ఆ ట్యాక్స్ పేయర్ల 'రీఫండ్' నిలిపివేత.. ఐటీ శాఖ ప్రకటన.. వెంటనే ఇలా చేయండి

ఆదాయపు పన్ను చెల్లింపుదారులు ప్రతి సంవత్సరం కచ్చితంగా ఇన్‌కమ్ ట్యాక్స్ రిటర్న్స్ ఫైల్ చేయాల్సి ఉంటుంది. తమ ఆదాయ, వ్యయాలు, ట్యాక్స్ చెల్లింపులు, తమకు రావాల్సిన రీఫండ్ సొమ్ముల గురించి అందులో పేర్కొనాలి. ఆ ఐటీఆర్‌ని ఇన్‌కమ్ ట్యాక్స్ విభాగం ప్రాసెస్ చేసి ఎక్కువ ట్యాక్స్ కట్టారని తేలితే రీఫండ్ చేస్తుంది. ఇప్పటికే రూ. 3.08 లక్షల కోట్ల రీఫండ్ సొమ్ములు ట్యాక్స్ పేయర్ల ఖాతాల్లో జమ చేసినట్లు ఇటీవలే కేంద్ర ఆర్థిక మంత్రిత్వ శాఖ సోషల్ మీడియా ఎక్స్ వేదికగా వెల్లడించింది. అయితే, ఇంకా చాలా మందికి రీఫండ్ సొమ్ములు రావాల్సి ఉంది. ఈ క్రమంలోనే ఐటీ శాఖ ఎక్స్ వేదికగా కీలక ప్రకటన చేసింది.

పన్ను చెల్లింపుదారులు ఇన్‌కమ్ ట్యాక్స్ ఇ-ఫైలింగ్ పోర్టల్ ద్వారా తమ బ్యాంక్ ఖాతను ప్రీ వాలిడేట్ చేయాలని తెలిపింది. వాలిడ్ బ్యాంక్ ఖాతా ఉన్న వారికి మాత్రమే రీఫండ్ డబ్బులు జమ చేయడం జరుగుతుందని స్పష్టం చేసింది. ' ట్యాక్స్ పేయర్లూ దయచేసి వినండీ. రీఫండ్ డబ్బులు పొందాలంటే వాలిడేటెడ్ బ్యాంక్ అకౌంట్ తప్పనిసరిగా ఉండాలి. ఎలాంటి ఇబ్బందులు లేకుండా రీఫండ్ డబ్బులు రావాలంటే ముందుగా ఇ-ఫైలింగ్ పోర్టల్‌లో మీ బ్యాంక్ అకౌంట్ వాలిడేషన్ స్టేటస్ చెక్ చేసుకోండి. బ్రాంచ్ మారినప్పుడు, ఐఎఫ్ఎస్ కోడ్ మారినప్పుడు లేదా బ్యాంక్ విలీనం అయినప్పుడు కచ్చితంగా తమ బ్యాంక్ ఖాతాలను రీవాలిడేట్ చేయాల్సి ఉంటుంది. వాలిడ్ బ్యాంక్ ఖాతా ఉన్న వారికే రీఫండ్ సొమ్ము జమ అవుతుంది' అని ఆదాయపు పన్ను శాఖ తెలిపింది.

తమ బ్యాంక్ ఖాతాలను అప్డేట్ చేసుకునేందుకు ఇన్‌కమ్ ట్యాక్స్ ఇ-ఫైలింగ్ పోర్టల్‌లోకి లాగిన్ అయ్యి పూర్తి చేయాలని కోరింది. ఇ-ఫైలింగ్ పోర్టల్‌లో వాలిడ్ యూజర్ ఐడీ, పాస్‌వర్డ్ ద్వారా రిజిస్టర్ కావాలి. రీవాలిడేటెడ్ చేయాలనుకుంటున్న బ్యాంక్ ఖాతా కచ్చితంగా పాన్ కార్డుతో లింక్ అయి ఉండాలి. బ్యాంక్ అకౌంట్ రీవాలిడేటెడ్ చేసే ప్రాసెస్ ఇప్పుడు మనం తెలుసుకుందాం.

వరుసగా మూడో రోజు తగ్గిన బంగారం ధరలు

ముందుగా ఇ-ఫైలింగ్ పోర్టల్ https://incometax.gov.in/iec/foportal/లోకి వెళ్లాలి.

మీ వివరాలతో లాగిన్ అయ్యి ప్రొఫైల్ ఆప్షన్ పై క్లిక్ చేయాలి.

బ్యాంక్ ఖాతా ఆప్షన్ ఎంపిక చేసుకోవాలి. ఆ తర్వాత రీవాలిడేట్ ఆప్షన్‌పై క్లిక్ చేయాలి.

మీ బ్యాంక్ అకౌంట్ వివరాలు అకౌంట్ నంబర్, ఐఎఫ్ఎస్‌సీ, అకౌంట్ కేటగిరీ అప్డేట్ చేసుకోవాలి.

వివరాలు అన్నీ ఎంటర్ చేసిన తర్వాత వాలిడేట్ ఆప్షన్‌పై క్లిక్ చేయాలి.