదండ్రులకు వివరిస్తారు. ఒకవేళ ఎవరైనా చదువులో వెనుకబడి ఉంటే.. బాగా చదివి మళ్లీ మెరుగయ్యేలా ఇంటి దగ్గర తీసుకోవాల్సిన జాగ్రత్తలను టీచర్లు సూచిస్తారు. తల్లిదండ్రులకు ఆటల పోటీలు నిర్వహించి.. ఆ తర్వాత విద్యార్థులు, ఉపాధ్యాయులు కలిసి భోజనం చేయనున్నారు. విద్యార్థులకు ప్రాథమికంగా స్క్రీనింగ్‌ పరీక్షలు నిర్వహించి, ఆరోగ్య కార్డులు ఇస్తారు.