రెండు కేసుల్లో దోషిగా తేలిన కుమారుడికి క్షమాభిక్ష.. జో బైడెన్ సంచలన నిర్ణయం

మరికొద్ది రోజుల్లో పదవి నుంచి దిగిపోనున్న అమెరికా అధ్యక్షుడు జో బైడెన్‌ సంచలన నిర్ణయం తీసుకున్నారు. రెండు కేసుల్లో దోషిగా నిర్దారణ అయిన తన కుమారుడు హంటర్‌ బైడెన్‌కు క్షమాభిక్ష ప్రసాదించి.. భారీ ఉపశమనం కలిగించారు. అక్రమంగా ఆయుధం కొనుగోలు సహా రెండు క్రిమినల్‌ కేసుల్లో హంటర్‌ విచారణ ఎదుర్కొన్నారు. అయితే, ఈ కేసులు రాజకీయ ప్రేరేపితమైనవేనని జో బైడెన్‌ వ్యాఖ్యానించారు. అయితే, ఓ తండ్రిగా, అధ్యక్షుడిగా తాను తీసుకున్న నిర్ణయాన్ని అమెరికా ప్రజలు అర్థం చేసుకుంటారని భావిస్తున్నాని ఆయన పేర్కొన్నారు.

‘అమెరికా ప్రజలకు నిజాన్ని చెప్పాలి .. నా జీవితం మొత్తంలో నేను పాటిస్తున్న సూత్రం ఇదే... న్యాయశాఖ నిర్ణయాల్లో జోక్యం చేసుకోబోనని అధ్యక్షుడిగా బాధ్యతలు చేపట్టిన మొదటిరోజే చెప్పాను.. ఆ మాటకు నేను కట్టుబడి ఉన్నా... నా కుమారుడు హంటర్‌ను అన్యాయంగా విచారించే సమయంలోనూ నేను చూస్తూ ఉండిపోయా. రాజకీయ కుట్రలో భాగంగానే కేసులు పెట్టారు... ఇంత వరకూ జరిగింది చాలు. ఈ కేసుల్లో అతడికి క్షమాభిక్ష ప్రసాదించాలని నిర్ణయించుకున్నా... ఒక తండ్రిగా, అధ్యక్షుడిగా ఈ నిర్ణయం ఎందుకు తీసుకున్నానో అమెరికా ప్రజలు అర్థం చేసుకుంటారని భావిస్తున్నా’ అని బైడెన్ ఉద్వేగానికి గురయ్యారు.

ఈ ఏడాది జూన్‌లో హంటర్‌ దోషిగా నిర్దారణ అయినప్పుడు క్షమాభిక్షకు యత్నించబోనని స్పష్టంగా చెప్పి బైడెన్‌.. తాజాగా ఈ నిర్ణయం తీసుకోవడం చర్చనీయాంశం అవుతోంది. 2018లో తుపాకీ కొనుగోలు సందర్భంగా ఆయుధ డీలరుకు హంటర్‌ తప్పుడు సమాచారం ఇచ్చారు. తాను అక్రమంగా డ్రగ్స్‌ కొనలేదని, వాటికి బానిస కాలేదని, తనవద్ద అక్రమంగా ఆయుధం లేదని ఆయన వెల్లడించారు. అయితే దర్యాప్తులో మాత్రం అసలు విషయం బయటపడింది. హంటర్‌ డ్రగ్స్‌ అక్రమంగా కొనుగోలు చేసి.. వాటికి బానిసగా మారినట్టు తేలింది. అలాగే, కాలిఫోర్నియాలో 1.4 మిలియన్‌ డాలర్ల పన్ను ఎగవేత ఆరోపణలపై కూడా కేసు నమోదైంది.

అక్రమ ఆయుధం కొనుగోలు కేసులో ఈ ఏడాది జూన్‌లో న్యాయస్థానం దోషిగా తేల్చింది. అయితే ఇప్పటివరకు శిక్ష ఖరారు చేయలేదు. బుధవారం శిక్ష ఖరారుపై నిర్ణయం తీసుకునే అవకాశం ఉంది. దీనిపై అప్పట్లో జో బైడెన్‌ స్పందిస్తూ.. తీర్పును అంగీకరిస్తున్నట్లు తెలిపారు. ఈ కేసులో తాను కుమారుడి తరఫున క్షమాభిక్ష కోరబోనని ప్రకటించారు. కానీ, అధ్యక్ష పీఠం నుంచి దిగిపోయే సమయంలో కుమారుడికి క్షమాభిక్ష ప్రసాదించే అవకాశాన్ని బైడెన్‌ వినియోగించుకోవడం గమనార్హం.

కాగా, హంటర్ బైడెన్ మాట్లాడుతూ.. ‘నా వ్యసనం చీకటి రోజులలో నేను నా తప్పులను అంగీకరించాను.. దానికి పూర్తి బాధ్యత వహించాను.. రాజకీయ కుట్రలో భాగంగా నన్ను, నా కుటుంబాన్ని బహిరంగంగా అవమానించడానికే తప్పుడు కేసులు పెట్టారు’ అని అన్నారు.