వరల్డ్స్ టాప్-100 నగరాల్లో తొలిస్థానంలో పారిస్.. భారత్ నుంచి ఒకే సిటీ

ప్రపంచంలోని అత్యంత ఆకర్షణీయమైన వంద నగరాల జాబితా-2024 విడుదలైంది. ఇందులో భారత్‌ నుంచి ఒకే ఒక్క నగరానికి చోటు దక్కింది. ఇక ఇప్పటికే గత 3 ఏళ్లుగా టాప్-1లో ఉన్న ఫ్రాన్స్ రాజధాని పారిస్ నిలిచింది. వరుసగా నాలుగోసారి కూడా పారిస్ తొలి స్థానాన్ని నిలబెట్టుకుంది. 1.7 కోట్ల మందికిపైగా ఇన్‌బౌండ్‌ అరైవల్స్‌తో మొదటి స్థానాన్ని దక్కించుకుంది. డాటా అనలిటిక్స్‌ కంపెనీ యూరోమోనిటర్‌ ఇంటర్నేషనల్‌ విడుదల చేసిన తాజా రిపోర్ట్‌లో భారత్ నుంచి చోటు దక్కించుకున్న ఢిల్లీ.. 74వ స్థానంలో నిలిచింది.

స్పెయిన్ రాజధాని మాడ్రిడ్‌.. జపాన్ రాజధాని టోక్యో వరుసగా రెండు, మూడు స్థానాల్లో నిలిచాయి. ఇక ఈ జాబితాలో మాడ్రిడ్, టోక్యో తర్వాత.. రోమ్, మిలన్, న్యూయార్క్, ఆమ్‌స్టర్‌డామ్, సిడ్నీ, సింగపూర్, బార్సిలోనా నగరాలు ఉన్నాయి. ఇక 98వ స్థానంలో జెరూసలేం, 99వ స్థానంలో జుహై, 100 స్థానంలో కైరో నగరాలు నిలిచాయి. ఆర్థిక, వ్యాపార పనితీరు, పర్యాటక పనితీరు, పర్యాటక మౌలిక సదుపాయాలు, పర్యాటక విధానం, ఆకర్షణ, ఆరోగ్యం, భద్రత, స్థిరత్వం సహా 55 రకాల అంశాల ఆధారంగా ఈ ప్రపంచంలోనే అత్యంత ఆకర్షణీయమైన నగరాలను ఎంపిక చేశారు.

ఈసారి విడుదల చేసిన రిపోర్ట్‌లో యూరోపియన్‌యేతర నగరాల్లో పెరుగుదల కనిపించింది. ఇందులో యూరప్ అగ్రస్థానంలో ఉందని ఆ నివేదిక వెల్లడించింది. మొదటి 20 నగరాల్లో 9 సిటీలతో యూరప్.. ఆ తర్వాత 6 నగరాలతో ఆసియా-పసిఫిక్ ప్రాంతం రెండో స్థానంలో.. తర్వాత ఉత్తర అమెరికాలో 2.. మిడిల్ ఈస్ట్, ఆఫ్రికాలో ఒకటి.. ఆస్ట్రేలియాలో 2 నగరాలు ఉన్నాయి. ఇక న్యూయార్క్ నగరం ఆరో స్థానంలో నిలిచింది.

ఇక పర్యాటక డిమాండ్ కారణంగా 2024లో ప్రపంచవ్యాప్తంగా అంతర్జాతీయంగా వచ్చేవారి సంఖ్య 19 శాతం పెరిగింది. 80 కోట్ల మంది అంతర్జాతీయ పర్యటనలతో అత్యధికంగా పర్యాటకులు సందర్శించే ప్రాంతంగా యూరప్ నిలిచింది. మరోవైపు.. 2024లో 3.2 కోట్ల మంది సందర్శనలను ఆకర్షించిన బ్యాంకాక్ అంతర్జాతీయ రాకపోకల్లో ప్రపంచంలోనే తొలి స్థానంలో నిలిచింది. 2024లో 30శాతం కంటే ఎక్కువ పెరుగుదలతో వృద్ధిని కొనసాగించింది.