ఇది మహా కుంభమేళా డ్రోన్ వీడియో కాదు.. నిజం ఇక్కడ తెలుసుకోండి

ఉత్తర ప్రదేశ్‌లోని ప్రయాగ్ రాజ్‌లో మహా కుంభమేళా నిర్వహణ కోసం ఘనంగా ఏర్పాట్లు జరుగుతున్నాయి. సాధారణంగా కుంభమేళా 12 ఏళ్లకు ఒకసారి నిర్వహిస్తారు. 12 పూర్ణ కుంభమేళాలు పూర్తైన తర్వాత వచ్చే కుంభమేళాను మహా కుంభమేళా అంటారు. అంటే 144 ఏళ్లకు ఒకసారి మాత్రమే వస్తుందన్నమాట. మహా కుంభమేళాలో పాల్గొనే అదృష్టం అందరికీ ఉండదు. అందువల్ల ఈసారి మహా కుంభమేళాకు 40 కోట్ల మంది భక్తులు హాజరయ్యే అవకాశం ఉందని అధికారులు అంచనా వేస్తున్నారు. ఇదిలా ఉంటే, మహా కుంభమేళా ఏర్పాట్లకు సంబంధించి ఓ డ్రోన్ వీడియో సోషల్ మీడియాలో విస్తృతంగా షేర్ (ఇక్కడ, ఇక్కడ) అవుతోంది. 5000 డ్రోన్లతో కూడిన ఈ దృశ్యం ప్రయాగ్‌రాజ్ మహాకుంభ్‌లోనిదని పేర్కొంటున్నారు. మరి ఈ వీడియోలో నిజమెంత?

యూజర్ల వాదన ఏమిటి?

ఎక్స్‌ (ట్విట్టర్)లో @SanatniDarshita అనే ఖాతా నుంచి డ్రోన్ షో వీడియోను షేర్ చేస్తూ.. - ‘అద్భుతమైన, అలౌకికమైన ప్రయాగ్‌రాజ్ మహాకుంభ్’ అని పేర్కొన్నారు. ఈ వీడియోలో వేలాది సంఖ్యలో డ్రోన్లు కనిపిస్తున్నాయి. డ్రోన్లతో ఆకాశంలో వివిధ థీమ్‌లను ప్రదర్శించారు.

ఎక్స్‌లో @ManishKasyapsob అనే ఖాతా నుంచి కూడా ఇదే క్యాప్షన్‌తో ఈ వీడియోను షేర్ చేశారు. ఫేస్‌బుక్‌లోనూ కొంత మంది ఈ వీడియోను పోస్టు చేశారు.

ఈ వీడియోలో నిజమెంత?

వైరల్ అవుతున్న ఈ వీడియో ప్రయాగ్‌రాజ్ కుంభమేళా ఏర్పాట్లకు సంబంధించిందా? కాదా అనే విషయం తెలుసుకునేందుకు సజగ్ బృందం ప్రయత్నించింది. ఈ వీడియోను జాగ్రత్తగా గమనిస్తే.. అందులో కనిపిస్తున్నవారు విదేశీయులని తెలుస్తోంది. అంటే, అది భారతదేశం వెలుపలిదని అర్థమవుతోంది.

ఆ తర్వాత సజగ్ బృందం వైరల్ వీడియో నుంచి కొన్ని స్క్రీన్‌షాట్‌లను తీసుకొని, రివర్స్ ఇమేజ్ మెథడ్ ద్వారా పరిశీలించగా.. ఒరిజినల్ వీడియోలు కనిపించాయి. అమెరికాలోని టెక్సాస్‌లో గత ఏడాది డిసెంబర్ 7న క్రిస్మస్ నేపథ్యంలో అతిపెద్ద డ్రోన్ షో నిర్వహించారు. దీనికి సంబంధించిన దృశ్యాలను తీసుకొని ప్రయాగ్‌రాజ్ వీడియోగా షేర్ చేస్తున్నట్లు మా పరిశోధనలో తేలింది.

క్రిస్మస్‌ వేడుకల్లో భాగంగా 5 వేలకు పైగా డ్రోన్లతో ఆకాశంలో ఎగిరే శాంతాక్లాజ్‌ థీమ్‌లను ప్రదర్శించారు. స్కైఎలిమెంట్స్ డ్రోన్స్ సంస్థ నిర్వహించిన ఈ ప్రదర్శన గిన్నిస్ బుక్ ఆఫ్ రికార్డ్స్‌లోనూ చోటు దక్కించుకుంది.

 టైమ్స్ ఆఫ్ ఇండియా డిసెంబర్ 7న ఈ ఈవెంట్‌కు సంబంధించిన వార్తా కథనాన్ని (ఇక్కడ) ప్రచురించింది. స్కైఎలిమెంట్స్ డ్రోన్స్ షేర్ చేసిన వీడియోను సోషల్ మీడియాలో అనేక మంది పోస్ట్ చేశారు. అందులో ఎక్కడా ప్రయాగ్‌రాజ్ ప్రస్తావన లేదు.

ప్రయాగ్‌రాజ్‌లోని మహా కుంభమేళా జరిగే ప్రదేశాల్లో ఏర్పాట్లు చురుగ్గా కొనసాగుతున్నాయి. త్రివేణి సంగమం ఘాట్, హనుమాన్ ఆలయ కారిడార్, సరస్వతి ఘాట్, అరైల్ ఘాట్ మార్గాలను అందంగా అలంకరించారు. కుంభమేళాకు తరలివచ్చే కోట్లాది మంది భక్తుల సౌకర్యార్థం 1,60,000 టెంట్లు ఏర్పాట్లు చేస్తున్నారు. స్నానపు ఘాట్లు, స్నానానంతరం దుస్తులు మార్చుకునే గదులను సిద్ధం చేశారు. కుంభమేళా ప్రాంతంలో ఫ్లోటింగ్ బ్రిడ్జిలు నిర్మిస్తున్నారు. ఈ బ్రిడ్జిలపై నడిచేందుకు మాత్రమే కాకుండా.. 5 టన్నుల బరువున్న వాహనాలను కూడా తీసుకెళ్లవచ్చు.

జనవరి 13 నుంచి ఫిబ్రవరి 26 వరకు వేలాది మంది పోలీసులు, స్పెషల్ కమాండోలతో భారీ భద్రత ఏర్పాటు చేస్తున్నారు. మహా కుంభమేళా ప్రత్యేకత, ఏర్పాట్లకు సంబంధించిన వార్తల నేపథ్యంలో సోషల్ మీడియాలో #MahaKumbh2025 ట్యాగ్ ట్రెండ్ అవుతోంది. ఇలాంటి సమయంలో కొన్ని ఫేక్ వార్తలు, వీడియోలు కూడా వైరల్ అయ్యే ప్రమాదం ఉంది.

ఇది అసలు వాస్తవం...?

ప్రయాగ్‌రాజ్‌లోని మహా కుంభమేళా ఏర్పాట్లకు సంబంధించిన దృశ్యాలు అంటూ షేర్ చేస్తున్న డ్రోన్ షో వీడియో ఇక్కడిది కాదు. అమెరికాలో క్రిస్మస్‌కు ముందు నిర్వహించిన డ్రోన్ షో వీడియోను తప్పుదోవ పట్టించే క్లెయిమ్‌తో షేర్ చేస్తున్నారు.