సామాన్యులకు నిరాశ.. హెల్త్ ఇన్సూరెన్స్ జీఎస్టీ తొలగింపుపై మండలి కీలక ప్రకటన

ఆరోగ్య బీమా, జీవిత బీమా పాలసీ ప్రీమియంపై వస్తు సేవల పన్ను తొలగింపుపై ఆశలు పెట్టుకున్న వారికి మళ్లీ నిరాశే ఎదురైంది. ముఖ్యంగా ఇది సహా ఇంకొన్ని అంశాలే ప్రధాన ఎజెండాగా జీఎస్టీ కౌన్సిల్ సమావేశం శనివారం మొదలైంది. కేంద్ర ఆర్థిక శాఖ మంత్రి నిర్మలా సీతారామన్ ఈ 55వ మండలి సమావేశానికి నేతృత్వం వహించారు. రాజస్థాన్‌లోని జైసల్మేర్ దీనికి వేదిక. పలు వస్తువులపై రేట్ల హేతుబద్ధీకరణ, పన్ను శ్లాబుల్లో మార్పులు వంటి ఎన్నో అంశాలు దీంట్లో చర్చకు రానుండగా.. హెల్త్, లైఫ్ ఇన్సూరెన్స్‌పై జీఎస్టీ తొలగింపు అంశాన్ని మండలి మరోసారి వాయిదా వేయడం గమనార్హం. దీనిపై మరింత పరిశీలన అవసరం అని మండలి అభిప్రాయపడినట్లు తెలిసింది.

ఎప్పటినుంచో ఈ బీమా, టర్మ్ జీవిత బీమా పాలసీలపై జీఎస్టీ మినహాయించాలని పాలసీ హోల్డర్లు ఎప్పటి నుంచో కోరుతున్నారు. దీనిపై ఏర్పాటైన మంత్రుల బృందం నవంబర్ నెలలోనే సమావేశమై చర్చించింది. ఈ బృందం.. జీఎస్టీ తొలగించేందుకు నిర్ణయించింది. టర్మ్ పాలసీలతో పాటు పెద్దలు తీసుకున్న హెల్త్ ఇన్సూరెన్స్ పాలసీలపై జీఎస్టీ రద్దుకు ఇదివరకే మంత్రుల బృందం సుముఖత వ్యక్తం చేసింది.

ఇదే సమయంలో సాధారణ వ్యక్తులు తీసుకునే రూ. 5 లక్షల్లోపు ఆరోగ్య బీమా పాలసీలపైనా జీఎస్టీ మినహాయించాలని.. రూ. 5 లక్షలు దాటిన ఆరోగ్య బీమా పాలసీలకు కూడా ప్రస్తుతం 18 శాతం జీఎస్టీ కొనసాగించాలని నిర్ణయించింది. సమావేశం ఆరంభంలోనే దీనిపై చర్చించిన కౌన్సిల్.. అంశాన్ని మరోసారి వాయిదా వేసింది. దీంతో సామన్యులకు మరోసారి నిరాశే ఎదురైందని చెప్పొచ్చు. ఇతర అంశాలపైన చర్చ జరుగుతోంది.

ఇందులో స్విగ్గీ, జొమాటో వంటి ఫుడ్ డెలివరీ ప్లాట్‌ఫామ్స్‌పై విధిస్తున్న 18 శాతం జీఎస్టీని 5 శాతానికి తగ్గించేందుకు ఫిట్‌మెంట్ కమిటీ ప్రతిపాదించింది. పాత విద్యుత్ వాహనాలతో పాటు చిన్న పెట్రోల్ లేదా డీజిల్ కార్లపైన ప్రస్తుతం 12 శాతం జీఎస్టీ ఉండగా.. దీనిని 18 శాతానికి పెంచాలన్న ప్రతిపాదనపైనా దాదాపు ఓకే చెప్పినట్లు తెలుస్తోంది. మంత్రుల బృందం మొత్తం 148 వస్తువుల రేట్లను హేతుబద్ధీకరించాలని ప్రతిపాదించింది. దీంట్లోనే శీతలపానీయాలు, పొగాకు ఉత్పత్తులు, సిగరెట్లు ఉన్నాయి. వీటిపై జీఎస్టీ పెంచాలనే డిమాండ్ ఉంది. ప్రస్తుతం జీఎస్టీలో పన్ను శ్లాబులు 0, 5, 12, 18, 28 శాతంగా ఉండగా కొత్తగా 35 శాతం కొత్త శ్లాబ్ తీసుకురావాలనే ప్రతిపాదన కూడా ఉంది.