ఏపీలో కొత్తగా నాలుగు లేన్ల రహదారులు.. ఆ రూట్లలోనే.. పీపీపీ పద్ధతిలో నిర్మాణం

ఏపీలో ఎన్డీయే కూటమి అధికారంలో ఉండటంతో పలు కీలక ప్రాజెక్టులకు మోక్షం లభిస్తోంది. రాష్ట్రంలో టీడీపీ నేతృత్వంలో ఎన్డీఏ కూటమి సర్కారుకు కేంద్ర ప్రభుత్వం నుంచి పూర్తి సహకారం అందుతోంది. ఈ క్రమంలోనే పలు రైల్వే, రోడ్ ప్రాజెక్టులపై ముందడుగు పడుతోంది. ఈ క్రమంలోనే రాష్ట్రంలోని మరో రెండు రహదారుల విస్తరణకు ఆంధ్రప్రదేశ్ ప్రభుత్వం ప్రణాళికలు రచిస్తోంది. గుంటూరు జిల్లాలో కీలక రహదారులుగా ఉన్న తెనాలి- నారా కోడూరు, తెనాలి - మంగళగిరి రహదారులను నాలుగు వరుసల రహదారులుగా విస్తరించడానికి ఆంధ్రప్రదేశ్ ప్రభుత్వం ఆమోదం తెలిపింది. దీనికి సంబంధించి ఇటీవలే ఉత్తర్వులను జారీ చేసింది.

పబ్లిక్ ప్రైవేట్ భాగస్వామ్యంతో తెనాలి- నారా కోడూరు, తెనాలి - మంగళగిరి రహదారులను నాలుగు వరుసలకు విస్తరిస్తారు. రహదారి విస్తరణ పనుల కోసం సమగ్ర ప్రాజెక్టు నివేదిక రూపకల్పన కోసం టెండర్లు కూడా పిలిచారు. టెండర్లు ఖరారైన వెంటనే డీపీఆర్ నివేదిక తయారీ కోసం క్షేత్రస్థాయిలో పర్యటించి నివేదిక తయారు చేస్తారు. రహదారి విస్తరణ కోసం ఎంత భూమి అవసరం అవుతుంది.. ప్రభుత్వ భూమి అందుబాటులో ఉందా.. భూసేకరణ చేయాల్సి వస్తే ఎంత భూమిని సేకరించాలి.. కల్వర్టులు, వంతెనలు ఎక్కడైనా నిర్మించాలా ఇలాంటి విషయాలను డీపీఅర్‍లో నివేదిస్తారు. ఆ తర్వాతే రోడ్డు విస్తరణకు అయ్యే ఖర్చుపై ఓ క్లారిటీ వస్తుంది. డీపీఆర్ రూపకల్పన తర్నాత నివేదిక ఆధారంగా ప్రభుత్వం ముందుకు వెళ్లనుంది.

తెనాలి - నారా కోడూరు రోడ్డు విషయానికి వస్తే.. ఈ రహదారి 17 కిలోమీటర్ల మేర పొడవు ఉంది. ఈ రహదారి గుండా రోజుకు 34 ఆర్టీసీ బస్సులు 238 ట్రిప్పులు నడుస్తుంటాయి. బస్సుల్లోనే రోజూ 20 వేల మంది ప్రయాణిస్తుంటారని అంచనా. బస్సులు కాక వ్యక్తిగత వాహనాలు, ప్రైవేట్ వాహనాల్లో రాకపోకలు సాగించేవారు.. మరో 55 వేల మంది వరకూ ఉంటారు. మొత్తంగా రోజుకు 75 వేల మంది ప్రయాణిస్తుంటారని అంచనా.

ఇక తెనాలి- మంగళగిరి రహదారి విషయానికి వస్తే.. ఈ రహదారి పొడవు 28 కిలోమీటర్లుగా ఉంది. ప్రతి రోజూ 41 ఆర్టీసీ బస్సులు 246 ట్రిప్పులు రాకపోకలు సాగిస్తుంటాయి. బస్సుల్లో 25 వేల మంది.. ప్రైవేట్ వాహనాల్లో 75 వేల మంది కలిపి.. నిత్యం లక్ష మంది వరకూ రాకపోకలు సాగిస్తుంటారు. ఇంత డిమాండ్ ఉన్న ఈ రహదారులను నాలుగు వరుసలకు విస్తరించాలని గత కొంతకాలంగా డిమాండ్లు వినిపిస్తున్నాయి. ఈ క్రమంలోనే రోడ్డు విస్తరణ చేపట్టాలని ఏపీ ప్రభుత్వం నిర్ణయించింది.