స్కూల్‌లో గుండెపోటుతో మూడో తరగతి చిన్నారి మృతి

మూడో తరగతి చదువుతోన్న చిన్నారి.. తరగతి గదిలోనే గుండెపోటుకు గురై ప్రాణాలు కోల్పోయింది. టీచర్‌కు తాను చేసిన హోంవర్క్ చూపిస్తున్న ఆ చిన్నారి.. ఒక్కసారిగా కుప్పకూలిపోవడంతో అంతా షాకయ్యారు. తక్షణమే స్పందించిన ఉపాధ్యాయులు.. ఆ పాపను ఆసుపత్రికి తరలిస్తుండగా మార్గమధ్యలోనే కన్నుమూసింది. అత్యంత విషాదకర ఈ ఘటన కర్ణాటకలోని చామరాజనగరలో సోమవారం చోటుచేసుకుంది. చామరాజనగరలోని సెయింట్ ఫ్రాన్సిస్‌ స్కూల్‌లో తేజస్విని (8) అనే చిన్నారి మూడో తరగతి చదువుతుంది. సోమవారం ఎంతో ఉత్సాహంగా పాఠశాలకు వచ్చిన ఆ చిన్నారి.. స్నేహితులతో కబుర్లు చెప్పింది.

తరగతిలోకి టీచర్ రావడంతో హోంవర్క్‌ చూపించడానికి టేబుల్ దగ్గరకు వెళ్లింది. నోట్ బుక్ తీసి చూపిస్తూ మాట్లాడుతుండగా ఒక్కసారిగా పక్కకు ఒరిగిపోయింది. ఉపాధ్యాయులు తక్షణమే చికిత్స కోసం సమీపంలోని జేఎస్ఎస్ ఆసుపత్రికి తరలించారు. కానీ, అక్కడకు వెళ్లేసరికి ఆ చిన్నారి చనిపోయినట్టు వైద్యులు ధ్రువీకరించారు. గుండెపోటు కారణంగా ఆ బాలిక మరణించినట్లు వైద్యులు వెల్లడించారు. ఘటనపై స్పందించిన చామరాజనగర జిల్లా విద్యా అధికారి హనుమంతశెట్టి .. పాఠశాలకు చేరుకుని వివరాలను తెలుసుకున్నారు. తమ కుమార్తెకు ఎటువంటి అనారోగ్య సమస్యలూ లేవని తల్లిదండ్రులు తెలిపారు. ఈ ఘటనపై పోలీసులు దర్యాప్తు చేపట్టారు.

కాగా, గత నెలలో ఉత్తర్‌ప్రదేశ్‌లోని అలీగఢ్‌లో 4 నాలుగేళ్ల బాలుడు గుండెపోటుకు గురైన చనిపోయిన విషయం తెలిసిందే. స్కూల్‌లో తన స్నేహితులతో కలిసి ఆట ఆడుకుంటూ ఆ చిన్నారి హఠాత్తుగా కుప్పకూలిపోయాడు. వెంటనే ఆసుపత్రికి తరలించినా ప్రయోజనం లేకపోయింది. మార్గమధ్యంలోనే ఆ బాబు కన్నుమూశాడు. దీనికి ముందు సెప్టెంబరులో లక్నోలో 9 ఏళ్ల బాలిక ఇలాగే స్కూల్‌లోనే గుండెపోటుకు గురైన ప్రాణాలు విడిచింది. ఒకప్పుడు గుండెపోటు అంటే వయసు మళ్లినవారిలోనే కనిపించేది.

కానీ, కోవిడ్-19 మహమ్మారి వ్యాప్తి తర్వాత వృద్ధులు నుంచి అప్పుడే పుట్టిన పిల్లలు సైతం కార్డియాక్ అరెస్ట్‌కు గురయి ప్రాణాలు కోల్పోవడం ఆందోళన కలిగిస్తోంది. తమ ఆసుపత్రి ఎమర్జెన్సీ వార్డులో గత రెండు నెలల్లో గుండెపోటు కేసులు 15-20 శాతం మేర పెరిగినట్టు బెంగళూరులోని వాక్‌హార్డ్ హాస్పిటల్ పేర్కొంది. యువతలో ముఖ్యంగా 25, ఆపై వయస్కులు గుండెపోటుకు గురవుతున్నారని తెలిపింది.

మారుతున్న జీవనశైలి, వాయు కాలుష్యం, ఒత్తిడి, డయాబెటిస్, అతిగా వ్యాయామం, స్టెరాయిడ్స్ తీసుకోవడం వంటి కారణాలు యువతలో గుండెపోటుకు దారితీస్తున్నట్టు వైద్య నిపుణులు చెబుతున్నారు. జన్యుపరంగా భారతీయులు గుండెపోటుకు గురయ్యే అవకాశం ఉందని, పాశ్చాత్య జీవనశైలికి అలవాటు పడటం ప ప్రమాదాన్ని మరింత పెంచుతుందని అంటున్నారు.