కన్నౌజ్ రైల్వే స్టేషన్‌లో కూలిన పైకప్పు.. శిథిలాల కింద 23 మంది కూలీలు

ఉత్తర ప్రదేశ్‌లో ఈరోజు అనుకోకుండా ఓ ఘోర ప్రమాదం సంభవించింది. ముఖ్యంగా కన్నౌజ్ రైల్వే స్టేషన్‌లో నిర్మాణంలో ఉన్న ఓ భవనం పైకప్పు ఒక్కసారిగా కుప్పకూలిపోయింది. ఈ ఘటనలో అనేక మంది కూలీలు శిథిలాల కింద చిక్కుకుపోయారు. విషయం గుర్తించిన అధికారులు వెంటనే రంగంలోకి దిగి సహాయక చర్యలు అందించారు. ముఖ్యంగా శిథిలాల కింద ఉన్న కూలీలను క్షేమంగా బయటకు తీసుకు వచ్చారు. మొత్తం 23 మంది కూలీలను బయటకు తీసుకురాగా.. 20 మందికి స్వల్ప గాయాలు అయినట్లు వివరించారు. మరో ముగ్గురి పరిస్థితి విషమంగా ఉందని.. ప్రస్తుతం వీరంతా స్థానికంగా ఉన్న ఆస్పత్రుల్లో చికిత్స పొందుతున్నట్లు వెల్లడించారు.

కన్నౌజ్ రైల్వే స్టేషన్‌లో ఆధునికీకరణ పనుల్లో భాగంగా నిర్మాణాలు చేపట్టారు. ఈక్రమంలోనే కొత్తగా భవనం నిర్మిస్తున్నారు. అయితే అనుకోకుండా శనివారం రోజు మధ్యాహ్నం రెండో అంతస్తులో ఉన్న పైకప్పు ఒక్కసారిగా కుప్ప కూలిపోయింది. భారీ శబ్దం రావడంతో స్థానికులు అంతా తీవ్ర భయాందోళనకు గురయ్యారు. ముఖ్యంగా అక్కడే పని చేస్తున్న కూలీలు శిథిలాల కింద చిక్కుకుపోయి.. బిగ్గరగా కేకలు వేశారు. స్థానిక అధికారుల సమాచారంతో రంగంలోకి దిగిన పోలీసులు సహాయక చర్యలు అందించారు.

  ఓవైపు శిథిలాలను తొలగిస్తూనే.. మరోవైపు అంబులెన్సులకు ఫోన్ చేశారు. ఇలా శిథిలాల కింద నుంచి తీసుకు వచ్చిన క్షతగాత్రులందరినీ ఆస్పత్రికి పంపించారు. ఇప్పటి వరకు మొత్తం 23 మంది కూలీలను క్షేమంగా శిథిలాల నుంచి బయటకు తీయగా.. అందులో 20 మందికి స్వల్ప గాయాలు మాత్రమే అయినట్లు వివరించారు. కానీ ముగ్గురు కూలీల పరిస్థితి మాత్రం విషమంగా ఉన్నట్లు తెలిపారు. అయితే శిథిలాల కింద మరెవరైనా చిక్కుకున్నారేమోననే భయంతో.. సహాయక చర్యలు కొనసాగిస్తున్నట్లు వివరించారు.

అయితే ఈ ప్రమాద విషయం తెలుసుకున్న ఉత్తర ప్రదేశ్ ముఖ్యమంత్రి యోగి ఆదిత్యనాథ్ వెంటనే స్పందించారు. తీవ్ర దిగ్భ్రాంతి వ్యక్తం చేశారు. సహాయక చర్యలు వేగవంతం చేయాలని తెలిపారు. అలాగే గాయపడిని కూలీలకు మెరుగైన వైద్య చికిత్సలు అందేలా చూడాలని సంబంధిత అధికారులకు వెల్లడించారు. అలాగే క్షతగాత్రులు అంతా త్వరగా కోలుకోవాలని సీఎం ఆకాక్షించారు.

మరోవైపు జిల్లా మేజిస్ట్రేట్ శుభ్రాంత్ కుమార్ శుక్ల్ కూడా సంఘటనా స్థలానికి చేరుకుని.. సహాయక చర్యలను పరిశీలిస్తున్నారు. శిథిలాల కింద చిక్కుకున్న కార్మికులను రక్షించడమే తమ ప్రథమ ప్రాధాన్యత అని చెప్పిన ఆయన.. గాయపడిన వారందరికీ మెరుగైన వైద్య చికిత్సలు అందించబోతున్నట్లు వెల్లడించారు.