ఇస్రో మరో ముందడుగు.. విశాఖ తీరంలో క్రూ మాడ్యూల్ రికవరీ టెస్ట్ సక్సెస్

భారత అంతరిక్షపరిశోధన సంస్థ (ఇస్రో) మొట్టమొదటి మానవసహిత అంతరిక్ష యాత్ర గగన్‌యాన్‌ ప్రయోగానికి సన్నాహాలు వడివడిగా సాగుతున్నాయి. ఇందులో భాగంగా కీలకమైన క్రూ మాడ్యూల్‌ రికవరీ టెస్ట్‌కు విశాఖపట్నం తీరంలో మంగళవారం నిర్వహించారు. భారత తూర్పు నౌకాదళం సహకారంతో చేపట్టిన ఈ పరీక్ష విజయవంతమైందని ఇస్రో ప్రకటించింది. ‘గగన్‌యాన్‌’ క్రూ మాడ్యూల్‌ సముద్ర జలాల్లో ఎక్కడ దిగినా సురక్షితంగా బయటకు తీసుకొచ్చేలా ఇస్రో ఈ ప్రయోగం నిర్వహించింది. వ్యోమగాములతో కూడిన క్రూ మాడ్యూల్ అంతరిక్షం నుంచి తిరిగొచ్చే క్రమంలో సముద్ర జలాల్లో దిగిన అనంతరం వారిని వీలైనంత త్వరగా బయటకు తీసుకురావాల్సి ఉంటుంది. దీనికి సంబంధించి ఇస్రో ‘వెల్‌ డెక్‌’ విధానాన్ని ప్రస్తుతం పరీక్షించింది.

ఇందులో భాగంగా వ్యోమగాములతో కూడిన క్రూ మాడ్యూల్‌ సముద్రంలో దిగిన వెంటనే.. దానికి తాళ్లు కట్టి ‘వెల్‌ డెక్‌ షిప్‌’కి అనుసంధానిస్తారు. అనంతరం మాడ్యూల్‌ను నౌకలోకి చేర్చి అందులోని ఆస్ట్రోనాట్లను బయటకు తీసుకొస్తారు. మంగళవారం నాటి ప్రయోగంలో క్రూ మాడ్యూల్‌‌ను నేవీ సిబ్బంది సురక్షితంగా వెల్‌డెక్‌ షిప్‌లోకి తీసుకొచ్చినట్టు ఇస్రో వెల్లడించింది. సాధారణం లేదా అత్యవసర పరిస్థితుల్లో మాడ్యూల్‌ రికవరీ ప్రయోగానికి స్టాండర్డ్ ఆపరేషన్ ప్రొసీజర్స్ (ఎస్‌ఓపీ)ని రూపొందించేందుకు ఈ సన్నాహక పరీక్షలను నిర్వహిస్తున్నట్లు ఇస్రో తెలిపింది.

ఇస్రో అత్యంత ప్రతిష్ఠాత్మకంగా చేపట్టిన గగన్‌యాన్ మిషన్‌లో వ్యోమగాములను అంతరిక్షంలోకి పంపుతారు. మూడు రోజుల పాటు భూకక్ష్య చుట్టూ వ్యోమనౌక చక్కర్లు కొట్టి అనంతరం భూమికి చేరుకుంటారు. గగన్‌యాన్‌ ప్రయోగం కోసం ఇప్పటికే తిరుపతి జిల్లా శ్రీహరికోటలోని సతీశ్ ధావన్ స్పేస్ సెంటర్ (షార్)‌కు క్రూ ఎస్కేప్, లాంచింగ్ వెహికల్ ప్రొపల్షన్ వ్వవస్థలు చేరుకున్నాయి. ఆర్బిటల్ మాడ్యూల్ సిస్టమ్స్ ఇంటిగ్రేషన్ తుది దశలో ఉంది.

గగన్‌యాన్‌లో భాగంగా తొలుత మానవరహిత ప్రయోగం నిర్వహిస్తారు. ఇది వచ్చే ఏడాది ప్రథమార్ధంలో ఉంటుంది. తర్వాత 2026లో మానవసహిత ప్రయోగం నిర్వహించనున్నట్టు ఇటీవల కేంద్ర శాస్ర సాంకేతిక శాఖ మంత్రి డాక్టర్ జితేంద్ర సింగ్ పార్లమెంట్‌లో ప్రకటించారు. ఇప్పటికే గగన్‌యాన్‌లో ప్రయాణించే వ్యోమగాముల ఎంపిక, శిక్షణ పూర్తయ్యింది. బాహుబలి రాకెట్ ఎల్ఎంవీ3 ద్వారా వ్యోమగాములను అంతరిక్షంలోకి క్రూ మాడ్యూల్‌ను పంపుతారు. దీనికి సంబంధించి మూడు దశలు పరీక్షలు (సాలిడ్, లిక్విడ్, క్రయోజనిక్) విజయవంతంగా పూర్తయ్యాయి. అంతరిక్షంలోకి వెళ్లే నలుగురు వ్యోమగాముల పేర్లను ప్రధాని నరేంద్ర మోదీ ఈ ఏడాది ఫిబ్రవరిలో వెల్లడించిన విషయం తెలిసిందే. ఈ వ్యోమగాములకు రష్యా అంతరిక్ష పరిశోధన సంస్థ శిక్షణ ఇచ్చింది.