పుట్టిన రోజుకి పిలిచి బట్టలు విప్పించారు.. ఆపై కొట్టి మూత్రం తాగించారు

పదో తరగతి చదువుతున్న ఓ 17 ఏళ్ల బాలుడిపై అతడి స్నేహితులు దారుణంగా ప్రవర్తించారు. స్నేహితుడి పుట్టిన రోజు ఉంది రమ్మని పిలిచి అతడిని ఘోరంగా హింసించారు. ముందుగా ఏకాంత ప్రదేశానికి తీసుకువెళ్లి మరీ అతడితో బట్టలు విప్పించారు. ఆపై ముగ్గురు అబ్బాయిలు, ఓ అమ్మాయి కలిసి అతడిని విపరీతంగా కొట్టారు. అది చాలదన్నట్లుగా అబ్బాయిలు మూత్ర విసర్జన చేశారు. దీన్ని అమ్మాయి వీడియో తీసింది. ఇంతటితో ఆగకుండా ఉమ్ము, మూత్రం కలిపి ఓ గ్లాసులో పట్టి అతడితో బలవంతంగా తాగించారు. దీంతో తీవ్ర మనస్తాపానికి గురైన ఆ బాలుడు ఏం చేశాడంటే?

ఉత్తర ప్రదేశ్‌లోని కప్టైన్‌గంజ్ సమీపంలో ఉన్న బస్తీలో ఆశతో పాటు ఆమె భర్త, కుమారుడు నివాసం ఉంటున్నారు. వీరు కుమారుడకి 17 ఏళ్ల వయసు కాగా.. స్థానికంగా ఉన్న ఓ ప్రభుత్వ పాఠశాలలో అతడు పదో తరగతి చదువుతున్నాడు. అయితే డిసెంబర్ 20వ తేదీ రోజు రాత్రి వినయ్ కుమార్ అనే బాలుడు తన స్నేహితురాలి పుట్టిన రోజుకు రావాలంటూ సదరు బాలుడికి ఫోన్ చేశాడు. దీంతో బాలుడు వస్తానని చెప్పాడు. చెప్పినట్లుగానే సాయంత్రం వారి ఇంటికి వెళ్లాడు.

అక్కడ పుట్టిన రోజు చేసుకునే అమ్మాయితో పాటు మరో ముగ్గురు స్నేహితులు కూడా ఉన్నారు. వారంతా బాలుడికి తెలిసిన వాళ్లే. అయితే అతడు వారి ఇంటికి వెళ్లిన వెంనటే.. అతడిని ఇంటి వెనకాల ఉన్న నిర్మానుష్య ప్రదేశానికి తీసుకువెళ్లారు. ఆపై అతడిని బట్టలు విప్పమని బలవంతం పెట్టారు. ఆపై నలుగురూ కలిసి విపరీతంగా కొట్టారు. అది చాలదన్నట్లుగా అతడిపై మూత్ర విసర్జన కూడా చేశారు. ఇంతటితో ఆగకుండా ఉమ్మి, మూత్రాన్ని ఓ గ్లాసులో పట్టి అతడితో బలవంతంగా తాగించారు. దీన్నంతటినీ ఫోన్‌లో చిత్రీకరించారు. కానీ బాలుడు వారి కాళ్లావేళ్లా పడగా డిలీట్ చేసేశారు. ఆపై అతడిని వదిలేసి వాళ్లు ఇంట్లోకి వెళ్లిపోయారు.

స్నేహితులు ఘోరంగా అవమానించడంతో.. తీవ్ర మనస్తాపానికి చెందిన బాలుడు ఏడుస్తూనే ఇంటికి చేరాడు. ఆపై పడుకుంటానని చెప్పి వెళ్లి కన్నీరు కారుస్తూనే ఉన్నాడు. పొద్దున వరకూ అతడు అలాగే ఉండేసరికి తల్లిదండ్రులు ఏమైందని అడగ్గా.. జరిగిందంతా చెప్పాడు. దీంతో కుటుంబ సభ్యులు వెంటనే స్థానికంగా ఉన్న పోలీసు స్టేషన్‌కు వెళ్లి ఫిర్యాదు చేయాలనుకున్నారు. కానీ వారి ఫిర్యాదును పోలీసులు తీసుకోలేదు. ఇలా మూడు రోజులు తిరిగినా.. లాభం లేకపోయింది. దీంతో బాలుడు మరింత కలత చెందాడు. పదే పదే తనకు జరిగిన అవమానాన్ని గుర్తు చేసుకుంటూ... మనస్తాపం చెందాడు. ఈక్రమంలోనే ఇంట్లో ఎవరూ లేని సమయం చూసి ఆత్మహత్యకు పాల్పడ్డాడు.

కుమారుడు చనిపోవడంతో.. తల్లిదండ్రులు మరోసారి పోలీసు స్టేషన్‌కు వెళ్లి అతడి స్నేహితులపై ఫిర్యాదు చేశారు. బాలుడు ఆత్మహత్య చేసుకోవడంతో పోలీసులు కూడా కేసు నమోదు చేసుకుని దర్యాప్తు ప్రారంభించారు. అతడితో అసభ్యంగా ప్రవర్తించి, అమానుషంగా అవమానించిన నలుగురు విద్యార్థులపై పలు సెక్షన్ల కింద కేసులు నమోదు చేశారు. ఆపై ముగ్గురు నిందితులను అరెస్ట్ చేశారు. మరో బాలుడు పరారీలో ఉన్నాడని కానీ త్వరలోనే అతడిని కూడా పట్టుకుంటామని పోలీసులు వివరిస్తున్నారు.