45 రోజుల పాటు మహా కుంభమేళా.. ఆ 6 రోజులు మాత్రమే కీలకం, ఏ ఏ రోజు అంటే?
national | Suryaa Desk | Published : Mon, Jan 13, 2025, 08:49 PM
12 కుంభమేళాలకు ఒకసారి అంటే 144 ఏళ్లకు ఒకసారి జరిగే మహా కుంభమేళా ఇప్పుడు ఉత్తర్‌ప్రదేశ్ ప్రయాగ్‌రాజ్‌లోని గంగా, యమునా, సరస్వతి నదుల త్రివేణి సంగమం వద్ద అంగరంగ వైభవంగా జరుగుతున్నాయి. సోమవారం ఈ మహా కుంభమేళా ప్రారంభం కాగా.. ఫిబ్రవరి 26వ తేదీ వరకు జరగనున్నాయి. ఇప్పటికే దాదాపు కోటి మంది త్రివేణి సంగమంలో పుణ్యస్నానాలు చేశారు. ఈ క్రమంలోనే ఈ 45 రోజుల్లో వివిధ రకాల రాజ స్నానాలు చేయనున్నారు. మొత్తం ఆరు రోజుల పాటు ఈ రాజ స్నానాలు జరగనున్నాయి. ఈ మొత్తం మహా కుంభమేళాలో ఈ రాజ స్నానాలే అత్యంత ముఖ్యమైనవి. మొదటి రోజు నుంచి చివరి రోజు వరకు వివిధ తేదీల్లో ఈ పుణ్య స్నానాలను ఆచరించనున్నారు. ఈ 6 రాజ స్నానాలకు హిందూ పురాణాల్లో ఎనలేని ప్రత్యేకత ఉందని తెలుస్తోంది.
మహా కుంభమేళా ప్రారంభం అయిన మొట్టమొదటి రోజున పుష్య పౌర్ణమి సందర్భంగా తొలి రాజ స్నానం జరుగుతుంది. అంటే సోమవారం(జనవరి 13) రోజున తొలి స్నానం పూర్తి అయింది. ఇక ఈనెల 14వ తేదీన మకర సంక్రాంతి సందర్భంగా రెండో రాజ స్నానం నిర్వహించనున్నారు. ఆ తర్వాత ఈనెల 29వ తేదీన మౌని అమావాస్య సందర్భంగా మూడో స్నానం చేయనున్నారు. ఇక నాలుగో రాజ స్నానం ఫిబ్రవరి 3వ తేదీన వసంత పంచమి రోజున జరపనున్నారు. ఫిబ్రవరి 12వ తేదీన మాఘ పౌర్ణమి రోజున ఐదో స్నానం నిర్వహించనున్నారు. చివరిదైన ఆరో రాజ స్నానం మహా కుంభమేళా ముగిసే ఫిబ్రవరి 26వ తేదీన మహాశివరాత్రి రోజున జరుగుతుంది. మహా కుంభమేళా సమయంలో త్రివేణి సంగమంలో స్నానం చేస్తే సమస్త పాపాలు నశించి.. మోక్షం లభిస్తుందని పురాణాల్లో పేర్కొన్నట్లు భక్తులకు ఎనలేని విశ్వాసం.
సాధారణంగా కుంభమేళా దేశంలోని 4 ప్రాంతాల్లో జరుగుతుంది. ఉత్తర్‌ప్రదేశ్‌లోని ప్రయాగ్‌రాజ్‌.. ఉత్తరాఖండ్‌లోని హరిద్వార్‌.. మధ్యప్రదేశ్‌లోని ఉజ్జయిని.. మహారాష్ట్రలోని నాసిక్‌లలో నిర్వహిస్తుంది. అయితే మహా కుంభమేళా మాత్రం కేవలం త్రివేణి సంగమం అయిన ప్రయాగ్‌రాజ్‌లోనే నిర్వహిస్తారు. సూర్యుడు మకర రాశిలోకి ప్రవేశించిన సమయంలో ఈ మహా కుంభమేళా ప్రారంభం అవుతుంది. భూమిపై ఏడాది గడిస్తే.. దేవతలకు ఒకరోజుతో సమానం. దేవతలు, రాక్షసుల మధ్య 12 ఏళ్ల పాటు యుద్ధం జరగ్గా.. 12 ఏళ్లకు ఒకసారి పూర్ణకుంభమేళా నిర్వహిస్తారు. ఇక 12 పూర్ణ కుంభమేళాలు అంటే 144 ఏళ్లకు.. అదే సమయంలో దేవతలకు 12 సంవత్సరాలైతే.. భూమిపై 144 సంవత్సరాలకు సమానం అవుతుంది. అందుకే 144 సంవత్సరాలకు ఒకసారి మహా కుంభమేళా జరుగుతుంది.
|
|