వారానికి 70 గంటల పని.. నారాయణమూర్తి క్లారిటీ.. రోజుకు 8 గంటలు పనిచేయడమే కష్టమన్న పూనావాలా

 భారత్‌లో వర్క్ అవర్స్‌పై (పని గంటలు) కొంత కాలంగా పెద్ద చర్చ నడుస్తున్న సంగతి తెలిసిందే. ముందుగా ఇన్ఫోసిస్ సహ వ్యవస్థాపకుడు నారాయణ మూర్తి గతేడాది భారతదేశ యువత వారంలో 70 గంటలు పనిచేయాలని వ్యాఖ్యానించిన సంగతి తెలిసిందే. తర్వాత కొద్ది రోజుల కిందటే ప్రముఖ టెక్ సంస్థ ఎల్ అండ్ టీ ఛైర్మన్ ఎస్ఎన్ సుబ్రహ్మణ్యన్.. మరో అడుగు ముందుకేసి వారంలో 90 గంటల పాటు పనిచేయాలని.. 'ఇంట్లో కూర్చొని భార్య ముఖం ఏం చూస్తారు. ఆదివారం కూడా పనిచేయండి.' అని కామెంట్స్ చేశారు. దీనిపైనా తీవ్ర దుమారం రేగింది. చాలా మంది దిగ్గజ వ్యాపారవేత్తలు కూడా ఈ వ్యాఖ్యల్ని ఖండించారు. తీవ్ర వ్యతిరేకత వ్యక్తం చేశారు.

ఈ క్రమంలోనే తాజాగా తన 70 గంటల పని వ్యాఖ్యలపై మరోసారి క్లారిటీ ఇచ్చారు నారాయణ మూర్తి. వారానికి 70 గంటల పనిని ఎవరూ.. ఎవరిపై బలవంతంగా రుద్దలేరని అన్నారు. మీరు ఇలాగే పనిచేయాలి.. ఇలా చేయొద్దు అని ఎవరూ ఎవరికీ చెప్పలేరని వ్యాఖ్యానించారు. తాజాగా ముంబైలో కిలాచంద్ మెమోరియల్ లెక్చర్‌లో ఆయన ఈ వ్యాఖ్యలు చేశారు. 'నేను చెప్పిన ప్రకారమే ప్రజలందరూ చేయాలని నేను అనట్లేదు. ఎవరిష్టం వచ్చినట్లు వారు పని చేసుకోవచ్చు. ఎవరైనా ఇక్కడ తమ పరిస్థితులకు తగ్గట్లుగా ఆలోచించి నిర్ణయం తీసుకోవాలి.' అని అన్నారు.

తాను రోజూ ఉదయం 6.20కి ఆఫీసుకు వెళ్లి.. సాయంత్రం 8.30 కి బయటకు వచ్చేవాడినని.. అలానే 40 ఏళ్ల పాటు పనిచేసినట్లు వివరించారు. అది తప్పని కూడా తనకు ఎవరూ చెప్పలేదని.. కాబట్టి దీనిపై చర్చలు, వాదనలు అనవసరం అని అన్నారు. గతంలో ఇన్ఫోసిస్ మాజీ సీఎఫ్ఓ మోహన్‌దాస్ పాయ్ హోస్ట్‌గా చేసిన ఒక పాడ్‌కాస్ట్‌లో నారాయణ మూర్తి ఈ కామెంట్స్ చేశారు.

మరోవైపు ఈ పని గంటలపై ఇంతలా చర్చ నడుస్తున్న క్రమంలో మరో దిగ్గజ వ్యాపారవేత్త, సీరమ్ ఇన్‌స్టిట్యూట్ ఆఫ్ ఇండియా సీఈఓ అదర్ పూనావాలా కూడా మాట్లాడారు. మనుషులు ప్రతి రోజూ 8-9 గంటల పాటు నిరంతరాయంగా పనిచేస్తే.. ఆ తర్వాత మెరుగైన ఉత్పాదకత సాధించలేరని అన్నారు. రోజూ ఇలా అంటే కష్టమేనని అన్నారు. కొన్ని తప్పనిసరి పరిస్థితుల్లో మాత్రం ఎక్కువ పని చేయాల్సి ఉంటుందని చెప్పుకొచ్చారు. ఎక్కువ సమయం కాకుండా.. వ్యూహాత్మకంగా, నాణ్యంగా చేస్తున్నామా లేదా అనేదే ముఖ్యమని వ్యాఖ్యానించారు. పరిస్థితుల్ని బట్టి ఎక్కువ పనిచేయాలా.. ఎలా పనిచేయాలి అని డిసైడ్ చేసుకోవాలని మాట్లాడారు.