ఒకే దశలో ఢిల్లీ అసెంబ్లీ ఎన్నికలు.. ఫిబ్రవరి 5న పోలింగ్

ఢిల్లీ శాసనసభ ఎన్నికలకు కేంద్ర ఎన్నికల కమిషన్ షెడ్యూల్ విడుదల చేస్తోంది. ఫిబ్రవరి 5న ఒకే దశలో 70 స్థానాలకు పోలింగ్ నిర్వహిస్తున్నట్టు తెలిపారు. జనవరి 10 నోటిఫికేషన్ విడుదలవుతుందని.. ఆ రోజు నుంచే నామినేషన్ ప్రక్రియ మొదలవుతుందని ఈసీ తెలిపింది. నామినేషన్లకు చివరి తేదీ జనవరి 17.. పరిశీలన జనవరి 18న.. విత్‌డ్రాలు జనవరి 20. ఫిబ్రవరి 5న పోలింగ్ నిర్వహించి.. 8న ఓట్లను లెక్కించి ఫలితాలు వెల్లడిస్తారు. సాయంత్రం 6 గంటల వరకు క్యూలో ఉన్నవారికి ఓటువేసే అవకాశం కల్పిస్తున్నట్టు సీఈసీ తెలిపారు.

ఢిల్లీలో మొత్తం 1.55 కోట్ల ఓటర్లు ఉన్నారని, పేరు నమోదుచేసుకోని అర్హులైన ఓటర్లు నామినేషన్ ప్రక్రియ ముగిసే పది రోజుల్లోపు రిజిస్టర్ చేసుకోవచ్చని రాజీవ్ కుమార్ తెలిపారు.  ప్రధాన ఎన్నికల కమిషనర్ రాజీవ్ కుమార్ మాట్లాడుతూ.. సీఈసీగా ఇదే తన చివరి ప్రెస్ కాన్ఫరెన్స్ అని చెప్పారు. ‘‘ఎన్నికలపై రాజకీయ పార్టీలు కొన్ని రకాల ఆందోళనలు లేవనెత్తాయి... ఓటర్ల జాబితాలో నకిలీ ఓటర్ల చేర్పులు, తొలగింపులు జరిగాయని... కొన్ని వర్గాలను టార్గెట్‌ చేసి వారి పేర్లను తొలగిస్తున్నారని ఆరోపించారు.. ఈవీఎంలపై స్పష్టత ఇచ్చిన తర్వాత కూడా అనుమానాలు వ్యక్తం చేస్తున్నారు’ అని తెలిపారు.

గతేడాది ఎన్నికలను ప్రశాంతంగా నిర్వహించామని చెప్పారు. దేశంలో ఓటర్ల సంఖ్య 99 కోట్లకు చేరిందని సీఈసీ వివరించారు. ఈ ఏడాదిలో తొలిసారి ఎన్నికలు జరగబోతున్నాయని తెలిపారు. ఓటర్ లిస్ట్, ఈవీఎంల ట్యాంపరింగ్ ఆరోపణలు అవాస్తమని కొట్టిపారేశారు. ఈవీఎంలతోనే ఎన్నికల పారదర్శకంగా జరుగుతాయని, రిగ్గింగ్‌కు అవకాశం లేదని రాజీవ్ కుమార్ స్పష్టం చేశారు. హ్యాకింగ్ అవాస్తమని ఆయన పేర్కొన్నాయి. ఇప్పటి వరకూ ట్యాంపరింగ్ జరిగినట్టు ఆధారాల్లేవని పేర్కొన్నారు.

మొత్తం 70 స్థానాలున్న ఢిల్లీ అసెంబ్లీ గడువు ఫిబ్రవరి 23 తేదీతో ముగియనుంది. దీంతో ఎన్నికల నిర్వహణకు ఈసీ ఏర్పాట్లు చేసింది. ఢిల్లీలో ఐదేళ్ల కిందట ఫిబ్రవరి 2020లో ఎన్నికలు జరిగిన విషయం తెలిసిందే. మంగళవారం మధ్యాహ్నం 2 గంటలకు ఈసీ మీడియా సమావేశం ఏర్పాటుచేసింది. ఎన్నికల తేదీలను ప్రకటించనుంది. ఇప్పటికే ఆమ్ ఆద్మీ పార్టీ 70 స్థానాలకు తన అభ్యర్థులను ప్రకటించింది. బీజేపీ, కాంగ్రెస్‌లు కూడా సీట్లకు అభ్యర్థులను ప్రకటించాయి. ఈ విషయంలో ఆప్ కన్వీనర్, మాజీ సీఎం అరవింద్ కేజ్రీవాల్ ఒక అడుగు ముందున్నారు.

ఇక, 2013, 2015, 2020లో జరిగిన అసెంబ్లీ ఎన్నికల్లో ఆప్ విజయం సాధించి.. ప్రభుత్వాలను ఏర్పాటుచేసింది. వరుసగా నాలుగోసారి ఢిల్లీలో ఆప్ జెండా ఎగురవేయాలని కేజ్రీవాల్ తన వ్యూహాలకు పదునుపెడుతున్నారు. అయితే, ఈసారి ఎలాగైనా హస్తినలో అధికారం దక్కించుకునేందుకు బీజేపీ పావులు కదుపుతోంది.

మద్యం పాలసీ కేసులో అరెస్టయి... జైలుకెళ్లిన అరవింద్ కేజ్రీవాల్‌కు సుప్రీంకోర్టు బెయిల్ మంజూరు చేసింది. జైలు నుంచి విడుదలైన తర్వాత ఆయన సీఎం పదవికి రాజీనామా చేసి.. తన వారసురాలిగా అతిషిని ముఖ్యమంత్రిని చేశారు. ఢిల్లీ ప్రజల తీర్పు తర్వాతనే మళ్లీ తాను సీఎం అవుతానని కేజ్రీవాల్ శపథం చేశారు. అయితే, మూడుసార్లు వరుసగా కేంద్రంలో అధికారంలోకి వచ్చిన బీజేపీ.. ఢిల్లీలో మాత్రం 27 ఏళ్లుగా విజయం కోసం ఎదురుచూడక తప్పడం లేదు. చివరిసారి 93 ఎన్నికల్లో గెలిచి.. 98 వరకు అధికారంలో ఉంది.