సంక్రాంతి రద్దీ.. కిక్కిరిసిన బస్టాండ్లు, రైల్వే స్టేషన్లు.. సీఎం కీలక ఆదేశాలు

పెద్ద పండగకు పట్నం మొత్తం పల్లెలకు తరలివెళ్తోంది. సంక్రాంతి పండుగ నేపథ్యంలో నగరవాసులు అందరూ సొంతూర్లకు బయల్దేరారు. దీంతో రైల్వేస్టేషన్లు, బస్టాండ్‌లు కిటకిటలాడుతున్నాయి. హైదరాబాద్, బెంగళూరు వంటి చోట్ల స్థిరపడిన ఏపీ ప్రజలు.. సంక్రాంతి పండుగకు సొంతూర్లకు తిరిగి వస్తున్నారు. దీంతో ప్రజా రవాణా వాహనాలు, ప్రైవేట్ వాహనాల రాకపోకలతో జాతీయ రహదారులు అన్నీ కిక్కిరిసిపోతున్నాయి. ఉపాధి, ఉద్యోగం వంటి కారణాలతో ఆంధ్రప్రదేశ్ నుంచి చాలా మంది హైదరాబాద్, బెంగళూరు, చెన్నై వంటి ప్రాంతాలకు తరలివెళ్లారు. వీరంతా సంక్రాంతి పండుగకు సొంతూర్లకు తిరిగి వస్తూ ఉండటంతో విజయవాడ, విశాఖపట్నం, రాజమండ్రి బస్టాండ్లు, రైల్వే స్టేషన్లు కిక్కిరిసిపోతున్నాయి.

ఈ నేపథ్యంలో సంక్రాంతి రద్దీని దృష్టిలో పెట్టుకుని ఆంధ్రప్రదేశ్ ప్రభుత్వం కీలక నిర్ణయం తీసుకుంది. సంక్రాంతికి సొంతూర్లకు బయల్దేరిన వారితో రైళ్లు, బస్సులు రద్దీగా మారాయి. ఈ విషయాన్ని దృష్టిలో పెట్టుకుని సీఎం నారా చంద్రబాబు నాయుడు అధికారులకు కీలక సూచనలు చేశారు. సంక్రాంతి రద్దీ నేపథ్యంలో రవాణా శాఖ అధికారులతో మాట్లాడిన సీఎం చంద్రబాబు.. ఊర్లకు వెళ్తున్నవారిని ప్రధాన పట్టణాల నుంచి పల్లెలకు, వారి సొంతూర్లకు తరలించేందుకు ఏపీఎస్ఆర్టీసీ బస్సులతో పాటుగా ప్రైవేట్ స్కూళ్లు, కాలేజీలకు చెందిన బస్సులను ఉపయోగించుకోవాలని సూచించారు. విద్యాసంస్థలకు సెలవులు ప్రకటించిన నేపథ్యంలో ప్రైవేట్ కాలేజీలు, స్కూళ్లకు చెందిన బస్సులను ఈ రకంగా ఉపయోగించుకోవాలని చంద్రబాబు నాయుడు అధికారులకు సూచించారు.

అయితే ప్రైవేట్ స్కూళ్లు, కాలేజీల బస్సులను తీసుకునేముందు వాటికి ఫిట్‌నెస్ పరీక్షలు చేయాలని.. అన్ని విధాలుగా సరైన రీతిలో ఉన్నాయని అనుకున్నప్పుడే వాటిని ఉపయోగించుకోవాలని చంద్రబాబు సూచించారు. ప్రయాణికులకు ఇబ్బందులు లేకుండా చర్యలు తీసుకోవాలని రవాణాశాఖ అధికారులకు స్పష్టం చేశారు, మరోవైపు పొరుగు రాష్ట్రాల నుంచి ఆంధ్రప్రదేశ్ వస్తున్న వారి కోసం ఏపీఎస్‌ఆర్టీసీ ఇప్పటికే అదనపు బస్సులు నడుపుతోంది.

సంక్రాంతికి ప్రత్యేక బస్సులు ఏర్పాటు చేసిన ఏపీఎస్ఆర్టీసీ అందులో సాధారణ ఛార్జీలనే వసూలు చేస్తోంది. అయితే రద్దీ అధికంగా ఉన్న నేపథ్యంలో ప్రైవేట్ విద్యాసంస్థల బస్సులను కూడా ఉపయోగించుకోవాలని చంద్రబాబు అధికారులకు సూచించారు. ఫిట్ నెస్ సరిగ్గా ఉన్న బస్సుల ద్వారా ప్రయాణికులను సొంతూర్లకు తరలించే ఏర్పాట్లు చేయాలని చంద్రబాబు అధికారులను ఆదేశించారు. అలాగే తెలుగు ప్రజలందరికీ ఏపీ ముఖ్యమంత్రి నారా చంద్రబాబు నాయుడు సంక్రాంతి శుభాకాంక్షలు తెలిపారు. ప్రజలందరిలో సంక్రాంతి కొత్త వెలుగులు నింపాలని ఆకాంక్షించారు. పండగ సమయంలో సొంతూరు వెళ్లి అందరితో ఆనందంగా గడపాలని.. అందుకే తాను కూడా తన ఊరు వెళ్తున్నట్లు చంద్రబాబు చెప్పారు.