కెనడా ప్రధాని రేసులో భారతీయులు.. జస్టిన్ ట్రూడో రాజీనామాతో తెరపైకి అనితా, చాహల్

గత కొంత కాలంగా వ్యక్తం అవుతున్న తీవ్ర వ్యతిరేకతను తట్టుకోలేక తాను రాజీనామా చేయనున్నట్లు కెనడా ప్రధానమంత్రి జస్టిన్ ట్రూడో సోమవారం ప్రకటించిన విషయం తెలిసిందే. అయితే కెనడా ప్రధాని పదవితోపాటు అధికార లిబరల్ పార్టీ నాయకత్వం నుంచి కూడా తప్పుకోనున్నట్లు జస్టిన్ ట్రూడో స్పష్టం చేశారు. ఈ క్రమంలోనే కెనడాలో రాజకీయాలు హాట్ హాట్‌గా సాగుతున్నాయి. ఈ నేపథ్యంలోనే కెనడా తదుపరి ప్రధానమంత్రి ఎవరు అవుతారు అనే ఉత్కంఠ ఇప్పుడు తీవ్రం అవుతోంది. అయితే కెనడా తదుపరి ప్రధాని రేసులో భారత సంతతి నేతల పేర్లు వినిపిస్తున్నాయి. అనితా ఆనంద్‌, జార్జ్‌ చాహల్‌ అనే భారత సంతతి వ్యక్తులు కెనడా ప్రధాని పదవి కోసం ముందంజలో ఉన్నట్లు తెలుస్తోంది.

జస్టిన్ ట్రూడో రాజీనామా నేపథ్యంలో ఆయన స్థానంలో ఎవరిని కూర్చోబెట్టాలి అనే పనిలో లిబరల్ పార్టీ నిమగ్నం అయింది. అయితే లిబరల్ పార్టీ నుంచి ప్రముఖంగా కొంతమంది పేర్లు బాగా వినిపిస్తున్నాయి. కెనడా ప్రధాని రేసులో క్రిస్టినా ఫ్రీలాండ్‌, మార్క్‌ కార్నీ, డొమినిక్‌ లీ బ్లాంక్‌, మెలనీ జోలీ, ఫ్రాంకోయిస్‌ ఫిలిప్పీ, క్రిస్టీ క్లార్క్‌లకు అవకాశాలు కనిపిస్తున్నాయి. వీరితో పాటు భారత సంతతి వ్యక్తులు అయిన అనిత ఆనంద్‌, జార్జ్‌ చాహల్‌ పేర్లు కూడా వార్తల్లో నిలుస్తున్నాయి.

ఎవరీ అనితా ఆనంద్‌ 

తమిళ్‌, పంజాబీ మూలాలు ఉన్న 57 ఏళ్ల అనితా ఆనంద్‌ ఆక్స్‌ఫర్డ్‌ యూనివర్సిటీలో చదువుకున్నారు. అనితా ఆనంద్ తండ్రి తమిళనాడుకు చెందిన ఫిజీషియన్‌ కాగా.. ఆమె తల్లి పంజాబ్‌కు చెందినవారు. 2019లో ఓక్‌విల్లే నుంచి ఆమె ఎంపీగా ఎన్నికయ్యారు. అయితే తొలిసారి ఎంపీగా గెలిచిన వెంటనే జస్టిన్ ట్రూడో కేబినెట్‌లో మంత్రిగా అనితా ఆనంద్‌కు చోటు దక్కడం గమనార్హం. ఇక 2019 నుంచి 2021 వరకు ఆమె పబ్లిక్ సర్వీసెస్ మంత్రిగా పని చేశారు. అనంతరం 2 ఏళ్ల పాటు రక్షణమంత్రిగానూ ఉన్నారు. అయితే అనితా ఆనంద్.. కెనడా రక్షణ శాఖ మంత్రిగా ఉన్న సమయంలోనే ఉక్రెయిన్‌కు ఆర్థిక ప్యాకేజీని ప్రకటించడం గమనార్హం. గత నెలలో మంత్రివర్గ పునర్‌వ్యవస్థీకరణ తర్వాత రవాణా, అంతర్గత వాణిజ్య వ్యవహారాల మంత్రిగా బాధ్యతలు చేపట్టారు.

ఎవరీ జార్జ్‌ చాహల్‌?

ఇక మరో భారత సంతతికి చెందిన జార్జ్ చాహల్‌ ప్రస్తుతం హౌస్‌ ఆఫ్‌ కామన్స్‌ సభ్యుడిగా కొనసాగుతున్నారు. సహజ వనరులపై ఏర్పాటు చేసిన స్టాండింగ్‌ కమిటీకి జార్జ్ చాహల్ నేతృత్వం వహించారు. సిక్కుల కాకస్‌కు అధ్యక్షుడిగా కూడా ఈయన పనిచేశారు. అయితే జార్జ్ చాహల్‌ను.. లిబరల్‌ పార్టీ లెజిస్లేటివ్‌ కాకస్‌ తాత్కాలిక నేతగా నియమించింది. ఈ కారణంగానే జార్జ్ చాహల్.. లిబరల్ పార్టీ నాయకుడిగా గెలిచినా.. కెనడా ప్రధానమంత్రి పదవిని చేపట్టేందుకు అర్హుడు కాదని తెలుస్తోంది. కెనడా చట్టాల ప్రకారం.. తాత్కాలిక నేతలు ప్రధానమంత్రి పదవి చేపట్టడానికి వీల్లేదని తెలుస్తోంది.