తిరుమలలో భారీ వర్షం.. శ్రీవారి భక్తులకు టీటీడీ కీలక సూచనలు

బంగాళాఖాతంలో అల్పపీడనం ప్రభావంతో చిత్తూరు, తిరుపతి జిల్లాలలో భారీ వర్షాలు కురుస్తున్నాయి. తిరుమల కొండపైనా గురువారం ఉదయం నంచి ఎడతెరిపి లేకుండా వర్షం పడుతోంది. దీంతో తిరుమల ఘాట్ రోడ్డులో కొండచరియలు విరిగిపడుతున్న ఘటనలు చోటుచేసుకుంటున్నాయి. తిరుమల రెండో ఘాట్ రోడ్డులో బండరాళ్లు జారిపడ్డాయి. అయితే భారీ వర్షాల నేపథ్యంలో టీటీడీ అప్రమత్తమైంది. విరిగిపడిన బండరాళ్లను టీటీడీ సిబ్బంది తొలగించారు. అలాగే ఎప్పటికప్పుడు బండరాళ్లను తొలగించాలని.. ఘాట్ రోడ్లలో ప్రయాణికులకు ఇబ్బందులు లేకుండా చూడాలని టీటీడీ సిబ్బందిని ఆదేశించింది.

మరోవైపు భారీ వర్షాల నేపథ్యంలో తిరుమల శ్రీవారి భక్తులకు టీటీడీ కీలక సూచనలు చేసింది. తిరుమలకు ప్రైవేట్ వాహనాల్లో వచ్చే భక్తులు ఘాట్ రోడ్లలో వచ్చే సమయంలో జాగ్రత్తలు తీసుకోవాలని తిరుమల తిరుపతి దేవస్థానం బోర్డు అధికారులు సూచించారు. వాహనాలను జాగ్రత్తగా నడపాలని శ్రీవారి భక్తులకు, అలాగే ఆర్టీసీ సిబ్బందికి కూడా విజ్ఞప్తి చేశారు. ఆకాశగంగ, పాపవినాశనం, శ్రీవారి పాదాలు, శిలాతోరణం వెళ్లే మార్గాల్లో వాహనాల రాకపోకలను నిలిపివేశారు. ఘాట్ రోడ్లపై నిరంతర పర్యవేక్షణ ఉంచాలని ఇంజనీరింగ్ అధికారులను టీటీడీ ఆదేశించింది. భారీ వర్షాల కారణంగా తిరుపతిలోని కపిల తీర్థం పుష్కరిణికి నీటి ప్రవాహం పెరిగింది. దీంతో భక్తులను పుష్కరిణిలోకి అనుమతించడం లేదు. ఎడతెరిపిలేని వర్షం కారణంగా తిరుమలలో భక్తులు ఇబ్బందులు పడుతున్నారు. దర్శనం పూర్తైన తర్వాత టీటీడీ ఏర్పాటు చేసిన షెడ్లలో తలదాచుకుంటున్నారు.

తిరుపతి జిల్లాలో భారీ వర్షం నేపథ్యంలో హోం మంత్రి వంగలపూడి అనిత అధికారులను అలర్ట్ చేశారు. తిరుమల, సూళ్లూరుపేట ప్రాంతాల్లో భారీ వర్షం కురుస్తోందని.. ప్రజలు అప్రమత్తంగా ఉండాలని సూచించారు. లక్ష్మీపురం కూడలి, గొల్లవానిగుంట లోతట్టు ప్రాంతాల్లో ముందస్తు జాగ్రత్తలు తీసుకోవాలని అధికార యంత్రాంగాన్ని ఆదేశించారు. లోతట్టు ప్రాంతాల ప్రజలను సురక్షిత ప్రాంతాలకు తరలించాలని.. వర్షాల గురించి రైతులు,కాపరులు, మత్స్యకారులకు ఫోన్ కాల్స్, సందేశాల ద్వారా సమాచారం ఇవ్వాలని సూచించారు. ప్రాజెక్టుల గేట్లు ఎత్తే సమయంలో.. పరివాహక ప్రజలు అప్రమత్తంగా ఉండాలని హోంమంత్రి వంగలపూడి అనిత సూచించారు.