బంగారు గనిలో చిక్కుకున్న కార్మికులు.. దొంగతనం కోసం వెళ్లి 100 మంది మృతి

దక్షిణాఫ్రికాలో పెను విషాదం చోటు చేసుకుంది. ఒక బంగారు గనిలో చిక్కుకుని సుమారు 100 మంది అక్రమ కార్మికులు చనిపోయినట్లు స్థానిక అధికారులు వెల్లడించారు. మీడియాకు తెలిసిన వివరాల ప్రకారం.. ఈ కార్మికులందరూ సౌతాఫ్రికాలోని ఒక బంగారు గనిలో అక్రమంగా పనులు నిర్వహిస్తున్నారు. ఈ కార్మికులు నెలల తరబడి భూగర్భ గనిలో చిక్కుకున్నారని చెప్పుకొచ్చారు. ఈ నేపథ్యంలోనే వారు చనిపోయారని వెల్లడించారు. కాగా, గనిలో చిక్కుకున్న కార్మికులను రక్షించడానికి పోలీసులు చాలా ప్రయత్నాలు చేసినప్పటికీ విజయం సాధించలేకపోయారు.

అయితే మైనింగ్ ప్రభావిత కమ్యూనిటీస్ యునైటెడ్ ఇన్ యాక్షన్ గ్రూప్ ప్రతినిధి మాట్లాడుతూ.. కొందరు కార్మికులను బంగారు గని నుంచి సురక్షితంగా బయటకు తీసుకు వచ్చినట్లు తెలిపారు. వారి దగ్గర రెండు వీడియోలు దొరికాయని పేర్కొన్నారు. ఆ వీడియోల్లో డజన్ల కొద్దీ మృతదేహాలు భూగర్భంలోని బంగారు గనిలో కనిపిస్తున్నాయని వెల్లడించారు. దక్షిణాఫ్రికాలోని వాయువ్య ప్రావిన్స్‌లో ఉన్న ఆ బంగారు గనిలో దాదాపు 100 మంది వరకు కార్మికులు మృతి చెందినట్లు ఆ సంస్థ ప్రతినిధి ఒకరు చెప్పారు. కాగా ఇప్పటివరకు భూగర్భ గనిలో నుంచి 18 మృతదేహాలను బయటకు వెలికి తీసినట్లు తెలిపారు. ఆకలి, డీహైడ్రేషన్‌ కారణంగా ఆ కార్మికులు అంతా ఆ గనిలోనే చనిపోయి ఉండొచ్చని అధికారులు అనుమానం వ్యక్తం చేస్తున్నారు.

గనిలో చిక్కుకున్న కార్మికులకు ప్రాతినిధ్యం వహిస్తున్న ఒక బృందం మీడియాతో మాట్లాడింది. ఆ కార్మికులు అంతా నెలల తరబడి భూగర్భ గనిలో చిక్కుకున్నారని తెలిపింది. ఈ నేపథ్యంలోనే వారు అందులోనే మరణించినట్లు పేర్కొంది. గనిలో చిక్కుకున్న కార్మికులను రక్షించడానికి పోలీసులు, అధికారులు తీవ్రంగా ప్రయత్నించినప్పటికీ.. వారిని కాపాడలేకపోయారు. అయితే వారు అక్రమంగా గనిలోకి ఎలా ప్రవేశించారు. అనేది ఇప్పుడు తీవ్ర చర్చనీయాంశంగా మారింది. స్థానికంగా ఉన్న తీవ్ర కరువు, ఆకలి, డబ్బులు లేని పరిస్థితి కారణంగా.. జనం బంగారు గనిలోకి అక్రమంగా వెళ్లి బంగారం దొంగతనం చేస్తున్నారని స్థానిక అధికారులు వెల్లడించారు.