ప్రొఫెసర్ అన్యమత ప్రచారం వార్తలు.. సీన్‌లోకి బజరంగ్ దళ్.. ఎస్వీ యూనివర్సిటీలో ఉద్రిక్తత

తిరుపతి శ్రీ వెంకటేశ్వర విశ్వవిద్యాలయంలో సోమవారం ఉద్రిక్తత తలెత్తింది. ఎస్వీ యూనివర్సిటీలో చెంగయ్య అనే ప్రొఫెసర్ అన్యమత ప్రచారం చేస్తున్నారంటూ వార్తలు వచ్చాయి. ఎస్వీ యూనివర్సిటీలోని ఇంజనీరింగ్ విభాగానికి చెందిన డిపార్ట్‌మెంట్ హెడ్ చెంగయ్య.. తరగతి గదిలో అన్యమత ప్రచారం చేస్తున్నారంటూ ఓ ఆడియో లీకైంది. ఈ ఆడియో సోషల్ మీడియాలో వైరల్ కావటంతో బజరంగ్ దళ్ కార్యకర్తలు యూనివర్సిటీలో ఆందోలనకు దిగారు. చెంగయ్యపై ఎస్వీ యూనివర్సిటీ వైస్ ఛాన్సలర్‌కు ఫిర్యాదు చేశారు. అనంతరం ఇంజనీరింగ్ డిపార్ట్‌మెంట్‌లోకి వెళ్లిన బజరంగ్‌ దళ్ కార్యకర్తలు.. అన్యమత ప్రచారంపై ఆయనను నిలదీశారు. ఈ సందర్భంగా కాస్త ఉద్రిక్త వాతావరణం తలెత్తింది.

బజరంగ్ దళ్ కార్యకర్తలు, ప్రొఫెసర్ చెంగయ్య మధ్య కాసేపు వాగ్వాదం నడిచింది. తాను విద్యార్థులను సన్మార్గంలో నడవాలని మాత్రమే చెప్పినట్లు ప్రొఫెసర్ చెప్తున్నారు. అయితే ఇదే సమయంలో ఆయన టేబుల్ మీద అన్యమతానికి చెందిన పుస్తకం లభించడంతో.. బజరంగ్ దళ్ కార్యకర్తలు మండిపడ్డారు. దీనికి సమాధానం ఏం చెప్తారంటూ నిలదీశారు. అనంతరం చెంగయ్యను డిపార్ట్‌మెంట్ బయటకు లాక్కొని వచ్చేందుకు బజరంగ్ దళ్, విద్యార్థి సంఘం నాయకులు ప్రయత్నించడంతో ఎస్వీ యూనివర్సిటీలో ఉద్రిక్త పరిస్థితులు తలెత్తాయి. చెంగయ్యపై స్థానిక పోలీస్ స్టేషన్‌లోనూ ఫిర్యాదు చేశారు. మరోవైపు యూనివర్సిటీలో అన్యమత ప్రచారం వార్తలపై హిందూ ధార్మిక సంఘాలు కూడా మండిపడుతున్నాయి. ఇలాంటి ఘటనలు పునరావృతం కాకుండా చర్యలు తీసుకోవాలని కోరుతున్నాయి.

మరోవైపు తిరుమల కొండపై కూడా అప్పడప్పుడూ అన్యమత ప్రచారం వార్తలు వస్తుంటాయి. ఇటీవలే అన్యమతానికి చెందిన వ్యాఖ్యలు ఉన్న కారు తిరుమల కొండపై కలకలం రేపిన సంగతి తెలిసిందే. అలిపిరి చెక్ పాయింట్ వద్ద నిత్యం తనిఖీలు నిర్వహిస్తుంటారు. అన్యమతానికి చెందిన పుస్తకాలు సహా ఇతరత్రా ఏవీ కొండపైకి రాకుండా జాగ్రత్తలు తీసుకుంటూ ఉంటారు. అయితే అలిపిరి చెక్ పోస్టు దాటుకుని మరీ కొండపైకి కారు రావటం.. అది కూడా శ్రీవారి ఆలయానికి సమీపంలో పార్కింగ్ చేయడం కలకలం రేపింది. దీనిపై విజిలెన్స్ విచారణ కూడా జరిగినట్లు సమాచారం. ఇప్పుడు ఎస్వీ యూనివర్సిటీలో అన్యమత ప్రచారం వార్తలు రావటంతో హిందూ సంఘాలు మండిపడుతున్నాయి.