ఏడాది క్రితం అల్లర్లు.. ఎట్టకేలకు 25 మందికి జైలుశిక్ష విధించిన పాకిస్థాన్!

పాకిస్థాన్ మాజీ ప్రధాన మంత్రి ఇమ్రాన్ ఖాన్ అరెస్టు అయిన విషయం అందరికీ తెలిసిందే. ఇమ్రాన్ ఖాన్ అరెస్టుతో 2023 మే 9వ తేదీన ఆయన మద్దతు దారులు అంతా పెద్ద ఎత్తున నిరసనలు చేపట్టారు. దేశవ్యాప్తంగా జరిగిన ఈ నిరసనల్లో మొత్తం 103 మందిని పోలీసులు అరెస్ట్ చేశారు. అయితే అప్పటి నుంచి జైల్లోనే ఉన్న వీళ్లలో 25 మందిని తాజాగా దోషులుగా తేల్చింది న్యాయస్థానం. అలాగే వీరికి జైలుశిక్షను కూడా విధించింది. త్వరలోనే మిగతా వాళ్లకు కూడా శిక్షలు వేస్తామని న్యాయస్థానం స్పష్టం చేసింది. ఆ పూర్తి వివరాలు ఏంటో మనం ఇప్పుడు తెలుసుకుందాం.

మాజీ క్రికెట్ స్టార్ ఇమ్రాన్ ఖాన్ 2018 నుంచి 2022 వరకు పాకిస్థాన్ ప్రధాన మంత్రిగా పనిచేశారు. అవిశ్వాస తీర్మానం ద్వారా పదవి నుంచి తొలగించబడ్డారు. అయితే ఆయన పతనానికి కారణం అయిన సైనికాధిపతిని నిందించాడు. కొన్నాళ్లు నిర్బంధంలో ఉన్నాడు. కానీ ఆ తర్వాత మూడు నెలలకే అంటే 2023 మే నెలలో ఇమ్రాన్ ఖాన్‌ను పోలీసులు అరెస్ట్ చేశారు. ఈ విషయం తెలుసుకున్న ఆయన మద్దతు దారులు అంతా పెద్ద ఎత్తున నిరసనలు చేపట్టారు. అవి అల్లర్లకు దారి తీశాయి.

ముఖ్యంగా ఈ అల్లర్లలో భాగంగానే నిరసనకారులు రావల్పిండిలోని ఆర్మీ ప్రధాన కార్యాలయాన్ని ధ్వంసం చేశారు. అలాగే ఫైసలాబాద్‌లోని ఐఎస్ఐ భవనాన్ని కూడా చుట్టుముట్టారు. భవనం లోపలికి ప్రవేశించి అక్కడి వస్తువులను పగులగొట్టారు. విషయం తెలుసుకున్న పోలీసులు ఈ అల్లర్లలో అనేక మందిని అరెస్ట్ చేశారు. దేశవ్యాప్తంగా అనేక మందిని అదుపులోకి తీసుకున్నారు. కానీ 103 మందిని మాత్రమే మిలిటరీ కోర్టుకు అప్పగించారు. ఇక అప్పటి నుంచి ఆ నిరసన కారులంతా జైల్లోనే ఉంటున్నారు.

అయితే తాజాగా ఈ ఘటనపై మిలిటరీ కోర్టు విచారణ చేపట్టింది. ఈక్రమంలోనే 25 మంది పౌరులను దోషులుగా తేల్చింది. నిందితులకు రెండు నుంచి పదేళ్ల పాటు జైలుశిక్షను విధించింది. ముఖ్యంగా 14 మందికి 10 సంవత్సరాల జైలు శిక్ష విధించిన కోర్టు.. మిగతా 11 మందికి తక్కువ శిక్షను విధించింది. అయితే త్వరలోనే మిగతా వాళ్లకు కూడా శిక్షలు విధిస్తామని.. గడువు ప్రక్రియ ముగిసిన తర్వాత ఆ అంశాన్ని పరిశీలిస్తామని న్యాయస్థానం చెప్పిది.

ఇది ఇలా ఉండగా.. ప్రస్తుతం ఇమ్రాన్ ఖాన్ అడియాలా జైలులో ఉన్నారు. అల్ ఖాదిర్ ట్రస్టు కేసులోనే ఈయన అరెస్ట్ అయినప్పటికీ మరిన్ని కేసుల్లోనూ ఇరుక్కున్నారు. ప్రస్తుతం అనేక కేసుల్లో ఆరోపణలు ఎదుర్కుంటున్న ఈయనకు మద్దతుగా గత నెలలో కూడా పీటీఐ మద్దతు దారులు ఆందోళనలు చేపట్టారు. ఈ ఘటనలో అనేక ప్రాణాలు కోల్పోయారు. మరెన్నో వందల మంది గాయపడ్డారు.