న్యూ ఇయర్ వేళ పేరు మార్చుకున్న ఎలన్ మస్క్.. కొత్త పేరు ఏంటంటే

ప్రపంచ కుబేరుడు, టెస్లా సీఈఓ ఎలన్ మస్క్ గురించి తెలియని వాళ్లు ఉండరు అంటే అతిశయోక్తి కాదు. గతంలో ట్విట్టర్ పేరును ఎక్స్‌గా మార్చిన ఆయన తాజాగా తన పేరును మార్చేసుకున్నారు. ఎక్స్ ఖాతాలో ఎలన్ మస్క్ పేరును తొలగించి కేకియస్ మాక్సిమస్‌గా పెట్టారు. అలాగే తన ఫొటోకు బదులుగా పెపే ది ఫ్రాగ్ ఫొటోను పెట్టి నెటిజెన్లకు షాక్ ఇచ్చారు. ప్రపంచం అంతా 2024 సంవత్సరానికి గుడ్ బై చెప్పేసి 2025కి స్వాగతం చెప్పబోతున్న ఎలన్ మస్క్ పేరు మార్చుకోవడంతో ప్రజలు అంతా ఆయన కొత్త పేరుకు అర్థం ఏంటో తెలుసుకునే పనిలో పడ్డారు. ఆ పూర్తి వివరాలు ఏంటో మనం ఇప్పుడు తెలుసుకుందాం.

2023 సంవత్సరంలో కూడా ఓసారి ఎలన్ మస్క్ తన పేరును "మిస్టర్ ట్వీట్"గా మార్చుకున్నారు. ఆ తర్వాత కొంత కాలానికే ట్విట్టర్ పేరును ఎక్స్‌గా మార్చేసి అందరికీ షాక్ ఇచ్చారు. అయితే తాజాగా తన అధికారిక ఎక్స్ ఖాతా పేరును కేకియస్ మాక్సిమస్‌గా మార్చారు. అలాగే "పెపే ది ఫ్రాగ్" ఫొటోను ఆయన ఖాతాకు పెట్టారు. అందులో పెపే పాత్ర వీడియో గేమ్ ఆడుతూ.. జాయ్‌స్టిక్‌ని పట్టుకుని కనిపించింది. ఇది చూసిన నెటిజెన్లు అంతా ఎలన్ మస్క్ పేరు మార్చుకోవడంపై ఆసక్తి కనబరుస్తున్నారు. ఆయన ఇలా ఎందుకు చేశారో తెలుసుకోవడంతో పాటు ఆయన పేరు వెనకాల ఉన్న అర్థం గురించి తెలుసుకుంటున్నారు.

కేకియస్ అనేది ఒక క్రిప్టో కరెన్సీ టోకెన్. కొన్ని రకాల బ్లాక్ చెయిన్ ప్లాట్‌ఫామ్స్‌లో ఇది దొరుకుతుంది. ఈ క్రిప్టో కరెన్సీ ఇటీవల కాలంలో పెట్టుబడిదారుల నుంచి ఔత్సాహికుల నుంచి గణనీయమైన దృష్టిని ఆకర్షించింది. ప్రస్తుతం మార్కెట్‌లో దీని యాక్టివిటీ విపరీతంగా పెరుగుతుంది. అయితే చాలా రోజులుగా క్రిప్టో కరెన్సీకి ఎలన్ మస్క్ మద్దతు ఇస్తున్నారు. ఈక్రమంలోనే తాజాగా ఆయన ఈ పేరు పెట్టుకోవడంతో.. క్రిప్టో కరెన్సీ మార్కెట్‌లో మస్క్ ప్రమేయం గురించి ఆలోచిస్తున్నారు. ఆయన పెట్టిన పేరుకు, ప్రొఫైల్ ఫొటోకు ఎలాంటి సంబంధమూ లేకపోయినప్పటికీ.. అంతా వాటికి ఏదో సంబంధం ఉండే ఉంటుందని అంచనాలు వేస్తున్నారు.

డిసెంబర్ 27వ తేదీ 2024 నాటికి కేకియస్ దాదాపు 0.005667 డాలర్ల వద్ద ట్రేడ్ కాగా.. 24 గంటల్లోపే 497.56 శాతం పెరుగుదలను సూచించింది. ఆ తర్వతా 24.30 శాతం క్షీణతను చవిచూసింది. మరోవైపు దాని ఆల్ టైమ్ కషిష్ట స్థాయి డిసెంబర్ 17వ తేదీన BTC0.00086488 వద్ద నమోదు కాగా దీని ప్రస్తుత విలువకు 815.30 శాతం ఆకట్టుకునే వృద్ధిని సూచిస్తోంది. ఇటీవలే మస్క్ కూడా దీనిపై స్పందించి కేకియస్ మాక్సిమస్ త్వరలో హార్డ్ కోర్ P0Eలో 80 శాతం స్థాయికి చేరుకుంటుందని చెప్పారు.