అమ్మానాన్న, ఓ కొడుకు.. హిజ్రా ఎంట్రీతో మారిపోయిన జీవితాలు

వారిదో మధ్యతరగతి కుటుంబం.. తండ్రీ,తాతల నుంచి ఆస్తిపాస్తులేవీ రాలేదు. కానీ ఉన్నంతలో సంతోషంగా గడిపే ఫ్యామిలీ. రోజంతా పూలు అమ్మడం, వచ్చినదాంతోనే సంతృప్తిపడటం. తమ ఆనందాన్ని తమ కొడుకులో చూసుకుంటూ మురిసిపోయారు ఆ ఇద్దరు దంపతులు. ఒక్కగానొక్క కొడుకు కావటంతో కష్టం తెలియకుండా పెంచారు. తమలా ఇబ్బందులు పడకూడదని.. తమ కొడుకు గొప్పోడు కావాలని కలలు కన్నారు. ఆ కలలను నిజం చేసుకునేందుకు కొడుకును ఉన్నత చదువులు చదివించారు. పూలు అమ్మతూనే బీటెక్ వరకూ చదివించారు. కానీ ఆ కన్నవాళ్ల ఆశలు తీరలేదు. కొడుక్కి చదువు అబ్బలేదు. అలాగని కొడుకును ఆ తల్లిదండ్రులు తక్కువ చేసి చూడలేదు.

చదువు రాకపోతే ఏం.. గొప్పోడు కావాలంటే చదువొక్కటే సరిపోతుందా అని సరిపెట్టుకున్నారు. చదువు రాకుండానే గొప్పోళ్లు అయినవాళ్లు లేరా అని తమను తాము ఓదార్చుకున్నారు. ఎలాగైనా కొడుకును ప్రయోజనకుణ్ని చేయాలనే ఉద్దేశంతో.. ఓ ఆటో తీసిచ్చారు. కానీ అదే వారి పాలిట శాపమైంది. భవిష్యత్తులో జరగబోయే పరిణామాలను అంచనా వేయలేక ఆ తల్లిదండ్రులు వేసిన ఆ అడుగే.. కొడుకు వేసే తప్పటడుగుగా మారి వారి ప్రాణాలను బలితీసుకుంది.

ఆటో తోలుతూ కొడుకు ఆర్థికంగా స్థిరపడిన తర్వాత ఓ మంచి అమ్మాయిని చూసి పెళ్లి చేయాలని, మనవళ్లు, మనవరాళ్లతో ఆడుకోవాలని ఆ తల్లిదండ్రులు భావించారు. కానీ తానొకటి తలిస్తే విధి ఒకటి తలిచిందన్నట్లు వారు అనుకున్నదేదీ జరగలేదు. ఆటో నడుపుకుంటున్న అతని ఆలోచనలు, అభిరుచులు మారిపోయాయి. ఆటో నడిపే సమయంలో హిజ్రాలతో పరిచయం ఏర్పడింది. ఆ పరిచయం కాస్తా స్నేహంగా మారింది. ఇది ఎంత వరకూ వెళ్లిందంటే హిజ్రాలు అతని కోసం ఇంటికి కూడా రావటం కూడా ప్రారంభమైంది. దీంతో తమ కొడుకు పెళ్లిచేసుకుని ఓ ఇంటివాడు అవుతాడని సంబరపడిన అతని తల్లిదండ్రులు కంగారుపడ్డారు. కొడుకును గట్టిగా నిలదీశారు. ఇలాంటి పనులు మానుకోవాలని.. చక్కగా పెళ్లిచేసుకుని జీవించాలని సూచించారు.

దీంతో ఇంట్లో గొడవలు మొదలయ్యాయి. అల్లారుముద్దుగా ఏ కష్టం కలగనీయకుండా పెంచుకున్న కొడుకు.. తల్లిదండ్రులను ఎదిరించడం మొదలెట్టాడు. కాళ్లా వేళ్లా పడి ప్రాధేయపడినా వినని స్థితికి చేరుకున్నాడు. కౌన్సిలింగ్ ఇప్పించినా కూడా వినని పరిస్థితికి వెళ్లిపోయాడు. దీంతో ఏం చేయాలో పాలుపోని స్థితిలో ఆ తల్లిదండ్రులు కఠిన నిర్ణయం తీసుకున్నారు. గుండెల మీద ఎత్తుకుని ఆడించిన కొడుకు చేసిన పనితో గుండెలు పగిలిన ఆ దంపతులు.. ఈ లోకాన్ని విడిచిపెట్టి వెళ్లిపోవాలని నిర్ణయించుకున్నారు. ఎవరికి చెప్పినా.. తమ సమస్య పరిష్కారం కాదనే మానసిక వేదనతో గడ్డి మందు తాగి బలవన్మరణానికి పాల్పడ్డారు. నంద్యాలలో జరిగిన ఈ ఘటన విన్నవారిని సైతం కన్నీరు పెట్టిస్తోంది.