బంగారం, లగ్జరీ కార్లు, ఇంకా ఎన్నో.. సిరియా అధ్యక్షుడి బంకర్‌‌ చూస్తే కళ్లు చెదిరిపోవాల్సిందే

మొన్న శ్రీలంక.. నిన్న బంగ్లాదేశ్.. నేడు సిరియా. ప్రభుత్వానికి వ్యతిరేకంగా చెలరేగిన ఆందోళనలతో అధ్యక్షుడు, ప్రధానమంత్రిని పారిపోయేలా చేసిన ఘటనలు కొనసాగుతున్నాయి. ఇక ప్రభుత్వం కూలిపోయిన తర్వాత అధ్యక్ష భవనంలోకి చొరబడి.. అక్కడి వస్తువులను ఎత్తుకెళ్లడం, ధ్వంసం చేయడం వంటి సంఘటనలు చూస్తూనే ఉన్నాం. తాజాగా సిరియాలో చెలరేగిన ఆందోళనల కారణంగా అధ్యక్షుడు బషర్ అల్ అసద్ దేశాన్ని విడిచి రష్యాకు వెళ్లి తలదాచుకుంటున్నారు. ఈ నేపథ్యంలోనే తిరుగుబాటుదారులు.. సిరియా రాజధాని డమాస్కస్‌ను ఆక్రమించుకున్నారు. ఇక అధ్యక్షుడి నివాసంలోకి చొరబడిన నిరసనకారులు.. అక్కడ చేసిన పనులకు సంబంధించిన వీడియోలు సోషల్ మీడియాలో వైరల్‌గా మారాయి.

ఇక ఇదే సమయంలో బషల్ అల్ అసద్ నివాసంలో అతిపెద్ద సీక్రెట్‌ ఫ్యామిలీ బంకర్‌ ఉన్నట్లు కొన్ని వీడియోలు బయటికి వచ్చాయి. లగ్జరీగా ఉన్న అధ్యక్షుడి ఇంట్లోకి చొరబడిన సిరియా ప్రజలు.. ఇంట్లోని ప్లేట్లు, ఫర్నీచర్‌ సహా ఏది దొరికితే వాటిని ఎత్తుకెళ్లారు. ఈ క్రమంలోనే అధ్యక్షుడి నివాసానికి సంబంధించి కొన్ని వీడియాలు కూడా వెలుగులోకి వచ్చాయి. తాజాగా ఓ వీడియోలో సిరియా మాజీ అధ్యక్షుడి ఫ్యామిలీ బంకర్‌ దృశ్యాలు వైరల్‌గా మారాయి. బషల్ అల్ అసద్‌ ఇంట్లో ఒక సొరంగ మార్గం బయటపడింది. ఆ సొరంగ మార్గంలో భారీగా బంగారు ఆభరణాలు, ఆయుధాలు ఉన్నట్లు తెలుస్తోంది. ఇక ఆ భారీ సొరంగంలో చెల్లాచెదురుగా పడి ఉన్న పెట్టెలు, ఇతర వస్తువులు, విశాలమైన గదులు ఉన్నట్లు వీడియోలో కనిపిస్తున్నాయి.

మరోవైపు.. అధ్యక్షుడికి సంబంధించిన ప్రైవేటు గ్యారేజీలో లగ్జరీ కార్లు ఉన్నట్లు తెలుస్తోంది. కోట్ల రూపాయల విలువైన పోర్షే, లంబోర్గిని, ఫెరారీ, మెర్సిడెజ్‌- బెంజ్‌, ఆడీ వంటి ఖరీదైన కార్లు ఉన్నట్లు వైరల్‌ వీడియోల్లో ఉన్నాయి. మరోవైపు కొందరు నిరసనకారులు సిరియాలోని పలు బ్యాంకులపై దాడులు చేసి.. డబ్బుల పెట్టెలతో పారిపోయినట్లు స్థానిక మీడియా వర్గాలు వెల్లడించాయి.

సిరియాలో తలెత్తిన అంతర్యుద్ధం తీవ్ర స్థాయికి చేరడంతో.. తిరుగుబాటుదారులు ఆయుధాలతో డమాస్కస్‌తో సహా వివిధ కీలక నగరాలను ఆక్రమించుకోవడంతో అధ్యక్షుడు బషర్ అల్‌ అసద్‌.. దేశం విడిచి రష్యాకు పారిపోయినట్లు తెలుస్తోంది. అధ్యక్షుడు పారిపోవడంతో నిరంకుశ పాలన నుంచి సిరియాకు విముక్తి లభించిందని తిరుగుబాటుదారులు సంబరాలు జరుపుకున్నారు. అసద్ కుటుంబ పాలనలో 50 ఏళ్ల అణిచివేత.. 13 ఏళ్ల దౌర్జన్యం వల్ల ఎందరో సిరియా ప్రజలు ఇతర దేశాలకు వలస వెళ్లినట్లు తెలిపారు. అసద్ గద్దె దిగడంతో ఈ చీకటి కాలానికి ముగింపు పలుకుతున్నామని.. సిరియాలో కొత్త శకం ప్రారంభమైందని తిరుగుబాటుదారులు ప్రకటించారు.

ఇక సిరియాలో నెలకొన్న తాజా పరిణామాలపై ఆ దేశ ప్రధానమంత్రి మహమ్మద్‌ ఘాజీ జలాలీ స్పందించారు. సిరియాలో అధికారాన్ని ప్రతిపక్షాలకు బదిలీ చేసేందుకు తాము సిద్ధంగా ఉన్నామంటూ ఒక వీడియోను విడుదల చేశారు. తాను సిరియాలోనే ఉన్నానని.. ప్రభుత్వ ఆస్తులను ధ్వంసం చేయొద్దని విజ్ఞప్తి చేశారు.