ఈ 3/20/30/40 రూల్ పాటిస్తేనే.. హోమ్ లోన్ తీసుకోండి

సొంత ఇల్లు నిర్మించడం లేదా కొనుగోలు చేయడం అంటే ఎంతో ఖర్చుతో కూడుకున్న వ్యవహారం. అందుకే ఆచితూచి నిర్ణయం తీసుకోవాలి. ప్రస్తుత రోజుల్లో తమ సొంతింటి కలను నెరవేర్చుకునేందుకు ఎన్ని లక్షలైనా వెచ్చించేందుకు వెనకాడడం లేదు. బ్యాంకులు ఈజీగా రుణాలు ఇస్తుండడంమూ ఇందుకు ఒక కారణంగా చెప్పవచ్చు. అయితే, మీ స్తోమత, లక్ష్యం, అవసరాలను బట్టి నిర్ణయం తీసుకోవాలి. ఎలాంటి ప్రణాళిక లేకుండా హోమ్ లోన్ తీసుకుని ఇంటిని కొనుగోలు చేస్తే అప్పుల ఊబిలో కూరుకుపోయే ప్రమాదం ఉంది. అందుకే ఆర్థిక నిపుణులు ఒక థంబ్ రూల్ 3/20/30/40 సూచిస్తున్నారు. ఈ రూల్ పాటిస్తే హోమ్ లోన్ తీసుకునేటప్పుడు సహాయంగా ఉంటుందంటున్నారు.

ఈ 3/20/30/40 రూల్ ఇంటి కోసం లోన్ తీసుకునే వారిని అప్పుల ఊబిలో కూరుకుపోకుండా కాపాడుతుందని చెప్పవచ్చు. ఈ థంబ్ రూల్‌కి కట్టుబడి ఉండడం వల్ల ఎలాంటి ఒత్తిడి లేకుండా జీవితం కొనసాగించేందుకు అవకాశం లభిస్తుంది. ఇంటి కోసం తీసుకున్న లోన్ మీ పాలిట గుదిబండగా మారే ప్రమాదం ఉండదు. మరి ఈ రూల్ ఏ విషయాలను చెబుతుంతో తెలుసుకుందాం.

3- ఇంటి మొత్తం ఖర్చు..

ఇంటి కోసం వెచ్చించే మొత్తం ఖర్చు మీ వార్షిక ఆదాయానికి మూడు రెంట్లకు మించి ఉండొద్దని ఈ రూల్‌లోని మొదటి అంకె 3 సూచిస్తోంది. ఉదాహరణకు ఒక వ్యక్తి వార్షిక ఆదాయం రూ.7 లక్షలు అనుకుందాం. అంటే ఇంటి ఖర్చు రూ.21 లక్షలకు మించ కూడదు. ఇంత తక్కువ ధరకు హైదరాబాద్ వంటి నగరాల్లో ఇల్లు కొనడం అసాధ్యమనే చెప్పాలి. అలాంటి సందర్భంలో ఇతర ఆస్తులు, షేర్లు వంటివి విక్రయించి డబ్బు సమకూర్చుకోవాలి. అలాంటివి లేనప్పుడు మీ ఆదాయం పెరిగే వరకు వేచి ఉండడమే మంచిదని నిపుణులు చెబుతున్నారు.

20- లోన్ టెన్యూర్..

మీ హోమ్ లోన్ కాల వ్యవధి 20 ఏళ్లకు మించకూడదు. టెన్యూర్ తగ్గితే చెల్లించే వడ్డీ తగ్గుతుంది. అయితే, నెలవారీ ఈఎంఐ పెరుగుతుంది. అది చెల్లించే స్తోమత ఉండాలి. దీర్ఘకాలం పాటు టెన్యూర్ ఎంచుకుంటే చాలా సొమ్ము రుణ చెల్లింపునకే కేటాయించాల్సి వస్తుంది. ఒక వేళ ఈఎంఐకి చెల్లించే సొమ్ములో కొంత పెట్టుబడి పెట్టి ఎక్కువ సంపాదించవచ్చు. అందుకే 20 ఏళ్లకు మించకుండా టెన్యూర్ పెట్టుకోవాలి.

30- ఈఎంఐ మొత్తం..

మీరు ప్రతి ఏడాది చెల్లించే ఈఎంఐ మొత్తాన్ని థంబ్ రూల్‌లోని మూడో సంఖ్య 30 సూచిస్తుంది. అంటే మీకు సంబంధించిన అన్ని రుణాలను కలుపుకొని మీరు చెల్లించే ఈఎంఐ మీ వార్షిక ఆదాయంలో 30 శాతానికి మించకుండా చూసుకోవాలి. ఉదాహరణకు మీ ఆదాయం రూ.5 లక్షలు అనుకుంటే.. మీ అన్ని రుణాల ఈఎంఐల మొత్తం రూ.1,50,000 మించకూడదు. అంటే మీరు నెలకు రూ.12,500 కంటే తక్కువ ఈఎంఐలు చెల్లించేలా చూసుకోవాలి.

40-కనీస డౌన్ పేమెంట్..

ఇల్లు కట్టేటప్పుడు లేదా కొనేటప్పుడు ఇంటి మొత్తం ఖర్చులో కనీసం 40 శాతం డబ్బు మీ చేతి నుంచి చెల్లిస్తే మంచిది. పూర్తిగా లోన్ పై ఆధారపడితే దీర్ఘకాలంలో భారంగా మారే అవకాశం ఉంటుంది. పైగా తక్కువ సమయంలో లోన్ పూర్తయితే ఇల్లు వీలైనంత త్వరగా మీ సొంతమైనట్లవుతుంది.