ఈ 5 ఎస్బీఐ పథకాలతో అదిరిపోయే రిటర్న్స్.. లక్ష పెట్టుబడితో ఇలా చేతికి రూ. 1.3 కోట్లు.. ఎన్నేళ్లలో

రిస్క్ ఉన్నప్పటికీ మ్యూచువల్ ఫండ్స్ అనేవి దీర్ఘకాలంలో పెద్ద మొత్తంలో రాబడి అందించే పెట్టుబడి ఆప్షన్లలో ముందువరుసలో ఉంటాయని చెప్పొచ్చు. స్టాక్ మార్కెట్లకు ప్రత్యామ్నాయంగా ఇవి ఉన్నాయి. నేరుగా స్టాక్స్‌లో ఇన్వెస్ట్ చేయకపోవడం వల్ల ఇక్కడ రిస్క్ కాస్త తక్కువగా ఉంటుందని చెప్పొచ్చు. ఇక్కడ కూడా మార్కెట్‌తో లింక్ అయి ఉండటం వల్ల రిస్క్ ఉన్నా.. లాంగ్ రన్‌లో ఆ ప్రభావం పెద్దగా కనిపించదు. మ్యూచువల్ ఫండ్లలో ముఖ్యంగా.. కాంపౌండింగ్ ఎఫెక్ట్ మంత్రం పనిచేస్తుంది. ఏటా అసలుకు వడ్డీ కలుస్తుంటుంది. ఈ కారణంతోనే కాలం గడుస్తున్న కొద్దీ రిటర్న్స్ కూడా పెరుగుతుంటాయి. అందుకే ఇందులో ఇన్వెస్ట్ చేసేందుకు ఎక్కువగా ఆసక్తి చూపిస్తుంటారు. పాస్ట్ రిటర్న్స్ చూస్తే చాలా వాటిల్లో సగటున 12 శాతానికిపైగా రాబడి వస్తుంటుంది. ఇక్కడ కూడా నిపుణుల సలహా తీసుకోవడం వల్ల మంచి పథకాల్ని ఎంచుకునే ఛాన్స్ ఉంటుంది.

ఇప్పుడు నికర ఆస్తుల విలువ పరంగా అతిపెద్ద సంస్థల్లో ఒకటైన ఎస్బీఐ మ్యూచువల్ ఫండ్ నుంచి టాప్- 5 స్కీమ్స్ గురించి చూద్దాం. వీటిల్లో రూ. లక్ష పెట్టుబడితో ఇన్నేళ్లలో రిటర్న్స్ ఎలా వచ్చాయనేది తెలుసుకుందాం. ఇక్కడ లార్జ్ క్యాప్, కాంట్రా ఫండ్స్, కన్జంప్షన్ ఫండ్ ఇలా చాలానే ఉన్నాయి. టాప్ ఫండ్ హౌస్ అయిన ఎస్బీఐ నుంచి ఓల్డ్ అండ్ బెస్ట్ ఫండ్స్ లిస్ట్ చూద్దాం. వీటిల్లో చాలా వరకు గత 20-30 ఏళ్ల వ్యవధిలో సగటున వార్షిక ప్రాతిపదికన 19 శాతం రిటర్న్స్ అందించాయి.

>> ఎస్బీఐ కన్జంప్షన్ అపార్చునిటీస్ ఫండ్- ఇక్కడ 80 శాతం వరకు కన్జూమర్ ఫేసింగ్ కంపెనీల్లో ఇన్వెస్ట్ చేస్తుంటుంది. లాంగ్ రన్‌ పెట్టుబడుల కోసం ఉద్దేశించింది. ఇక్కడ నిఫ్టీ ఇండియా కన్జంప్షన్ TRI ని ఈ పథకానికి కొలమానంగా చూస్తారు. రిస్క్ హైగానే ఉంటుంది. 1999 జులై 5న లాంఛ్ కాగా.. లాంఛింగ్ నుంచి సగటున 15.80 శాతం రాబడి అందించింది. ఈ క్రమంలోనే గత 25 ఏళ్లలో చూస్తే లక్ష పెట్టుబడితో రూ. 39.14 లక్షలు అందాయి. అదే నెలకు రూ. 1000 తో అయితే రూ. 55.66 లక్షలు రావడం విశేషం.

>> ఎస్బీఐ లార్జ్ అండ్ మిడ్‌క్యాప్ ఫండ్- ఇక్కడ 35 శాతం వరకు లార్జ్ అండ్ మిడ్ క్యాప్ స్టాక్స్‌లో ఇన్వెస్ట్ చేస్తుంటుంది. నిఫ్టీ లార్జ్ మిడ్‌క్యాప్ 250 TRI కొలమానంగా ఉంది. 1993, ఫిబ్రవరి 28న లాంఛ్ చేశారు. స్కీమ్ ప్రారంభమైనప్పటి నుంచి సగటున 15 శాతం రిటర్న్స్ అందించింది. ఇక్కడ లక్ష పెట్టుబడితో 31 ఏళ్లలో రూ. 75.93 లక్షలు వచ్చాయి.

>> ఎస్బీఐ లాంగ్ టర్మ్ ఈక్విటీ ఫండ్- 80 శాతం ఈక్విటీల్లో ఇన్వెస్ట్ చేయొచ్చు. BSE 500 TRI కొలమానంగా ఉంది. 1993లో స్కీమ్ లాంఛ్ కాగా.. లక్ష పెట్టుబడితో ఇక్కడ 31 ఏళ్లలో చేతికి రూ. 1.3 కోట్లు వచ్చాయి. ఈ క్రమంలో సగటున ఏడాదికి 17.03 శాతం చొప్పున రిటర్న్స్ వచ్చాయి.

 >> ఎస్బీఐ ఫోకస్డ్ ఈక్విటీ ఫండ్- ఇది ఒక ఫ్లెక్సీ క్యాప్ ఫండ్. BSE 500 TRI నే ఈ పథకానికి కొలమానం. 2004 అక్టోబరులో ఇది లాంఛ్ అయింది. లాంఛ్ నుంచి 18.74 శాతం చొప్పున రాబడి అందించింది. ఇక్కడ నెలకు రూ. 1000 పెట్టుబడితో 20 ఏళ్లలో రూ. 15.17 లక్షలు వచ్చాయి. అదే రూ. లక్ష ఒకేసారి ఇన్వెస్ట్ చేస్తే వారికి రూ. 27.76 లక్షలు వచ్చాయి.

>> ఎస్బీఐ కాంట్రా ఫండ్‌లో సగటున 19.39 శాతం రాబడి రాగా.. లక్ష పెట్టుబడిని 25 ఏళ్లలో రూ. 84 లక్షలు చేసింది. ఇక్కడ కూడా BSE 500 TRI కొలమానం. 1999 జులై 5 న ఈ పథకం ప్రారంభమైంది.