పెళ్లి రోజునాడే దంపతుల ఆత్మహత్య.. ఎలా ఒక్కటయ్యారో అలాగే భూమిలో కలిసిపోయారు

పెళ్లి జరిగి 28 సంవత్సరాలు అవుతోంది. ప్రతీ ఏడులాగే పెళ్లి రోజు నాడు వారిద్దరూ చాలా సంతోషంగా ఉంటారని అంతా భావించారు. కానీ వారి ఊహలకు అందనంత దూరానికి చేరుకుని ఆ జంట బంధువులందరికీ షాకిచ్చింది. ముఖ్యంగా వివాహ దినోత్సవం రోజే ఆత్మహత్య చేసుకుని తిరిగి రాని లోకాలకు వెళ్లిపోయారు. అంతేకాకుండా అందుకు గల కారణాలు ఏంటో చెబుతూ ఓ వీడియోను కూడా రిలీజ్ చేశారు. చనిపోయే కొన్ని క్షణాల ముందు పెట్టిన ఈ వీడియోలో తమ అంత్యక్రియలు ఎలా నిర్వహించాలో కూడా వివరించారు. అసలు ఈ జంట ఎందుకు చనిపోయింది, వీరి అంత్యక్రియలు ఎలా నిర్వహించాలని కోరిందో మనం ఇప్పుడు తెలుసుకుందాం.

మహారాష్ట్రలోని నాగ్ పూర్‌కు చెందిన 56 ఏళ్ల జెరిల్ అలియాస్ టోనీ ఆస్కార్ మోన్ క్రిప్ట్‌కు 45 ఏళ్ల అన్నీకి 28 ఏళ్ల క్రితం వివాహం జరిగింది. అయితే వీరికి ఇప్పటి వరకు పిల్లలు పుట్టలేదు. కానీ ఈ జంట మాత్రం చాలా సంతోషంగా జీవించేది. అన్నీ సోదరుడి పిల్లలనే తమ పిల్లలుగా భావిస్తూ.. కాలం వెళ్లదీస్తోంది. ఎంతో సంతోషంగా ఉండే ఈ జంట తాజాగా తమ 28వ పెళ్లి రోజు నాడే ఉరివేసుకుని ఆత్మహత్యకు పాల్పడింది. ఇంట్లోనే ఆత్మహత్య చేసుకున్న ఈ జంట.. చనిపోయే కొన్ని క్షణాల ముందే ఓ వీడియోను విడుదల చేసింది. ఆ వీడియో చూసిన బంధువులు వారి ఇంటికి చేరుకోగా.. భార్యాభర్తలిద్దరూ చనిపోయి కనిపించారు.

అది చూసి షాకైన బంధువులు వెంటనే పోలీసులకు ఫిర్యాదు చేశారు. కేసు నమోదు చేసుకున్న పోలీసులు మృతదేహాలను పోస్టుమార్టం నిమిత్తం స్థానిక ప్రభుత్వాసుపత్రికి పంపించారు. ఈక్రమంలోనే బంధువులను విచారించగా.. ఆత్మహత్యకు ముందు జెరిల్ పెట్టిన వీడియోను చూపించారు. అయితే ఆ వీడియోలో తాము ప్రస్తుతం అనేక ఆర్థిక సమస్యలు ఎదుర్కుంటున్నట్లు చెప్పారీ జంట. అలాగే తాము చనిపోయిన తర్వాత తమ ఆస్థిని.. తమ పిల్లలుగా భావించే అన్నీ సోదరుడి పిల్లలకు రాసివ్వాలని స్పష్టం చేశారు.

ఇది మాత్రమే కాకుండా బంధువులందరి పేర్లను తలుచుకుంటూ మరీ గుడ్ బై చెప్పారు. అలాగే తమ అంత్యక్రియలను కలిసే నిర్వహించాలని.. ముఖ్యంగా వారిద్దరి పెళ్లి రోజు బట్టలనే అంత్యక్రియల్లో వేయాలని కోరారు. ఆ తర్వాత ఒకరి చేతుని మరొకరి చేతులో వేసి కలిసే ఉంచి.. ఒకే స్మశాన వాటికలో పెట్టి ఖననం చేయాలని సూసైడ్ వీడియోలో వివరించారు. ఇదంతా చూసిన బంధువులు దీని ప్రకారమే వారికి అంత్యక్రియలు నిర్వహించారు. పెళ్లి రోజు ఎలాగైతే ఒక్కటయ్యారో అదే విధంగా చావులోనూ కలిసి భూమిలో కలిసిపోయారు.

ఇదంతా చూసిన బంధువులు, స్నేహితులు, స్థానికులు అందరూ కన్నీరుపెట్టారు. ఎంతో ప్రేమగా ఉండే ఈ జంట ఇలా ఆత్మహత్య చేసుకుంటుందని తామసలు భావించలేదని వివరించారు. పెళ్లిలో ఎలా ఒక్కటయ్యారో అలాగే వీరిని కలిసి ఖననం చేస్తుంటే మనసు తరుక్కుపోతుందని వివరించారు.