హైదరాబాద్‌లో 25 ఎకరాలు కొన్న దిగ్గజ ఐటీ కంపెనీ.. రూ.181 కోట్లకు పైనే..!

గ్లోబల్ టెక్ దిగ్గజం మైక్రోసాఫ్ట్ సంస్థ మన హైదరాబాద్‌లో తమ వ్యాపార విస్తరణ చేపడుతోంది. ఇందులో భాగంగా 25 ఎకరాల భూమి కొనుగోలు చేసింది. హైదరాబాద్ సమీపంలోని నందిగామ గ్రామంలో 25 ఎకరాల భూమిని ప్రముఖ ఫార్మా సంస్థలైన నాట్కో ఫార్మా, టైమ్ క్యాప్ ఫార్మా ల్యాబ్ నుంచి కొన్నట్లు ప్రాప్ స్టాక్ నివేదిక వెల్లడించింది. ఈ భూమి కోసం మైక్రోసాఫ్ట్ సంస్థ రూ.181.25 కోట్లు చెల్లించినట్లు వెల్లడించింది. మైక్రోసాఫ్ట్ కార్పొరేషన్ (ఇండియా) ప్రైవేట్ లిమిటెడ్ పేరుతో ఈ భూమిని కొనుగోలు చేసింది.

హైదరాబాద్‌లోని నందిగామలో 25 ఎకరాల భూమి కొనుగోలుకు సంబంధించిన లావాదేవీలు ఈ ఏడాది సెప్టెంబర్ 2024లోనే జరిగగా ఈ విషయం ఆలస్యంగా వెలుగులోకి వచ్చింది. మైక్రోసాఫ్ట్ సంస్థ భూమి ధరతో పాటు స్టాంప్ డ్యూటీ కింద రూ. 9.96 కోట్లు, రిజిస్ట్రేషన్ ఛార్జీల కింద రూ. 3.62 కోట్ల, ఇతర ఛార్జీలు రూ. 18 లక్షలు చెల్లించినట్లు తెలుస్తోంది. హైదరాబాద్ నగరంలో తమ డేటా సెంటర్ వ్యాపారాన్ని విస్తరించాలని మైక్రోసాఫ్ట్ భావిస్తోంది. ఇందులో భాగంగానే ఈ భూమి కొనుగోలు చేసినట్లు ఈ లావాదేవీలో భాగమైన ఇద్దరు వ్యక్తులు చెప్పినట్లు నివేదిక పేర్కొంది. అయితే ఈ విషయంపై మైక్రోసాఫ్ట్ నుంచి ఎలాంటి అధికారిక ప్రకటన రాలేదు.

మరోవైపు.. భూమి, భవనం విక్రయాలు అనేవి తమ ఆపరేషనల్ ఆస్తుల్లో భాగం కాదని, ఈ ట్రాన్సాక్షన్ వల్ల తమ వ్యాపార కార్యకలాపాలపై ఎలాంటి ప్రభావం చూపవని నాట్కో ఫార్మా తెలిపింది. కంపెనీ ప్రకారం ఈ ఒప్పందం అండర్ టేకింగ్ లేదా దాని కార్యకలాపాలలో గణనీయమైన భాగాన్ని బదిలీ చేయడం లేదని పేర్కొంది. టైమ్ క్యాప్ ఫార్మా ల్యాబ్ నుంచి ఎలాంటి ప్రకటన రాలేదు. గత సెప్టెంబర్‌లోనే ఈ డీల్ పూర్తయినట్లు స్పష్టమవుతోంది.

ఇటీవలి కాలంలో మైక్రోసాఫ్ట్ ఇండియాలో వ్యాపార విస్తరణ చేపడుతోంది. అందుకోసం భూములు కొనుగోలు చేస్తోంది. ఈ ఏడాది మే నెలలో ఈ అమెరికా టెక్నాలజీ దిగ్గజం హైదరాబాద్‌లో రూ. 267 కోట్లు పెట్టి 48 ఎకరాలు కొనుగోలు చేసింది. ఇక్కడ డేటా సెంటర్ బిజినెస్ కోసం భూమి కొనుగోళ్లు చేపడుతోంది. అంతకు ముందు 328 కోట్లు పెట్టి మహారాష్ట్రలోని పిమ్రి చించ్వాడ ప్రాంతంలో 25 ఎకరాల ప్లాట్ కొనుగోలు చేసింది. భారత్‌‌లోని పుణె, ముంబై, చెన్నై తర్వాత తమ డేటా సెంటర్ కోసం మైక్రోసాఫ్ట్ హైదరాబాద్ నగరాన్ని ఎంచుకుందని కంపెనీ వర్గాలు తెలిపాయి.