ఢిల్లీలో కాంగ్రెస్ పార్టీ కార్యాలయం మూసివేత, 47 ఏళ్ల తర్వాత

గత 47 ఏళ్లుగా దేశ రాజధాని ఢిల్లీలోని 24 అక్బర్ రోడ్డులోని లుటియన్స్ బంగ్లా జోన్‌లో కాంగ్రెస్ పార్టీ ఉండగా.. నేటితో దానికి తెరపడింది. కోట్లా రోడ్‌లోని 9 ఏలో కొత్త కాంగ్రెస్ జాతీయ కార్యాలయం ప్రారంభోత్సవం జరుపుకుంది. ఈ భవనానికి ఇందిరాగాంధీ భవన్ అని పేరు పెట్టారు. 5 అంతస్థులతో అన్ని రకాల సౌకర్యాలతో ఈ ఇందిరాగాంధీ భవన్‌ను నిర్మించారు. ఈ కొత్త కార్యాలయాన్ని కాంగ్రెస్ పార్లమెంటరీ పార్టీ అధినేత్రి సోనియా గాంధీ.. పార్టీ జాతీయ అధ్యక్షుడు మల్లికార్జున్ ఖర్గే, లోక్‌సభలో ప్రతిపక్ష నాయకుడు రాహుల్ గాంధీ, ఎంపీ ప్రియాంక గాంధీ వాద్రా సహా పార్టీకి చెందిన 400 మంది సమక్షంలో ప్రారంభించారు.

ఈ ఇందిరా గాంధీ భవన్‌లోని ఐదో అంతస్తులో మల్లికార్జున్ ఖర్గే, సోనియా గాంధీ, రాహుల్ గాంధీ కార్యాలయాలు ఏర్పాటు చేశారు. నాలుగో అంతస్తులో ప్రధాన కార్యదర్శులకు కేటాయించారు. రాష్ట్రాల ఇంఛార్జులు మూడో అంతస్తులో.. ఏఐసీసీ కార్యదర్శులకు రెండో అంతస్తును ఉపయోగించుకుంటారు. రాజకీయ పార్టీలు తమ రిజిస్టర్డ్ కార్యాలయాలను ప్రభుత్వ భవనాల్లో ఉండకూడదని 2005-2006లో సుప్రీంకోర్టు ఆదేశాలు జారీ చేసిన తర్వాత.. ఈ కొత్త భవన నిర్మాణానికి 2009లో అప్పటి ప్రధానమంత్రి మన్మోహన్ సింగ్, పార్టీ అధినేత్రి సోనియాగాంధీ భూమిపూజ చేశారు. కానీ.. ఈ భవనం నిర్మాణం పూర్తి కావడానికి 15 సంవత్సరాలు పట్టడం గమనార్హం.

ఇక ఈ కాంగ్రెస్ పార్టీ కొత్త కార్యాలయం ఇందిరాగాంధీ భవన్.. దీన్ దయాళ్ ఉపాధ్యాయ మార్గ్‌లోని బీజేపీ జాతీయ ప్రధాన కార్యాలయానికి కూతవేటు దూరంలోనే ఉండటం గమనార్హం. ఇందిరా గాంధీ భవన్.. కాంగ్రెస్ పార్టీ అవసరాలకు అనుగుణంగా తీర్చిదిద్దినట్లు పార్టీ వర్గాలు వెల్లడించాయి. పరిపాలనా, సంస్థాగత, వ్యూహాత్మక కార్యకలాపాలకు మద్దతు ఇవ్వడానికి అత్యాధునిక సౌకర్యాలను కలిగి ఉందని గత వారం తెలిపింది.

ఇందిరా గాంధీ నేతృత్వంలోని కాంగ్రెస్ పార్టీ 1978లో స్వాతంత్ర్యం వచ్చిన తర్వాత తొలిసారి అధికారాన్ని కోల్పోయినపుడు.. 24 అక్బర్ రోడ్‌లోకి మార్చారు. ఆ తర్వాత కాంగ్రెస్ పార్టీ చీలిపోయిన తర్వాత ఇందిరా కాంగ్రెస్ పార్టీకి కార్యాలయం లేకపోవడంతో అప్పటి రాజ్యసభ ఎంపీ గడ్డం వెంకటస్వామి తన అధికారిక నివాసం అయిన 24 అక్బర్ రోడ్‌ను పార్టీకి అప్పగించారు.

అయితే అప్పుడు తాత్కాలికంగా 24 అక్బర్ రోడ్డులో ప్రారంభమైన కాంగ్రెస్ పార్టీ కార్యాలయం అలాగే కొనసాగుతూ వస్తోంది. 1978లో కాంగ్రెస్ పార్టీ ఆఫీస్ 24 అక్బర్ రోడ్‌కు మారడానికి ముందు 1971లో 5 రాజేంద్ర ప్రసాద్ రోడ్‌లో ఉండేది. అయితే 1980లో భారీ మెజారిటీతో ఇందిరా గాంధీ తిరిగి అధికారంలోకి వచ్చిన తర్వాత.. పాత పార్టీ కార్యాలయాన్ని దక్కించుకునేందుకు ఆమె నిరాకరించినట్లు "24 అక్బర్ రోడ్" పుస్తక రచయిత రషీద్ కిద్వాయ్ తెలిపారు. ఇక విశాలమైన అక్బర్ రోడ్డులోని పార్టీ కార్యాలయం.. కాంగ్రెస్ పార్టీకి ఎన్నో ఎత్తుపల్లాలను చూసింది. 1980, 1984, 1991, 2004, 2009 సార్వత్రిక ఎన్నికల్లో పార్టీకి ఘన విజయాలను నమోదు చేసింది. అయితే 2014 నుంచి వరుసగా మూడుసార్లు లోక్‌సభ ఎన్నికల్లో పరాజయాలతో కాంగ్రెస్ పార్టీ పతనాన్ని కూడా చవిచూసింది.