12 ఏళ్లు ఒంటికాలిపై తపస్సు చేసిన బాబా ఇకలేరు.. ఎవరీ సియారాం బాబా

మధ్యప్రదేశ్‌కు చెందిన సియారామ్ బాబా గురించి చాలా మందికి తెలిసే ఉంటుంది. ఆంజనేయ స్వామి భక్తుడిగా, సమాజాభివృద్ధికి ఎంతో సాయం చేసిన సియారామ్ బాబా ఇకలేరు. దీర్ఘకాళిక అనారోగ్య సమస్యలతో బుధవారం ఉదయం ప్రాణాలు విడిచారు. బాబా మృతి విషయం తెలుసుకున్న రాష్ట్ర ప్రజలు కన్నీటిపర్యంతం అవుతున్నారు. ఆయనను చివరిసారిగా చూడాలని భట్యాన్ గ్రామంలో ఉన్న ఆశ్రమానికి వెళ్తున్నారు.

సియారామ్ బాబా ఖర్గోన్ జిల్లా నిమార్ ప్రాంతంలోని భట్యాన్ ఆశ్రమంలో నివాసం ఉండేవారు. ఆంజనేయ స్వామిని ఆరాధిస్తూ.. అన్ని కాలాల్లోనూ లంగోటి మాత్రమే కట్టుకుని జీవనం సాగించేవారు. అలాగే తన పనులు అన్నీ తానే స్వయంగా చేసుకుంటూ.. తన వద్దకు వచ్చే వందలాది మంది భక్తులకు జ్ఞానోపదేశం చేసేవారు. బాబా చదువుకోకపోయినప్పటికీ.. రామచరిత మానస్‌ను నిరంతరం పఠించేవారు. బాబా వయసుపై అనేక అనుమానాలు ఉన్నాయి. కొందరు 94 ఏళ్లు అని మరికొందరు 180 సంవత్సరాలు ఉంటాడు అని అంటుంటారు. ఆయన శిష్యులు మాత్రం 109 నుంచి 118 ఏళ్ల మధ్య ఆయన వయసు ఉంటుందని చెప్పారు.

సియారామ్ బాబాకు భక్తులు తమకు నచ్చినంత విరాళాన్ని అందజేసినా ఆయన తీసుకోకపోయేవారు. కేవలం రూ.10 మాత్రమే పుచ్చుకుని వారిని దీవించేవారు. కేవలం 10 రూపాయలు మాత్రమే తీసుకునే ఈ బాబాకు కోట్లలో విరాళాలు అందేవి. వాటిని బాబా అనేక గుడుల నిర్మాణాలకు, బాగు చేయించేందుకు విరాళంగా ఇచ్చారు. అంతేకాకుండా నర్మదా నది ఘాట్లు పునరుద్ధరించడానికి సియారామ్ బాబా 2 కోట్ల 57 లక్షల రూపాయలను విరాళంగా అందజేశారు.

దీర్ఘకాలంగా సియారామ్ బాబా న్యూమోనియాతో బాధ పడుతున్నారు. కొద్దిరోజుల క్రితమే ఆయన ఆరోగ్య పరిస్థితి విషమించడంతో.. సనవాడ్‌లోని ఓ ప్రైవేటు ఆస్పత్రిలో చేర్చించారు ఆయన శిష్యులు. చికిత్స అనంతరం బాబా కోరిక మేరకు తిరిగి ఆశ్రమానికి తీసుకు వచ్చారు. అప్పటి నుంచి ఆశ్రమంలోనే చికిత్స పొందుతున్నారు. మధ్యప్రదేశ్ ముఖ్యమంత్రి డాక్టర్ మోహన్ యాదవ్.. ఎప్పటికప్పుడు సియారామ్ బాబా ఆరోగ్య పరిస్థితులు తెలుసుకుంటూనే ఉన్నారు. సీఎం ఆదేశాల మేరకే ఇండోర్‌లోని మెడికల్ కాలేజీ బృందం బాబా ఆరోగ్యంపై ప్రత్యేక శ్రద్ధ తీసుకుంది. ఆశ్రమంలోనే ఉంటూ అన్ని వసతులు కల్పిస్తూ... 24 గంటలూ బాబాకు సేవలు అందించింది.

ఈరోజు పరిస్థితి మరింత విషమించి ఉదయం 6.10 నిమిషాలకు ప్రాణాలు విడిచారు. బాబా మృతి విషయం తెలుసుకున్న ప్రజలు అంతా కన్నీరుమున్నీరు అవుతున్నారు. అలాగే రాజకీయ ప్రముఖులు సైతం ఆయన ఆత్మకు శాంతి కలగాలని కోరుకుంటూ ట్వీట్లు చేస్తున్నారు. భక్తుల సందర్శనార్ధం సియారామ్ బాబా మృతదేహాన్ని ఆశ్రమం వద్దే ఉంచారు. ఈరోజు సాయంత్రం 4 గంటలకు భట్యాన్ గ్రామంలోనే అంత్యక్రియలు నిర్వహించబోతున్నట్లు తెలుస్తోంది. సీఎం మోహన్ యాదవ్ ఈ అంత్యక్రియల్లో పాల్గొని.. బాబాని కడచూపు చూడనున్నారట. ఇప్పటికే వేలాది మంది భక్తులు బాబాని చివరి సారి చూసేందుకు వచ్చారు.