ట్రంప్ కేబినెట్‌లోకి మరో భారత సంతతి వ్యక్తి.. ఎవరీ హర్మీత్ కే ధిల్లాన్

 అమెరికా అధ్యక్షుడిగా ఎన్నికైన రిపబ్లికన్ పార్టీ నేత డొనాల్డ్ ట్రంప్.. జనవరి 20వ తేదీన అధ్యక్షుడిగా బాధ్యతలు చేపట్టనున్నారు. అయితే అంతకుముందే తన కార్యవర్గాన్ని ఆయన సిద్ధం చేసుకుంటున్నారు. ఈ క్రమంలోనే ట్రంప్ 2.0 కేబినెట్‌లో భారత సంతతికి చెందిన వ్యక్తులకు కీలక పగ్గాలు అప్పగిస్తున్నారు. ఇప్పటికే ముగ్గురు భారత సంతతి వ్యక్తులను తన కేబినెట్‌లోకి తీసుకుంటున్నట్లు ప్రకటించిన ట్రంప్.. తాజాగా మరో భారత సంతతికి చెందిన మహిళకు కీలక బాధ్యతలు అప్పగిస్తున్నట్లు ప్రకటించారు. ఆమెనే హర్మీత్ కె ధిల్లాన్.

అమెరికా న్యాయ శాఖలో పౌర హక్కుల విభాగంలో అసిస్టెంట్ అటార్నీ జనరల్‌గా భారత సంతతికి చెందిన లాయర్ హర్మీత్‌ కె.ధిల్లాన్‌ను నియమిస్తున్నట్లు డొనాల్డ్ ట్రంప్ సోమవారం ఒక ప్రకటన చేశారు. ఈ క్రమంలోనే అసిస్టెంట్ అటార్నీ జనరల్‌గా హర్మీత్ కె.ధిల్లాన్‌కు అవకాశం కల్పించినట్లు సోషల్ మీడియా వేదికగా ట్రంప్ స్పష్టం చేశారు. అమెరికాలో ఉన్న ప్రముఖ న్యాయవాదుల్లో హర్మీత్‌ కె.ధిల్లాన్‌ ఒకరు కావడం గమనార్హం. అమెరికా రాజ్యాంగ హక్కుల కోసం హర్మీత్ కె.ధిల్లాన్ విశ్రాంతి లేకుండా పోరాడుతున్నారని.. అందుకే ఆమెకు ఈ బాధ్యతలు అప్పగించినట్లు ట్రంప్ తెలిపారు. అంతేకాకుండా హర్మీత్ కె.ధిల్లాన్.. పౌర హక్కులు, ఎన్నికల చట్టాలను సక్రమంగా అమలు చేస్తారని ఆశిస్తున్నట్లు ఈ సందర్భంగా డొనాల్డ్ ట్రంప్ స్పష్టం చేశారు. కొవిడ్ సమయంలో కార్మికులపై వివక్ష, చట్టాలను ఉపయోగించుకునేందుకు ప్రయత్నించిన పలు కార్పొరేషన్‌లపై ఆమె న్యాయం పోరాటం చేశారని గుర్తు చేశారు.

ఇక అమెరికా ప్రభుత్వంలో తనకు కీలక బాధ్యతలు దక్కడం పట్ల హర్మీత్ కె.ధిల్లాన్ స్పందించారు. డొనాల్డ్ ట్రంప్‌ అప్పగించిన బాధ్యతలను అత్యంత గౌరవంగా భావిస్తున్నట్లు చెప్పారు. దేశానికి సేవ చేయడం తన కల అని.. డొనాల్డ్ ట్రంప్‌ నేతృత్వంలోని అద్భుతమైన లాయర్ల టీంలో తాను ఒక భాగం అయినందుకు ఎంతో సంతోషిస్తున్నట్లు హర్మీత్ కె.ధిల్లాన్ ట్విట్టర్ వేదికగా వెల్లడించారు.

మరోవైపు.. మరో నెలరోజుల్లో ఏర్పాటు కానున్న అమెరికా కొత్త ప్రభుత్వానికి సంబంధించి కొత్త అధ్యక్షుడు డొనాల్డ్ ట్రంప్ ఇప్పటికే అంతా సిద్ధం చేసుకుంటున్నారు. తన కేబినెట్‌ను చక్కగా రూపుదిద్దుకుంటున్నారు. ఈ క్రమంలోనే ట్రంప్‌ తన పాలక వర్గంలో భారత సంతతికి చెందిన నలుగురికి కీలక పదవులను అప్పగించారు. హర్మీత్ కె.ధిల్లాన్ కంటే ముందు వివేక్ రామస్వామి (డోజ్‌), డాక్టర్ జే భట్టాచార్య (నేషనల్ ఇన్‌స్టిట్యూట్ ఆఫ్ హెల్త్), కశ్యప్ పటేల్ (ఎఫ్‌బీఐ డైరెక్టర్) పదవులను ట్రంప్ అప్పగించారు.