ఇన్వెస్టర్లకు కాసుల పంట.. తొలిరోజే రూ. 1.32 లక్షల ప్రాఫిట్

భారత స్టాక్ మార్కెట్ సూచీలు శుక్రవారం సెషన్లో నష్టాల్లో కొనసాగుతున్నాయి. మధ్యాహ్నం 2.40 గంటల సమయంలో బొంబాయి స్టాక్ ఎక్స్చేంజి సూచీ సెన్సెక్స్ 120 పాయింట్లు తగ్గి 81 వేల 640 వద్ద ఉంది. నేషనల్ స్టాక్ ఎక్స్చేంజి సూచీ నిఫ్టీ 40 పాయింట్లకుపైగా పడిపోయి 24,660 లెవెల్స్‌లో ట్రేడవుతోంది. ఈ క్రమంలోనే మార్కెట్లోకి ఇవాళ ఎంట్రీ ఇచ్చిన ఐపీఓ ఒకటి అదరగొట్టింది. ఏకంగా 90 శాతం ప్రీమియం నమోదు చేయడం విశేషం. అంతటితో ఆగలేదు. మళ్లీ అప్పర్ సర్క్యూట్ కొట్టడంతో మొత్తంగా తొలిరోజే ఇష్యూ ధర కంటే 99.46 శాతం పెరిగింది. దీంతో ఇన్వెస్టర్లకు మంచి లాభాలు అందాయి. పెట్టుబడిపై మళ్లీ అంతే రిటర్న్స్ రావడం విశేషం. దీని గురించి చూద్దాం.

ఇదే గణేశ్ ఇన్‌ఫ్రావరల్డ్ లిమిటెడ్ స్టాక్. ఇది శుక్రవారం రోజు ఎన్ఎస్ఇ, ఎస్ఎంఇ ఎక్స్చేంజీలో లిస్టయింది. ఇష్యూ ధర రూ. 83తో పోలిస్తే 90 శాతం ప్రీమియంతో రూ. 157.70 వద్ద లిస్టయింది. మళ్లీ 4.5 శాతం అప్పర్ సర్క్యూట్ కొట్టడంతో చివరకు రూ. 165.55 వద్ద గరిష్టాన్ని తాకింది. దీని మార్కెట్ విలువ రూ. 181 కోట్లకు చేరుకుంది.

ఈ ఐపీఓ విషయానికి వస్తే.. ఇష్యూ ధరను రూ. 78 నుంచి రూ. 83 వరకు నిర్ణయించగా.. చివరకు రూ .83 ఖరారు చేసింది. ఒక్కో లాట్ కింద కనీసం 1600 షేర్లు కొనుగోలు చేయాల్సి ఉంటుంది. కనీస పెట్టుబడి రూ. 1,32,800 అవుతుంది. ఈ ఐపీఓ నవంబర్ 29న సబ్‌స్క్రిప్షన్ కోసం అందుబాటులోకి రాగా.. డిసెంబర్ 3 వరకు కొనసాగింది. డిసెంబర్ 6న మార్కెట్లో లిస్టయింది. ఈ ఐపీఓకు మంచి రెస్పాన్స్ వచ్చింది. 369.56 రెట్ల మేర సబ్‌స్క్రైబ్ అయింది. గ్రే మార్కెట్లోనూ మంచి ప్రీమియం కనిపించింది. దానికి తగ్గట్లుగానే అంచనాలకు అనుగుణంగా లిస్టవడం విశేషం. ఈ కంపెనీ విషయానికి వస్తే ఇది కన్‌స్ట్రక్షన్ ఫర్మ్. 2017లో ప్రారంభమైంది.

 లాభాల పరంగా చూస్తే.. ఒక్క లాట్‌పై పెట్టుబడి మొత్తం 1600 షేర్లకు రూ. 83x 1600= రూ. 1,32,800 అవుతంది. లిస్టింగ్ ప్రైస్ దగ్గర రూ. 157.70 తో చేతికి మొత్తం రూ. 157.70x 1600= రూ. 2,52,320 అందుతుందని చెప్పొచ్చు. మళ్లీ అప్పర్ సర్క్యూట్ దగ్గర చూస్తే రూ. 165.55 దగ్గర చేతికి రూ. 2,64,880 అవుతుంది. ఇక్కడ పెట్టుబడి రూ. 1,32,800 పై మళ్లీ రూ. 1,32,080 లాభం వచ్చిందని చెప్పొచ్చు. దీంతో ఈ ఐపీఓ లాట్ దక్కిన వారికి అద్భుతమైన రిటర్న్స్ వచ్చాయి.