విశ్రాంతి ఇవ్వాలా..? వద్దా..? బీసీసీఐకి కొత్త తలనొప్పి..

ఛాంపియన్స్‌ ట్రోఫీ 2025 కోసం జట్టు ఎంపికపై బీసీసీఐ దృష్టిసారించింది. ఇందులో భాగంగా ఈ టోర్నీ కంటే ముందే టీమిండియా ఇంగ్లాండ్‌తో టీ20, వన్డే సిరీస్‌లు ఆడనుంది. వన్డే సిరీస్‌కు ఎంపికైన ఆటగాళ్లతోనే ఛాంపియన్స్ ట్రోఫీలోనూ బరిలోకి దిగాలని భారత్ భావిస్తోంది. ఈ నేపథ్యంలో జట్టు ఎంపికపై మేనేజ్‌మెంట్ సమాలోచనలు జరుపుతోంది. వికెట్ కీపర్ ఎవరు? బౌలర్లు ఎవరు? ఓపెనింగ్ జోడీ ఏది? అనే విషయాలపై మల్లగుల్లాలు పడుతోంది.

జట్టు ఎంపికపై తాజాగా ఓ విషయం వెలుగులోకి వచ్చింది. ఇంగ్లండ్‌తో వన్డే సిరీస్‌ నుంచి తనకు విశ్రాంతి ఇవ్వాలని సీనియర్ ఆటగాడు కేఎల్ రాహుల్ బీసీసీఐకి విజ్ఞప్తి చేసినట్లు తెలుస్తోంది. అయితే అతడి విజ్ఞప్తిని బీసీసీఐ తిరస్కరించిందని వార్తలు వస్తున్నాయి. వాస్తవానికి తొలుత రాహుల్ చేసిన విజ్ఞప్తిని బీసీసీఐ అంగీకరించిందట. కానీ వన్డే సిరీస్ ముగిసిన వెంటనే టోర్నీ ప్రారంభం కానుంది. దీంతో సరైన ప్రాక్టీస్ ఉండదని భావించి.. ఈ నిర్ణయం తీసుకున్నట్లు తెలుస్తోంది.

“కేఎల్ రాహుల్‌కు ఇంగ్లాండ్‌తో వన్డే సిరీస్ నుంచి విశ్రాంతి ఇవ్వాలని తొలుత అజిత్ అగార్కర్ నేతృత్వంలోని సెలక్షన్ కమిటీ భావించింది. రాహుల్ కూడా తనకు విశ్రాంతి కావాలని బీసీసీఐకి విజ్ఞప్తి చేశాడు.. కానీ ప్రస్తుతం బీసీసీఐ పునరాలోచనలో పడింది. వన్డే సిరీస్‌లో ఆడాలని రాహుల్‌ను అడిగింది. ఛాంపియన్స్‌ ట్రోఫీకి మ్యాచ్‌ ప్రాక్టీస్‌ అయినట్లు ఉంటుందని.. ఆడితే బాగుంటుందని తెలిపింది” అని విశ్వసనీయ వర్గాలు తెలిపాయి. అయితే బీసీసీఐ సూచనకు కేఎల్ రాహుల్ ఎలా స్పందిస్తాడనేది తేలాల్సి ఉంది.

ఇక వికెట్ కీపర్ల ఎంపిక విషయం సెలక్టర్లకు తలనొప్పిలా మారింది. ఇంగ్లాండ్‌తో సిరీస్‌కు రిషభ్‌ పంత్‌కు విశ్రాంతి ఇవ్వాలని భావించినా.. ఛాంపియన్స్ ట్రోఫీకి ముందు అలాంటి ప్రయోగం అవసరం లేదనే వాదనలు వినిపిస్తున్నాయి. ఒకవేళ పంత్‌కు రెస్ట్ ఇస్తే.. సంజూ శాంసన్‌ను ఎంపిక చేసే అవకాశం ఉంది. వికెట్ కీపర్ స్థానం కోసం పంత్‌కు బ్యాకప్‌గా సంజూ శాంసన్‌ పేరును బీసీసీఐ పరిశీలిస్తోంది. ఫిబ్రవరి 19 నుంచి పాకిస్థాన్, యూఏఈ వేదికగా ఛాంపియన్స్ ట్రోఫీకి తెరలేవనుంది.