వర్చువల్ క్యూలోకి ఆలస్యంగా వస్తోన్న భక్తులు.. మరింత కఠినంగా శబరిమల రూల్స్

మశబరిమల అయ్యప్ప స్వామి దర్శనం కోసం టైమ్‌స్లాట్ టోకెన్లు పొందిన భక్తులు.. సమయ పాలన పాటించకపోవడంపై ట్రావెన్‌కోర్ దేవస్థానం బోర్డు తీవ్రంగా పరిగణించింది. వర్చువల్ క్యూలైన్‌లోకి భక్తులు ఆలస్యంగా రావడంతో దర్శన ఏర్పాట్లపై తీవ్ర ప్రభావం చూపుతుంది. ఈ సమస్యను పరిష్కరించడానికి పోలీసుల సూచనలు తప్పనిసరిగా అనుసరించాలనే హెచ్చరికలను వర్చువల్ క్యూ టిక్కెట్‌లలో స్పష్టంగా తెలియజేయడం,. టీడీబీ వెబ్‌సైట్‌లో ప్రదర్శించడంతో పాటు హెచ్చరికలను ఎస్ఎంఎస్ ద్వారా పంపడాన్ని కూడా పరిశీలిస్తోంది.

సుదూర ప్రాంతాల నుంచి వచ్చే యాత్రికులకు టైమ్‌స్లాట్‌ విషయంలో కొంత వెసులుబాటు కల్పించే ప్రయత్నాలు చేసినప్పటికీ.. ఆలస్యంగా కూలైన్‌లోకి వచ్చే భక్తుల సంఖ్య పెరగడం సమస్యగా మారింది. రోజువారీ దర్శనాల సంఖ్య 90 వేలకు మించకూడదని పోలీసులు పునరుద్ఘాటిస్తున్నారు. భక్తుల సంఖ్య 80 వేలు దాటితే శరంగుత్తి వరకూ క్యూలైన్ పెరిగిపోతుంది. ఇంకా, దీనికి మించితే మారక్కొటం వరకూ భక్తులు బారులు తీరుతున్నారు. ఇలాంటి సమయంలో పంప, నిలక్కల్ వద్దే భక్తులను నిలిపివేయాల్సి వస్తుందని టీడీబీ అధ్యక్షుడు పీఎస్ ప్రశాంత్ తెలిపారు.

వర్చువల్ క్యూలో కొత్త సూచనలను అమలు చేయడానికి బుకింగ్ వ్యవస్థను తాత్కాలికంగా నిలిపివేసే అంశాన్ని బోర్డు పరిశీలిస్తోంది. ఏది ఏమైనప్పటికీ, ఇది రియల్ టైమ్ బుకింగ్ కౌంటర్‌లను కూడా ప్రభావితం చేస్తుంది. ప్రస్తుతం పంపా సహా మూడు కేంద్రాలలో స్పాట్ బుకింగ్ కేంద్రాలు 24 గంటలూ పనిచేస్తున్నాయి. వర్చువల్ టోకెన్ల జారీ నిలిపివేస్తే వీటిపై ఒత్తిడి పెరుగుతుంది.

మరోవైపు, శబరిమల: డోలీ సేవకు ప్రీపెయిడ్ విధానాన్ని ప్రవేశపెట్టాలన్న బోర్డు నిర్ణయాన్ని నిరసనగా చేపట్టిన సమ్మెను కార్మికులు విరమించారు. శబరిమల ఏడీఎం అరుణ్ ఎస్.నాయర్, డోలీ కార్మికుల ప్రతినిధులు జరిపిన చర్చలు ఫలించాయి. సంప్రదింపులు జరపకుండా ప్రీపెయిడ్ డోలీ సర్వీసును అమలు చేయబోమని అధికారులు హామీ ఇవ్వడంతో సమ్మె విరమిస్తున్నట్లు కార్మికుల ప్రతినిధులు వెల్లడించారు.

శబరిమలలో మొత్తం 1,576 మందికిపైగా డోలీ కార్మికులు అన్నారు. ఇక, . 80 కిలోల వరకు రూ.4 వేలు, 100 కిలోల వరకు రూ.5 వేలు, 100 కిలోలపైబడితే రూ.6 వేలు వసూలు చేయాలని టీడీబీ ప్రతిపాదిస్తోంది. ఒక్కో సేవకు అదనంగా రూ.250 వసూలు చేయాలని బోర్డు యోచిస్తోంది. అయితే, ఇది ఏకపక్ష నిర్ణయమని డోలీ కార్మికులు ఆరోపిస్తూ ఆందోళనకు దిగారు. అటు, ఫెంగల్ తుఫాను ప్రభావంతో కేరళలో భారీ వర్షాలు కురుస్తున్నాయి. ఈ నేపథ్యంలో అయ్యప్ప భక్తులను అటవీ మార్గాలు, నదుల్లో స్నానాలను తాత్కాలికంగా నిషేధిస్తున్నట్టు అధికారులు తెలిపారు.