కమ్మటి సమోసాలో కట్ చేసిన షేవింగ్ బ్లేడు.. ఆదమరిచారంటే ఇక మీ పని అంతే

ఇంట్లో ఎన్ని రకాల ఆహార పదార్థాలు చేసుకున్న బయట తినడం అంటే చాలా మందికి ఇష్టం. అందుకే వారానికి రెండు, మూడు రోజులైనా సరే భోజనమో, చిరు తిళ్లో హోటళ్ల నుంచి తెప్పించుకుంటూ.. కమ్మగా ఉందని గుటకలేస్తూ మరీ మింగేస్తుంటారు. అలాగే చేయాలనుకున్నాడో యువకుడు. కమ్మటి సమోసా దొరికే ఓ మంచి పేరున్న హోటల్‌కు వెళ్లాడు. తనకు నచ్చిన సమోసాను కొనుగోలు చేసి ఇంటికి వెళ్లాడు. ముఖం కడుక్కున్న వెంటనే సమోసాను తీసి ఆత్రంగా తినబోయాడు. ఈక్రమంలోనే సమోసాను చుంచగా... అందులో కూరతో పాటు ఓ షేవింగ్ బ్లేడు కనిపించింది. అది చూసి షాకైన యువకుడు ఏం చేశాడో మనం ఇప్పుడు తెలుసుకుందాం.

రాజస్థాన్‌లోని టోంక్ జిల్లా నివాయ్‌టౌన్‌కు చెందిన రమేష్ వర్మ హోంగార్డుగా పని చేస్తున్నాడు. ఉద్యోగ నిమిత్తం తరచుగా తిరిగే ఆయన.. అప్పుడప్పుడూ బయట భోజనమో, చిరుతిళ్లు తెచ్చుకుంటూ తింటుంటారు. అయితే ఎప్పటిలాగే కమ్మటి సమోసాలు దొరికే ఓ మంచి పేరున్న హోటల్.. జైమ్ నామ్కీన్ భండార్‌కు వెళ్లాడు. అక్కడే కచోరీ, మిర్చీ బజ్జీలతో పాటు సమోసాలు కొనుగోలు చేశాడు. అనంతరం ఇంటికి వెళ్లిపోయాడు.

సమోసాలో షేవింగ్ బ్లేడు.. వీడియో తీసిన వినియోగదారుడు

ఇంటికి చేరుకున్న వెంటనే ముఖం కడుక్కున్న రమేష్ వర్మ.. కొనుగోలు చేసిన స్నాక్స్ తినాలనుకున్నాడు. వెంటనే తనకు ఎంతో ఇష్టమైన సమోసాలను ఓపెన్ చేశాడు. ఆత్రంగా తినబోయాడు. ముందుగా సమోసాను చుంచగా.. అందులో కూరతో పాటు ఏదో మెరిసినట్లుగా కనిపించింది. అదేంటోనని గమనించి చూడగా.. ఓ షేవింగ్ బ్లేడు కనిపించింది. దీంతో రమేష్ వర్మ షాకయ్యాడు. వెంటనే దాన్ని వీడియోగా తీశాడు. దాన్ని సోషల్ మీడియాలో పెడుతూనే.. సమోసలు కొనుగోలు చేసిన దుకాణానికి వెళ్లాడు.

సమోసాలో వచ్చిన బ్లేడు చూపించగా.. సారీ చెప్పి.. ఇకపై ఇలాంటి తప్పు జరగకుండా చూసుకుంటామని చెప్పాల్సిన నిర్వాహకులు దురుసుగా మాట్లాడారు. దాని గురించి తమకేమీ తెలియదంటూ బుకాయించారు. దీంతో కోపోద్రిక్తుడైన హోంగార్డ్ రమేష్ వర్మ.. ఫుడ్ సేఫ్టీ అధికారులతో పాటు పోలీసులకు ఫిర్యాదు చేశాడు. కేసు నమోదు చేసున్న పోలీసులు దర్యాప్తు చేస్తున్నారు. మరోవైపు రమేష్ ఫిర్యాదుతో రంగంలోకి దిగిన ఫుడ్ సేఫ్టీ అధికారులు... షాపు మొత్తం పరిశీలించారు. అక్కడ దొరికే అన్ని పదార్థాల నమూనాలను సేకరించారు. వాటన్నిటినీ పూర్తిగా పరిశీలించిన తర్వాత అందులో ఏమైనా ఇతర పదార్థాలు కలిసినట్లు గుర్తిస్తే వెంటనే చర్యలు తీసుకుంటామని వివరించారు.